قىسقى ساياحات ”باتىس سولتۇستىكتەگى ءبىرىنشى اققايىڭ ورمانى“

  اسپانمەن بوي تالاسىپ، اق قاردان مونشاق تاعىندى

  جىڭ حۇڭجۇن

  اق بالتىر ارۋداي ىرعالعان، اسپانمەن بوي تالاسقان اققايىڭ ورمانى كوكتەم مەن جازدا جاسىل جەلەك جامىلىپ، قىستا اق كورپەگە ورانىپ، كۇزدە التىن تۇسكە ەنەدى. سىڭسىعان ورمان بەينە ءتۇرلى ـ ءتۇستى تولقىنمەن جاعانى سوعىپ جاتقان الىپ تەڭىزگە ۇقسايدى، ورتاسىندا بۇرالا اعىپ جاتقان وزەن تابيعى قورعاۋشى سىپەتتى.

  جاقىندا، التاي گازەتى مەكەمەسىنىڭ رەداكتورىنان: ۋاي، قاربالاس بولىپ جاتىرسىز با؟ اققايىڭ تۋرالى ماقالا جازىپ بەرە الاسىز با...- دەگەن تەلەفون قابىلدادىم. قابالىق بولعان مەن بىرنەشە جىلدان بەرى اتا مەكەننىڭ تاۋ، سۋ، ورمان، اتىزىن تاماشالاۋعا مويىن بۇرا المادىم.بۇرىن قار-مۇز قۇرسانعان ماۋسىمدا دوستارمەن ۇنەمى باس قوسقاندا اۋىلىمىزداعى بايىرعى اققايىڭ ورمانىن تىلگە تيەك ەتەتىنبىز، اققايىڭ ورمانى راسىندا، كەرەمەت!

  كورىكتى اققايىڭ ورمانى تىلگە تيەك ەتىلگەندە، قابا وزەنى دە قاعىس قالمايدى. قابا وزەنىنسىز اققايىڭ ورمانى ءوسىپ-ءوربىپ، جاسىل القاپقا اينالا المايدى. سوندىقتان، ەكەۋى ءبىر ـ بىرىنەن ايرىلا المايدى. بەينە التاي قالاسىنىڭ اققايىڭ باقشاسىنداعى سان مىڭداعان اققايىڭ اعاشتارىنىڭ قىران وزەنىنەن ايرىلا المايتىنى سەكىلدى.قابا اۋدانىنداعى تاۋدان اققان قار سۋلارى، ۇلكەن-كىشى بۇلاقتار جينالىپ قابا وزەنىن قالىپتاستىرعان. اققايىڭ تۇقىمى وزەن سۋىمەن بىرگە قالقىپ، جەل ۇشىرىپ جاعاعا شىعارعاندىقتان سول جەرگە تامىر تارتىپ، وركەن جايىپ، وزەن بويىنداعى ورماندىققا اينالعان.

  ”بايدۋدا“ بۇل اققايىڭ ورمانى جونىندە مىناداي تۇسىنىك جاسالعان: قابا اققايىڭ ورمانى، قابا اۋدانىنىڭ كولىباي قالاشىعى شەكاراسىنا ورنالاسقان، اۋدان قالاشىعىنان 4 كيلومەتر قاشىقتىقتا، ۇزىندىعى مولشەرمەن 28 كيلومەتر، كەڭدىگى مولشەرمەن 1.5 كيلومەتر بولىپ، ەلىمىزدىڭ باتىس سولتۇستىگىندەگى ەڭ ۇلكەن تابيعي اققايىڭ ورمان بەلدەۋى. قاباداعى اققايىڭ اعاشىنىڭ بيىكتىگى 20 دا 40 مەتر بولىپ، تاماشا كورىنىس قالىپتاستىرعان. سامالاداي سامسىعان اعاش ءدىڭى الىستان قاراعاندا ءزاۋلىم ءارى تازا كورىنسە، جاقىننان قاراعاندا ادەتتەگى اعاشتان پارىقتالمايدى. بۇل جەردە ءتورت ماۋسىمدا دا ساياحاتشىلاردىڭ اياعى ۇزىلمەيدى. كوكتەم، جاز ماۋسىمدارىندا ورمانداعى الۋان گۇلدەر جايقالىپ وسەدى؛ كۇز ماۋسىمىندا اققايىڭ ورمانىنىڭ كورىنىسى كوز تارتىپ، جاپىراعى سارعايىپ قىزارادى، اپپاق اعاش ءدىڭى كوگىلدىر اسپانمەن توعىسقاندا كوپتەگەن فوتوگرافشىلار مەن سۋرەتشىلەردى وزىنە ەرىكسىز باۋرايدى.

  1-ايدىڭ 8-كۇنى دەمالىس كۇنىندە قىزمەتتەسىم ەكەۋىمىز اققايىڭ باقشاسىنا بارعاندا، ساياحاتشىلاردىڭ سۋرەتكە ءتۇسىپ، باقشاداعى تيىنداردىڭ بۇتاقتان-بۇتاققا سەكىرىپ جۇرگەنىن كوردىك ...

ورماندا سەيىلدەپ جۇرسەڭىز، بۇل ارادا تەك اققايىڭ عانا ەمەس جانە الحور، تال، اق تەرەك، دولانا قاتارلى اعاش تۇرلەرى بارىن بايقايسىز.

      بىتىك وسكەن اققايىڭدار اق قاردان مونشاق تاعىنىپ، ساياحاتشىلاردى قارسى الىپ جاتقانداي.

  باقشاداعى بايىرعى ورماندىق جەر ادامدارعا كوپتەگەن ساۋعا جانە ارمان سيلايدى. قازىر اققايىڭ كورىنىس رايونىنداعى ءتۇرلى قىزمەت وتەۋ يقۋاتى اناعۇرلىم كەمەلدەنىپ، جەر-جەردەگى ساياحاتشىلاردى وزىنە باۋرادى.

ساياحات لەنيالارى

  1-لەنيا: التاي قالاسىنان اتتانىپ، مەملەكەت جولى 217-لەنياسىن بويلاپ، بۋىرشىن اۋدانىنا بارعاننان كەيىن مەملەكەت جولى 331-لەنياسىمەن ءجۇرىپ، سوڭىندا اققايىڭ كورىنىس رايونىنا جەتەدى.

  2- لەنيا: ءۇرىمجى قالاسىنان اتتانىپ، التاي-ۇرىمجى جوعارى قارقىندى تاس جولمەن بۋرىلتوعاي اۋدانىنا جەتكەننەن كەيىن ولكە جولى 19-لەنياسىمەن ءجۇرىپ، سوڭىندا اققايىڭ كورىنىس رايونىنا جەتەدى.

جاۋاپتى رەداكتور: بەردىقان مۇراتقان ۇلى