بۋرىلتوعاي ەگىنشىلىك رايوندارىنداعى مال شارۋاشىلىعىن دامىتتى

 توعىسپالى مەديا ورتالىعىنىڭ ٴتىلشىسى ۋاڭ چي، ەرىكتى ٴتىلشى جۇلدىز حابارلايدى. پارتيا تاريحىن ۇيرەنۋ تاربيەسى باستالعاننان بەرى، بۋرىلتوعاي اۋدانى «بۇقارا ٴۇشىن ناقتى ىستەر ىستەيمىن» امالياتتىق قيمىلىمەن ۇشتاستىرىپ، ەگىنشىلىك رايوندارىنداعى مال شارۋاشىلىعىن دامىتۋ تەبىنىن ۇزدىكسىز ارتتىرىپ، قالىڭ ەگىنشى-مالشىلاردى مالدى قولدا باعۋدى دامىتۋعا بەلسەنە جەتەكتەپ، ەگىنشىلىك رايوندارىنداعى باعىمشىلىقتى دامىتۋ ۇلگىسىن قاراستىرىپ، ەگىنشىلىك رايوندارىندا باعىمشىلىقپەن اۋقاتتانۋ جولىن ۇزدىكسىز كەڭەيتىپ، ەگىنشى-مالشىلاردىڭ كىرىسىن ارتتىردى.بۋرىلتوعاي اۋدانى كوكاعاش اۋىلى ەسكقۇم قىستاعىنىڭ باعىمشىلىعىمەن شۇعىلداناتىن تۇرعىنى ما حايچياڭ حالىققا ٴتيىمدى ساياساتتاردىڭ سۇيەمەلدەۋىندە، باعىمشىلىق كولەمىن بىرتىندەپ كەڭەيتىپ، 10باس سيىرىن ءوسىرىپ، 100 باسقا جەتكىزدى. 11-ايدىڭ 10-كۇنى ما حايچياڭ تىلشىگە: ” باعىمداعى اسىلداندىرىلعان سيىردىڭ ەت بەرۋ مولشەرى 47 پايىزدان اسىپ، ٴبىر سيىردان تۇسەتىن پايدا 2000 دا 3000 يۋانعا جەتەدى“،ـ دەدى.

 تالاي جىلداردان بەرى، بۋرىلتوعاي اۋدانى ەگىنشىلىك رايوندارىندا مال باعۋدى ۇگىتتەۋ تەبىنىن ارتتىرۋمەن بىرگە، قالىڭ ەگىنشى-مالشى بۇقاراسىن زاپاس جەم ـ ٴشوپ ساقتاۋعا بەلسەنە جەتەكتەپ، اسىل تۇقىمدى سيىر ەنگىزىپ، مال ءناسىلىن اسىلداندىرىپ، عىلمي جەمدەۋدى دارىپتەپ، ەتتى سيىر، ساۋىن سيىر باعىمشىلىق كولەمىن ۇزدىكسىز كەڭەيتىپ، ەگىنشىلىك رايوندارىنداعى مال شارۋاشىلىعىنىڭ دامۋ اياق الىسىن جەدەلدەتىپ، اۋىل ـ قىستاقتاردىڭ گۇلدەنۋى مەن مال شارۋاشىلىعىنىڭ دامۋىنا بەرىك نەگىز قالادى. بۋرىلتوعاي اۋدانى كوكاعاش اۋىلىنىڭ باستىعى ۋاڭ يلين بىلاي دەدى : ”بۇدان كەيىن ٴبىز سيىر جانە ٴسۇت شارۋاشىلىعى جاعىندا 1-، 2-، 3-كاسىپتەردىڭ توعىسپالى دامۋى جونىندە بەلسەنە ىزدەنىس جاساپ، ەگىن، مال شارۋاشىلىق ونىمدەرىنىڭ قوسىمشا قۇنىن جوعارىلاتىپ، ەگىنشى، مالشىلاردىڭ كىرىسىن ارتتىرىپ، اۋقاتتانۋ ارناسىن ۇزدىكسىز كەڭەيتەمىز“.

 سوڭعى 5 جىلدان بەرى، بۋرىلتوعاي اۋدانى 5 مىڭ 200 باس اسىل تۇقىمدى سيىر ەنگىزىپ، اسىلداندىرىلعان سيىر سانىن 85 مىڭ 100 باسقا جەتكىزىپ، ەگىنشىلىك رايوندارىندا جيىنى 110 مىڭ باس سيىر باقتى. 2021-جىلى، ەگىنشىلىك رايوندارىنداعى 1500 وتباسى باعىمشىلىقپەن شۇعىلداندى، مەجەمەن، جىل سوڭىندا قولدا بار مال 450 مىڭ باسقا ( تۇياق ) جەتەدى ەكەن.

  اۋدارعان جانە جاۋاپتى رەداكتور: مەيرامگۇل مۇسىنات قىزى

جاۋاپتى رەداكتور: بەردىقان مۇراتقان ۇلى