اتقا ءمىنۋ التاي قالاسىنىڭ قىسقى دەنە تاربيە ساباعىنا ەنگىزىلدى

  ءوز ٴتىلشىمىز دۇڭ شىجۇي حابارلايدى. 10-ايدىڭ 20-كۇنى، ٴتىلشى التاي قالاسىنىڭ التىن قان جىلقى فەرماسىنىڭ قۇرىلىس مايدانىنان، كورمە الاڭىنىڭ نەگىزگى تۇلعاسىنىڭ سالىنىپ بولعانىن، قازىر جالپى قۇرىلىس مولشەرىنىڭ 95 پايىزى ورىندالىپ، جۇمىسشىلاردىڭ قاربالاس جۇمىس ىستەپ جاتقانىن كوردى.

  وسى بولمە ىشىندەگى مايداننىڭ جالپى قۇرىلىس كولەمى شامامەن 1500 شارشى مەتر بولىپ، توڭىرەگىندەگى مىنبەلەر مەن راشەتكالار ورناتىلىپ بولعان، ٴبىر ۋاقىتتا 30 وقۋشىعا ات ءمىنۋ ونەرى ساباعىن وتۋگە بولادى. التاي قالاسى 2019-جىلى ” 10 مىڭ جاس وسپىرىمگە اتقا ءمىنۋدى ۇيرەتۋ“ ەرەكشە دەنە تاربيە ساباعىن ٴساتتى باستاعاننان قازىرگە دەيىن، اتقا ٴمىنۋ دەنە تاربيە ساباعىنان 8500 ساعاتتىق ساباق وتىلگەن.

  التاي قالالىق 1-مال فەرماسى التاي ايماعىنىڭ ٴداستۇرلى جىلقى باعاتىن رايونى، ول جىلقى مادەنيەتىنىڭ قويۋ استارى مەن كەڭ بۇقارالىق نەگىزىنە يە ، ”10 مىڭ جاس وسپىرىمگە ات ءمىنۋدى ۇيرەتۋ“ ەرەكشە دەنە تاربيە ساباعىن باستاۋ وقۋشىلاردىڭ قايسارلىعى مەن باتىلدىعىنا ەرەكشە سەپتىگىن تيگىزىپ، جەرگىلىكتى ورىننىڭ ەرەكشە ات ونەرى مادەنيەتىنە ويداعىداي مۇراگەرلىك ەتتى.

  التاي قالالىق 1-فەرما التىن قان جىلقى فەرماسىنىڭ جاۋاپتىسى جوۋ يۇڭ بىلاي دەپ تانىستىردى : ”التاي قالاسىنداعى ورتا، باستاۋىش مەكتەپ وقۋشىلارىنىڭ ٴبىر جىلدىڭ ٴتورت ماۋسىمىندا اتقا ٴمىنۋ سىندى ەرەكشە دەنە تاربيە ساباعىنان يگىلىكتەنۋىنە مۇمكىندىك جاساۋ ٴۇشىن، جيلين ولكەسى شينجياڭعا 2 ميلليون 600 مىڭ يۋان قارجى قوسىپ، التاي قالاسىندا التىن قان جىلقى فەرماسىن قۇرىپ، ٴتورت ماۋسىمدا ات ونەرى ساباعى ءوتىلىپ، التاي قالاسىنداعى ورتا، باستاۋىش مەكتەپ وقۋشىلارىنىڭ قىسقى دەنە تاربيە ساباعى مازمۇنىن ونان ارى بايىتىپ، قىستا شاڭعى تەبۋمەن بىرگە ،اتقا مىنۋگە بولاتىن بولدى“.

  بولمە ىشىندەگى اتقا ءمىنۋ مايدانى سالىنعاننان كەيىن، التاي قالاسىنىڭ التىن قان جىلقى فەرماسىنداعى وقىتۋ ورنى بولمە ىشىندە وقىتۋ جانە سىرتتا وقىتۋ بولىپ بولىنەدى، ٴبىر جىلدىڭ ٴتورت ماۋسىمىندا لايىقتى ورىنعا بارىپ جاتتىعۋ جۇرگىزۋگە بولادى، بولمە ٴىشى مايدانى شىلىڭگىر ىستىقتا، قاقاعان ايازدا وقىتۋعا پايدالى بولىپ، سىرتتا ەركىن شاپقىلاۋعا بولادى، ٴار كۇنى 200 وقۋشىعا ات ونەرى ساباعىن ۇيرەتىپ، ٴبىر جارىم جىلدا التاي قالاسىنداعى 18 مىڭ ورتا، باستاۋىش مەكتەپ وقۋشىلارى اتقا ءمىنۋ ونەرى ساباعىن وقي الادى.

  ” بۇل ارادان بالالار جىلقى تۇلىگىن تانۋ، تۇسىنۋدەن تارتىپ، اتقا ءمىنۋ ونەرىن ۇيرەنەدى، ٴبىر جىلدىڭ ٴتورت ماۋسىمىندا اتقا ءمىنۋ ونەرى ساباعى ارقىلى بالالاردىڭ دەنە قۋاتىن اناعۇرلىم كۇشەيتىپ، مىنەز ـ قۇلقى مەن جىگەرىن اناعۇرلىم بەكەمدەيمىز“، ـ دەدى جوۋ يۇڭ.

  اۋدارعان: جانار قاناپيا قىزى

جاۋاپتى رەداكتور: قارلىعاش ءماۋلىت قىزى