كوفەمەن ارىقتايمىن دەپ كوزسىزدىكپەن دۇرمەككە ىلەسپەيىك

 جۋىردا كوپتەگەن توراپتاستار «شيڭكۇڭ ارىقتاتۋ كوفەسىن» تانىستىردى ءارى ونىڭ «ءونىمى كورنەكتى» دەپ ماقتادى، الايدا، تاعى ءبىر توپ توراپتاستار بۇل كوفەنى ىشكەننەن كەيىن شولىركەۋ، جۇرەگى اينۋ، جۇرەگى قىسىلۋ قاتارلى كەرى اسەر بەرگەنىن ايتقان. جىجياڭ ولكەسى سىشي قالاسىندا ءبىر ايەل بۇل كوفەنى ىشكەن سوڭ، جۇرەگىنىڭ سوعۋى تەزدەپ، قان قىسىمى كۇرت جوعارىلاپ، توتە ەمحاناعا جەتكىزىلگەن. جۋىردا جىجياڭ ولكەلىك ەسىرتكىگە تيىم سالۋ كوميتەتى كەڭسەسى: بۇل تۇردەگى كوفەنىڭ قۇرامىندا تيىم سالىنعان ءدارى — سيبۋترامين بار، بۇل كوفەنى ىشەمىن دەپ كوزسىزدىكپەن دۇرمەككە ىلەسۋگە بولمايدى، — دەپ ەسكەرتۋ جاريالادى.

 ارىقتاۋعا پايدالى دەلىنگەن اتالمىش ينتەرنەتتە تانىمالى كوفەگە مەملەكەت ايقىن تيىم سالعان قۇرامدى قوسقان بولىپ شىقتى، بۇلاي بولارىن كوپتەگەن تۇتىنۋشىلار ويلاماعان بولاتىن. ۇعىسۋعا قاراعاندا، سيبۋترامين — ورتالىق نەرۆتى تەجەيتىن ءدارى، ونىڭ ادامدى جەلپىندىرۋ، تابەتتى تەجەۋ رولى بار. مۇنداي ءدارىنى، ءسوزسىز، شيپاگەردىڭ كەڭەسىنە ساي پايدالانۋ ءارى مولشەرىن تەجەۋ كەرەك، ەگەر الباتى پايدالاناتىن بولسا ۇيقى قاشۋ، ءىش قاتۋ، قان قىسىمى جوعارىلاۋ، تىنىسى تارىلۋ، اسقازان – ىشەك قابىنۋى قاتارلى اۋرۋ بەلگىلەرىن تۋدىرادى.

 ءىس جۇزىندە، وسى تەكتەس ينتەرنەتتە تانىمالى ازىق – تۇلىكتەردە ماسەلەنىڭ بارلىعىنىڭ اشكەرەلەنۋى بۇل عانا ەمەس. بەلگىلى زاڭسىز توپ اتالمىش «ارىقتاتۋ كوفەسىنە» جوعارىداعىمەن ۇقساس تيىم سالىنعان ءدارى قوسقان ءارى سەنىمدى كاسىپورىننىڭ اتىندا وندىرگەن، ساتقان، بۇل دەلوعا قاتىستى قاراجات سوماسى 50 ميلليون يۋاننان اسقان. سونىمەن بىرگە، ءىشىنارا ارىقتاتۋ شايلارى، تاماق ورنىندا تۇتىناتىن تالقان قاتارلى ينتەرنەتتە تانىمالى ونىمدەردەن دە تيىم سالىنعان ءدارى قۇرامى انىقتالعان.

