نيە حايشىڭعا ”1 - دارەجەلى عارىش ۇلەسكەرى مەدالىن“ بەرۋ، ليۋ بوميڭگە ”2 - دارەجەلى عارىش ۇلەسكەرى مەدالىن“ بەرۋ، تاڭ حۇڭبوعا ”قاھارمان عارىشكەر“ داڭق اتاعىن بەرۋ جانە ”3 - دارەجەلى عارىش ۇلەسكەرى مەدالىن“ بەرۋ جونىندەگى قاۋلىسى

  جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ، ورتالىق اسكەري ىستەر كوميتەتىنىڭ

  نيە حايشىڭعا ”1 - دارەجەلى عارىش ۇلەسكەرى مەدالىن“ بەرۋ، ليۋ بوميڭگە ”2 - دارەجەلى عارىش ۇلەسكەرى مەدالىن“ بەرۋ، تاڭ حۇڭبوعا ”قاھارمان عارىشكەر“ داڭق اتاعىن بەرۋ جانە ”3 - دارەجەلى عارىش ۇلەسكەرى مەدالىن“ بەرۋ جونىندەگى قاۋلىسى

  (2021 - جىلى 11 - ايدىڭ 23 - كۇنى)

  2021 - جىلى 6 - ايدىڭ 17 - كۇنى ەلىمىز عارىشكەرلەرى نيە حايشىڭ، ليۋ بوميڭ، تاڭ حۇڭبو شىنجوۋ 12 - ءنومىرلى ادام الىپ ۇشاتىن الەم كەمەسىنە وتىرىپ عارىش كەڭىستىگىنە ءساتتى ۇشىپ، تيانحى وزەكتى بولمەسىنىڭ ءوز كۇشىمەن تەز قيلىسۋىن، ءتۇيىلىسۋىن ءساتتى ورىندادى، سونداي - اق ءبىر قىدىرۋ جاڭالىق اشۋ، سەرپىلىس جاساۋ سيپاتىنداعى عىلمي تاجىريبەلەر مەن كەڭىستىكتىك قولدانىلىم مىندەتتەرىن ورىستەتىپ، وربيتادا 3 اي تۇرىپ، 9 - ايدىڭ 17 - كۇنى ءساتتى تۇردە جەرگە ورالدى. شىنجوۋ 12 - ءنومىرلى ادام الىپ ۇشۋ مىندەتى عارىشقا ادام الىپ ۇشۋ ينجەنەرياسىنىڭ ”3 قاداممەن ءجۇرۋ“ ستراتەگيالىق نىساناسىن جۇزەگە اسىرۋداعى ايرىقشا ماڭىزدى ءبىر مىندەت بولىپ، جۇڭگولىقتار العاش رەت ءوزىنىڭ كەڭىستىك بەكەتىنە كىرىپ، ءبىرسىپىرا شەشۋشى، وزەكتى تەحنيكالاردا ماڭىزدى سەرپىلىسكە قول جەتكىزدى، بۇل جۇڭگو عارىش ىستەرىنىڭ جوعارى عىلىم - تەحنيكادا ءوز كۇشىنە سۇيەنۋدە، ءوزىن الۋەتتەندىرۋدە تىڭ قادام تاستاعاندىعىن، عىلىم - تەحنيكادا قۋاتتى ەل، عارىش ىستەرىندە قۋاتتى ەل قۇرۋدى جەدەلدەتۋدە ەڭ جاڭا جەتىستىككە قول جەتكىزگەندىگىن كورسەتەدى، ول ەلىمىزدىڭ جالپىلىق مەملەكەت قۋاتى مەن ۇلتتىڭ ۇيىسۋ قۋاتىن جوعارىلاتۋدا، بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن تاباندىلىقپەن العا باسۋعا، توقتاۋسىز كۇرەس جۇرگىزۋگە ىنتالاندىرۋدا، جاڭا داۋىردەگى جۇڭگوشا سوتسياليزم ىستەرىندە ۇزدىكسىز جاڭا جاعداي اشۋدا ماڭىزدى مانگە يە.

