2022-جىلعى كوكتەم مەرەكەسى كەزىندەگى پويەز بەلەتى ساتىلا باستادى

  ءوز ءتىلشىمىز قۇرمانگۇل جەڭىسبەك قىزى حابارلايدى. ءتىلشىنىڭ ۇعىسۋىنشا، 1-ايدىڭ 3 ـ كۇنىنەن باستاپ تەمىر جول تاراۋلارى 2022 -جىلعى كوكتەم مەرەكەسى كەزىندەگى تاسىمال بەلەتىن ساتا باستاعان، 2022-جىلعى كوكتەم مەرەكەسى تاسىمالى 1-ايدىڭ 17-كۇنى باستالىپ، 2-ايدىڭ 25-كۇنى اياقتالادى، جيىنى 40 كۇن.

  ءتىلشى التاي پويەز بەكەتىنە بارعاندا، جولاۋشىلاردىڭ بەلەت تەكسەرۋ اۋزىندا 1.5 مەتر ارالىق تاستاپ، پويەز بەكەتى قىزمەتكەرلەرىنە سانالى تۇردە سايكەسىپ، دەنە تەمپەراتۋراسىن ولشەتىپ، نۋكلەين قىشقىلىن تەكسەرتۋ ەستەلىگىن كورسەتىپ، بەكەتكە تارتىپپەن كىرىپ جاتقاندىعىن كوردى.چۇڭچيڭدىق ۋ شياۋچين ٴار جىلى كورلا كەلىپ جەر كوتەرمەگە الىپ شىلان ەگەتىن. ول بيىل مول ٴونىم العاننان كەيىن، التايعا كەلىپ قار شاڭعى تەپتى. كوكتەم مەرەكەسى تاسىمالى كەزىندەگى پويەز بەلەتى ساتىلا باستاعاندىعىن ەستىپ، جىل بويى وتباسىنداعىلارمەن باس قوسا الماعان ول پويەز بەكەتىنە ەرتە كەلىپ، چۇڭچيڭگە باراتىن پويەز بەلەتىن ساتىپ الدى.ول بىلاي دەدى: ”بيىل التايعا كەلىپ قار شاڭعى تەبۋ ارمانىمدى جۇزەگە اسىرعانىما ەرەكشە قۋانىشتامىن ءارى ۇيگە قايتاتىن پويەز بەلەتىن دە ساتىپ الدىم، ەندى كوكتەم مەرەكەسىندە وتباسىمداعىلارمەن باس قوساتىن بولدىم، سىرتتا ٴبىر جىل جۇمىس ىستەدىم، ەندى ۇيىمە امان - ەسەن جەتسەم دەيمىن“.

  ىندەتتەن ساقتانۋ-تىزگىندەۋ شارت-جاعدايىندا جولاۋشىلاردىڭ ٴجۇرىس-تۇرىس قاعيداسىنا ۇيلەسۋ ٴۇشىن، تەمىر جول تاراۋلارى بەلەت ساتۋ جانە بەلەت قايتارۋ ۋاقىتىن وزگەرتۋ قىزمەت وتەۋ شارالارىن جاقسارتتى. 12306 توراپ بەكەتىنىڭ (قولفون كليەنتىن قامتيدى) بەلەت ساتۋ قىزمەتىن وتەۋ ۋاقىتى ءار كۇنى 5:00 دەن كەلەسى كۇنى تاڭعى ساعات 1:00 گە دەيىن ۇزارتىلىپ (سەيسەنبىدەن سىرت)، ينتەرنەت ارقىلى 24 ساعات بەلەت قايتارۋ قىزمەت وتەۋىمەن قامدادى، بەلەت قايتارۋ ۋاقىتى پويەز جۇرەردەن بۇرىنعى 25 مينۋتعا ۇزارتىلدى.

  التاي پويەز بەكەتىنىڭ جولاۋشى تاسىمال كەزەكشى قىزمەتكەرى جاڭ جيڭ بىلاي دەدى: 2022-جىلعى كوكتەم مەرەكەسى تاسىمالى پويەز بەلەتىن تۇتاس جەلىدە ساتقاننان كەيىن، التاي پويەز بەكەتى كوكتەم مەرەكەسى تاسىمالى پويەز بەلەتىن ساتۋ قىزمەتىن بەلسەنە جاقسى ىستەپ، بەكەتكە كەلىپ بەلەت ساتىپ الۋشىلارعا باسقا جەردە بەلەت ساتىپ الۋ قىزمەتىن بەلسەنە ۇگىتتەپ، قارتتار، اسكەريلەر سياقتى جولاۋشىلاردىڭ الدىمەن بەلەت ساتىپ الۋىنا جول كورسەتىپ، كوكتەم مەرەكەسى تاسىمالى بەلەت ساتۋ قىزمەتىن ويداعىداي ىستەپ، جولاۋشىلاردىڭ امان ـ ەسەن ۇيلەرىنە قايتۋىن بار كۇشپەن قامتاماسىز ەتتى.