 ءبىر مەزگىلدەن بەرى، ءىشىنارا ينتەرنەت توپتارى، الەۋمەتتىك تەكشەلەر ءتۇرلى زاڭسىز تاۋارلار ساتىلاتىن باستى ورىنعا اينالدى، جوعارىدا ايتىلعان تيىم سالىنعان ءدارى قوسىلعان تانىمالى ازىق – تۇلىكتەردەن سىرت، ۋلى، زياندى زاتتار قوسىلعان بەزەنۋ بۇيىمدارى، زاقىمداعىش ويىنشىق قۇرالدار قاتارلىلار وسىنىڭ ىشىندە قامتىلادى. اشىق، جاريا ەلەكتروندى ساۋدا تەكشەلەرىمەن سالىستىرعاندا، ينتەرنەت توپتارى مەن الەۋمەتتىك تەكشەلەردە ۇگىتتەۋ، ساتۋ ارەكەتى ءبىرشاما تۇيىقتالعان كۇيدە بولادى، بۇل باقىلاۋ – باسقارۋعا بەلگىلى دەڭگەيدە قيىندىق تۋدىرادى، سونىمەن بىرگە، زاڭسىز تاۋارلاردى ساۋدالاۋعا دا قولايلىلىق تۋدىرادى.

 وسى تەكتەس جاعدايلار تيىم سالسا دا تولاستامادى، بۇل ينتەرنەتتەگى الەۋمەتتىك تەكشەلەردىڭ باسقارۋىنىڭ جەتەرسىز بولعانىن، قاتىستى تاراۋلاردىڭ باقىلاۋ – باسقارۋىنىڭ پارمەندى بولماعانىن، سونىمەن بىرگە، ءىشىنارا تۇتىنۋشىلاردىڭ كوزسىزدىكپەن دۇرمەككە ىلەسەتىنىن كورسەتەدى. بۇل ازىق – تۇلىك حاۋىپسىزدىگى جاعىندا تاعى دا دابىل قاقتى — ينتەرنەتتەگى ەلەكتروندى ساۋدا كۇن سايىن گۇلدەنىپ – كورگەيگەن قازىرگى جاعدايدا، ينتەرنەتتە ساتىلاتىن ازىق – تۇلىكتەرگە اناعۇرلىم كوپ ءونىمدى باقىلاۋ – باسقارۋ جۇرگىزۋ قاجەت. قاتىستى تاراۋلار تەكشەلەرگە باقىلاۋ – باسقارۋ جۇرگىزۋدى كۇشەيتۋى، زاڭسىز ساۋداگەرلەردى، تاۋارلاردى ءبىر – بىرلەپ تەكسەرۋ تەبىنى مەن جازالاۋ تەبىنىن كۇشەيتۋى، قىلمىس كۇمانىن قالىپتاستىرعانداردى زاڭ بويىنشا قاتىستى تاراۋلاردىڭ ءبىرجاقتى ەتۋىنە جوتكەپ بەرۋى قاجەت؛ تەكشەلەر باقىلاۋ جاۋاپكەرشىلىگىن سانالىلىقپەن اتقارىپ، تەحنيكالىق تاسىلدەردىڭ دارەجەسىن جوعارىلاتۋى، جاڭالاۋى، زاڭسىز ينتەرنەتتىك تاۋار ساۋداسىن ەرتە بايقاۋى، مۇلدە جول بەرمەۋى كەرەك. بارشا تۇتىنۋشىلار دا قىراعىلىقتى ارتتىرىپ، ينتەرنەتتە تانىمالى بۇيىمداردى تۇتىنۋدا ساق بولۋى، جالعان، جارامسىز تاۋارلاردى، ءتىپتى ۋلى، زياندى تاۋارلاردى ساتىپ الۋدان ساق بولۋى كەرەك.ازىق – تۇلىك حاۋىپسىزدىگىنە ساياتىن ىستەردىڭ بارلىعى ءىرى ءىس، ينتەرنەت تەكشەلەرى ازىق – تۇلىك حاۋىپسىزدىگىنە زيان جەتكىزەتىن ارەكەتتەرگە ءوسىپ – ءوربيتىن شارت – جاعداي ازىرلەمەۋى كەرەك. ينتەرنەت كەڭىستىگىن پاكتەندىرىپ، ازىق – تۇلىك حاۋىپسىزدىگىنىڭ تومەنگى شەگىن قاتاڭ ساقتاۋى كەرەك، قاتىستى ادامدار ءوزىنىڭ زاڭعا قايشى قىلمىستارىنا بوداۋ بەرۋى ءتيىس، ۇزاققا سوزىلاتىن بۇل شايقاستا، استە، بوساڭسۋعا بولمايدى.

جاۋاپتى رەداكتور: بەردىقان مۇراتقان ۇلى