  شىنجوۋ 12 - ءنومىرلى عارىشقا ادام الىپ ۇشۋ مىندەتىنىڭ تولىق تابىستى بولۋىنا قالىڭ عىلىم - تەحنيكا قىزمەتكەرلەرىنىڭ، عارىشكەرلەردىڭ، كادر - قىزمەتكەرلەردىڭ، ازاتتىق ارميا كوماندير - جاۋىنگەرلەرىنىڭ اقىل - پاراساتى مەن جۇرەك قانى سىڭگەن. نيە حايشىڭ، ليۋ بوميڭ، تاڭ حۇڭبو جولداستار وسىلاردىڭ ۇزدىك ۋاكىلى، ولار بۇيرىقتى قالت جىبەرمەي ورىنداپ، وتاننىڭ ءۇمىتىن اقتاۋدى مۇرات ەتىپ، ماشاقات پەن قاتەردەن تايسالماي، ىنتىماقتاسا سەلبەسىپ، دۇنيە جۇزىنە قۇدىرەتتى جۇڭگو رۋحىن، جۇڭگو كۇشىن ايگىلەدى. نيە حايشىڭ جولداس 3 رەت عارىشقا ادام الىپ ۇشۋ مىندەتىن اتقارىپ، 2 رەت بۇيرىق بەرۋشى باستىق مىندەتىن ارقالاپ، وربيتادا 100 كۇن تۇرعان تۇڭعىش جۇڭگو عارىشكەرىنە اينالدى. ليۋ بوميڭ جولداس 10 نەشە جىلدى ءبىر كۇندەي وتكىزىپ، قاجىر - قايراتپەن تاباندىلىق كورسەتىپ، عارىشقا ۇشۋ ارمانىن 2 مارتە ورىندادى، وسى جولعى مىندەتتە 2 رەت كەمە بولمەسىنەن شىعىپ قيمىل جاسادى. تاڭ حۇڭبو جولداس تىڭعىلىقتى جاتتىعۋ جاساپ، قاجىرلىلىقپەن شىڭدالىپ، 2 - توپتاعى عارىشكەرلەر اراسىندا تۇڭعىش بولىپ كەمە بولمەسىنەن شىعىپ قيمىل جاسادى. ولاردىڭ ەلىمىزدىڭ عارىشقا ادام الىپ ۇشۋ ىستەرىنە قوسقان ەرەن ەڭبەگىن ماراپاتتاۋ ءۇشىن، جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى نيە حايشىڭ جولداسقا ”1 - دارەجەلى عارىش ۇلەسكەرى مەدالىن“ بەرۋدى، ليۋ بوميڭ جولداسقا ”2 - دارەجەلى عارىش ۇلەسكەرى مەدالىن“ بەرۋدى، تاڭ حۇڭبو جولداسقا ”قاھارمان عارىشكەر“ داڭق اتاعىن بەرۋدى جانە ”3 - دارەجەلى عارىش ۇلەسكەرى مەدالىن“ بەرۋدى ۇيعاردى.

  نيە حايشىڭ، ليۋ بوميڭ، تاڭ حۇڭبو جولداستار اۋەلگى ماقساتتى ۇمىتپاي، بورىشتى ەستە بەرىك ساقتاپ، اسقاق ىسكە ءوزىن ارناعان ءداۋىر اۆانگاردتارى، الەمدى زەرتتەۋدىڭ، عارىش كەڭىستىگى ارمانىنا قانات قاعۋدىڭ، عارىش ىستەرىندە قۋاتتى ەل قۇرۋدىڭ ونەگەلى ۇلگىلەرى. پارتيا ورتالىق كوميتەتى مىناعان ۇندەدى: بۇكىل پارتيا، بۇكىل ارميا، بۇكىل ەلدەگى ءار ۇلت حالقى ولاردى ونەگە ەتىپ، ولاردىڭ پارتيانى سۇيەتىن، وتاننىڭ ءۇمىتىن اقتايتىن، بورىشقا ادال بولعان باتىل سەنىمدەرىنەن ۇيرەنىپ، ولاردىڭ اۋىر مىندەتتى جۇرەكتىلىكپەن ارقالايتىن، جۇرەكتىلىكپەن بيىك شىڭعا شىعاتىن توڭكەرىستىك رۋحتارىنان ۇيرەنىپ، ولاردىڭ مۇراتىنان اينىمايتىن، ۇزدىك بولۋعا تالپىناتىن اسقاق قاسيەتىنەن ۇيرەنىپ، ولاردىڭ قاتاڭ دا ىجداعاتتى، كەمەلدىلىككە ۇمتىلاتىن ناقتى ستيلدەرىنەن ۇيرەنىپ، ىزدەنىس جاساۋعا، جەڭىسكە جەتۋگە باتىل بولىپ، وزىنە سەنىپ، ءوزىن الۋەتتەندىرىپ، تۋراشىلدىقتى ساقتاپ، جاڭالىق اشىپ، پارتيا مەن مەملەكەت ىستەرىنىڭ دامۋىنا اناعۇرلىم مول اقىل - پاراسات، اناعۇرلىم زور كۇش - قۋات ارناۋ كەرەك.

  ءبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، جۇڭگوشا سوتسياليزم ۇلى تۋىن بيىك ۇستاپ، پارتيا 19 - قۇرىلتايىنىڭ جانە 19 - كەزەكتى ورتالىق كوميتەتى ەكىنشى، ءۇشىنشى، ءتورتىنشى، بەسىنشى، التىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، ”ەكى بومبى، ءبىر جاساندى سەرىك“ رۋحىن جانە عارىشقا ادام الىپ ۇشۋ رۋحىن زور كۇشپەن اسقاقتاتىپ، قايراتتانا ىسكەرلىك كورسەتىپ، تىڭعىلىقتى قىزمەت ىستەپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ ءۇشىن قاجىماي - تالماي كۇرەس جۇرگىزەيىك!

  (شينحۋا اگەنتتىگىنىڭ 11 - ايدىڭ 23 - كۇنى بەيجيڭنەن بەرگەن حابارى)

جاۋاپتى رەداكتور: بەردىقان مۇراتقان ۇلى