  كوكتەم مەرەكەسى كەزىندەگى ىندەتتەن ساقتانۋ-تىزگىندەۋ جاعىندا، التاي پويەز بەكەتى جولاۋشى تاسۋ مولشەرىن قاتاڭ تىزگىندەپ، جولاۋشىلاردى پويەز كۇتۋ بەكەتىنە تارتىپپەن، ارالىق ساقتاپ كىرۋگە جەتەكتەپ، پويەزعا وتىرۋ تالابىنا ۇيلەسپەيتىن جولاۋشىلاردىڭ بەكەتكە كىرۋىنەن، پويەزعا شىعۋىنان قاتاڭ ساقتاندى.التاي پويەز بەكەتىندەگى ىندەتتەن ساقتانۋ-تىزگىندەۋ ارناۋلى گرۋپپاسىنىڭ قىزمەتكەرى شيە مىڭجيە بىلاي دەدى: ”كوكتەم مەرەكەسى قارساڭىندا، ستۋدەنتتەر شوعىرلى اۋىلىنا قايتۋ، التايعا كەلىپ قار شاڭعى تەبۋ سياقتى ەرەكشە جاعدايعا ءدوپ كەلگەندە، ٴبىز تۇرلىشە شارا قولدانىپ، تەز، ٴونىمدى، حاۋىپسىز قاتىناۋعا كەپىلدىك ەتتىك. ورتا، جوعارى دارەجەلى قاتەرلى جەردەن كەلگەندەردى جوعارىنىڭ ىندەتتەن ساقتانۋ-تىزگىندەۋ ساياساتى بويىنشا قاتاڭ باقىلاپ-تىزگىندەيمىز. حاۋىپ-قاتەرى تومەن جەرلەردەن كەلگەندەر شينجياڭداعى 7 كۇن ىشىندە نۋكلەين قىشقىلىن تەكسەرتكەن ناتيجەسىن كورسەتسە بولعانى، قايتالاي نۋكلەين قىشقىلىن تەكسەرتۋدىڭ قاجەتى جوق، پويەز بەكەتىنىڭ سىرتتان كىرۋدەن ساقتانۋ ’حاۋىپسىزدىك وتكەلىن‘ ويداعىداي يگەرىپ، ٴار ۇلت بۇقاراسىنىڭ جاڭا جىلدى حاۋىپسىز، الاڭسىز وتكىزۋىنە كەپىلدىك ەتەمىز“.

  بۇدان سىرت، كوكتەم مەرەكەسى تاسىمالى كەزىندە پويەزدىڭ حاۋىپسىز قاتىناۋىنا كەپىلدىك ەتۋ ٴۇشىن، ٴۇرىمجى تەمىر جول قوعام حاۋىپسىزدىگى مەكەمەسى كۇيتۇن تەمىر جول قوعام حاۋىپسىزدىگى باسقارماسىنىڭ التاي پويەز بەكەتى ساقشى بولىمشەسى حالىق ساقشىلارىن، جول قورعاۋ اترەتىنىڭ مۇشەلەرىن ۇيىمداستىرىپ، كوكتەم مەرەكەسى كەزىندەگى تاسىمالدىڭ تۇتاس كۇندىك جان-جاقتى قورعاۋ شاعىن اترەتىن قۇرىپ، ”ٴتۇيىندى ۋاقىت كەزەڭىن، ٴتۇيىندى اۋماقتى، ٴتۇيىندى ورىندى،ٴتۇيىندى ۇگىتتى، ٴتۇيىندى شارلاۋ-قورعانۋدى“ كورنەكتىلەندىرىپ، جەلى حاۋىپسىزدىگىن باسقارۋ-مەڭگەرۋ تەبىنىن كۇشەيتىپ، ”كوكتەم مەرەكەسى تاسىمالى“ جەلىسىن ورنىقتى مەڭگەرۋگە كەپىلدىك ەتتى.

جاۋاپتى رەداكتور: بەردىقان مۇراتقان ۇلى