قورعاس ەكونوميكالىق اشۋ رايونىنىڭ (قالاسى) ساۋداگەر شاقىرۋ، تانىستىرۋ ماجىلىسىنەن قۋانىشتى حابار جەتتى

  جالپى 7 ميلليارد 700 ميلليون يۋان قارجى قوسۋ كەلىسىمىنە قول قويىلدى

 ەرىكتى ٴتىلشى ۋاڭ جىنيۇي حابارلايدى. 10 ـ ايدىڭ 26 ـ كۇنى قورعاس ەكونوميكالىق اشۋ رايونىنىڭ (قالاسى) ساۋداگەر شاقىرۋ، تانىستىرۋ ٴماجىلىسى جانە نىسانعا قول قويۋ سالتى شىنجىن قالاسىندا وتكىزىلدى، 11 نىسانعا ناق مايداندا قول قويىلىپ، جالپى قارجى قوسۋ مولشەرى 7 ميلليارد 700 ميلليون يۋان بولدى.

 قورعاس قالاسىنان بەينە ەكران فورماسىمەن ماجىلىسكە قاتىناسقان قورعاس ەكونوميكالىق اشۋ رايونى پارتيا قىزمەتى كوميتەتىنىڭ ورىنباسار شۋجيى، باسقارۋ كوميتەتىنىڭ ورىنباسار مەڭگەرۋشىسى، قالالىق پارتكومنىڭ ورىنباسار شۋجيى، قالالىق ۇكىمەت پارتگرۋپپاسىنىڭ شۋجيى، قالا باستىعى جالىن نۇرحاميت ۇلى بىلاي دەدى: «قورعاس قالالىق پارتكوم، ۇكىمەت قارجى قوسۋشىلار ٴۇشىن وي جۇگىرتۋ، قارجى قوسۋشىلارعا پايدا جەتكىزۋ، قارجى قوسۋشىلاردىڭ تابىسقا جەتۋىن جەبەۋ» نەگىزگى ماقساتىن باستان ـ اياق ۇستانىپ، بارىنشا ادال بولۋ، بارىنشا قۇلشىنۋ جانە اناعۇرلىم اشىق ساياسات ارقىلى ٴتۇرلى نىساننىڭ ٴساتتى ىلگەرىلەۋىنە بىرەگەي ورتا ازىرلەپ، قالتقىسىز قىزمەت وتەپ، كاسىپورىنداردىڭ قورعاسقا ىرگە تەۋىپ، اقاۋسىز دامۋىنا قولداۋ كورسەتتى.

 قورعاس ساۋداگەر شاقىرۋ مەكەمەسى (توبى) شەكتى سەرىكتەستىگىنىڭ باس ديرەكتورى سۇڭ گوچياڭ ورىن ابزالدىلىعى، ساياسات ابزالدىلىعى، ەسىك اشۋ ابزالدىلىعى جانە ساۋدا ورتاسى سياقتى جاقتاردان قورعاستىڭ جالپى تۇلعالىق دامۋىن تانىستىردى. شىنجىن قالاسى شىڭتاي زەردەلى قۇراستىرۋ شەكتى سەرىكتەستىگى پىكىر اۋىستىرىپ، ٴسوز سويلەدى.

 ۇعىسۋعا قاراعاندا، شىنجىن قالاسى شىڭتاي زەردەلى قۇراستىرۋ شەكتى سەرىكتەستىگى زەردەلى قۇلتەمىر، اۆتوماتتاندىرۋ جابدىعى، تۇرعىن ۇيدە قولدانىلاتىن زەردەلى كورۋ تۇيسىگى جابدىعى سياقتىلاردى دەربەس زەرتتەپ اشۋعا، وندىرۋگە، ساتۋعا دەن قويىپ، قازىرگە دەيىن 133 ٴتۇرلى تاپقىرلىق پاتەنتىنە، قولدانىلمالى جاڭا ٴتيپ پاتەنتىنە سونداي - اق جۇمساق بولشەك اۆتورلىق ۇقىعىنا يە بولىپتى.

 اتالعان سەرىكتەستىكتىڭ باس جوراسى لۋ يۇيميڭ: «سەرىكتەستىگىمىزدىڭ قورعاس قالاسىنا ىرگە تەبۋدى تاڭداۋىنىڭ سەبەبى، ەڭ اۋەلى، ٴتۇرلى ٴتيىمدى ساياساتتاردىڭ جالعاستى اتقارىلۋى جانە تاماشا تيجارات ـ ساۋدا ورتاسى، ونان قالسا، قورعاستىڭ ورىن ابزالدىلىعى. قورعاس ورتا ازيامەن ىرگەلەس بولعاندىقتان، كەڭ تۇتىنۋ بازارى بار. قورعاسقا قارجى قوسۋعا سەنىمىمىز كامىل، تاياۋدا قىزمەتكەرلەردى ۇيىمداستىرىپ، قورعاستا قاتىستى قىزمەتتەردى ورىستەتەمىز» دەدى.

  جاقىنعى جىلداردان بەرى قورعاس قالاسى دامۋ ورايىن مىقتى يگەرىپ، ورىن، ساياسات، ەسىك اشۋ ابزالدىلىعىن تولىق ساۋلەلەندىرىپ، ەل ٴىشى، حالىقارا سىندى 2 ٴتۇرلى بايلىقپەن، 2 بازارمەن ۇشتاستىرىپ، تۇلعالىق ەكونوميكانى دامىتۋدى نەگىزگى قامال الۋ باعىتى، يمپورت ـ ەكسپورت ساۋداسىن، وڭدەۋ ساۋداسىن ٴتۇيىن ەتىپ، ەلەكتروندىق ينفورماتسيا، جاڭا ماتەريالداردى مانەرلەۋ، جابدىق جاساۋ، اۋىل شارۋاشىلىق قوسىمشا ونىمدەرىن جىنتىكتەي مانەرلەۋ، بيولوگيالىق ٴدارى ـ دارمەك جانە سالاماتتىق سياقتى ابزال كاسىپتەردى كۇش سالا قالىپتاستىرىپ، جول ەكونوميكاسىنىڭ وتكەل ەكونوميكاسىنا، كاسىپ ەكونوميكاسىنا قاراي بۇرىلىس جاساۋىن بارىنشا ىلگەرىلەتكەن.

  وسى رەتكى تانىستىرۋ ٴماجىلىسى جانە نىسانعا قول قويۋ سالتى قورعاستىڭ ەلەكتروندىق ينفورماتسيا كاسىبىنىڭ جەدەل دامۋىن جەبەپ، كاسىپ شوعىرىن قۇرۋعا بەرىك نەگىز قالايدى.

جاۋاپتى رەداكتور: بەردىقان مۇراتقان ۇلى