التاي سپورتشىلارى تاماشا ناتيجەگە قول جەتكىزدى

  التاي گازەتىنىڭ جالپىلىق اقپارات قۇرالدارى ءتىلشىسى حۋجۇنشيۋ حابارلايدى. 14-كەزەكتى مەملەكەتتىك سپورت جارىسى 9-ايدىڭ 27-كۇنى شي-ان قالاسىندا تابىستى اياقتادى. ەل ىشىندەگى ەڭ جوعارى دەڭگەيدەگى ۋنيۆەرسال دەنەتاربيە جينالىسىنا بۇكىل ەلدەگى جوعارى دەڭگەيدەگى سپورتشىلار قاتىناستى. التاي ايماعى تاربيەلەگەن سپورتشىلار شينجياڭعا ۋاكىل بولىپ جارىسقا قاتىناسىپ، ءبىر التىن، 2 كۇمىس مەدالعا يە بولۋداي تاماشا ناتيجەگە قول جەتكىزدى.

  9-ايدىڭ 21-كۇنى التايلىق بوكسشى توقتاربەك تاڭاتقان ۇلى 14-كەزەكتى مەملەكەتتىك سپورت جارىسى بوكس ءتۇرىنىڭ ەرلەر 75 كيلوگرامدىق سالماقتاعىلار باسەكەسىندە 5:0 ۇپايلىق ناتيجەمەن بەيجيڭ كومانداسىنداعى ۇلپار قارقىن ۇلىن جەڭىپ باس جۇلدەنى جەڭىپ الىپ، شينجياڭعا ءبىر التىن مەدال، التايعا داڭق اپەردى. 14-كەزەكتى مەملەكەتتىك سپورت جارىسىنىڭ ەركىن كۇرەس ءتۇرىنىڭ ەرلەر 74 كيلوگرامدىق جارىسىندا شينجياڭدىق 19 جاستاعى سپورتشى جانبوتا جەكەن ۇلى وتكەلدەن سۇرىنبەي ءوتىپ، شەشۋشى جارىسقا قاتىناسىپ، كۇمىس مەدالعا يە بولدى. التاي سپورتشىسى قاستەر ورمان ۇلى (نەگىزگى كۇش)، تالعار ادىلبەك ۇلى 14-كەزەكتى مەملەكەتتىك سپورت جارىسىنىڭ 20U ەرلەر فۋتبول جارىسىنا شينجياڭ اتىنان قاتىناسىپ، كۇمىس مەدالعا يە بولىپ، تاماشا ناتيجەگە قول جەتكىزدى.

  ءتىلشى مىنانى ۇعىستى: وسى جولى شينجياڭ كومانداسىنان 14-كەزەكتى مەملەكەتتىك سپورت جارىسىنا قاتىناسقان سپورتشىلاردىڭ 9 ى التاي ايماعىنان بارعان، جەكە-جەكە بوكس، كۇرەس، فۋتبول قاتارلى جارىس تۇرلەرىنە قاتىناسىپ، باسىم كوبىنەن جاقسى ناتيجەگە قول جەتكىزىپ، التاي سپورتشىلارىنىڭ بەلسەنە العا باسۋداي، ءوزىن الۋەتتەندىرۋدەي، ەرلىكپەن كۇرەس جۇرگىزۋدەي رۋحاني بەت-بەينەسى مەن وتان ءۇشىن داڭق اپەرۋدەي، شينجياڭ ءۇشىن ەڭبەك كورسەتۋدەي بەرىك سەنىمىن ايگىلەگەن.

  جۋىق جىلداردان بەرى، التاي ايماعى باس شۋجي شي جينپيڭنىڭ ”قار-مۇزدىڭ ءوزى اسىل قازىنا“ نۇسقاۋى رۋحى مەن ”كۇللى جۇرت قار-مۇز سپورتىنا ات سالىسۋ“ ۇندەۋىن امالياتتا ايگىلەپ، ”قار-مۇز سپورتى، فۋتبول، كۇرەس، بوكس، جەڭىل اتلەتيكا، از ۇلتتاردىڭ ءداستۇرلى دەنەتاربيەسى“ نەگىزگى قامال الار بەتالىس ەتىپ، باسەكە دەڭگەيىن قۇلشىنا جوعارىلاتىپ، دەنەتاربيە ىستەرىن باياندى دامىتتى. سوڭعى جىلداردان بەرى، مەملەكەتكە دالالىق قار شاڭعى، مۇزدا تەز سىرعاناۋ قاتارلى نىساندارداعى ۇزدىك سپورتشىدان 17 سىن، اۆتونوميالى رايونعا مۇزدا تەز سىرعاناۋ، دالالىق قار شاڭعى، تاۋ شاڭعى، فۋتبول، كۇرەس، بوكس، جەڭىل اتلەتيكا قاتارلى نىساندارداعى ۇزدىك سپورتشىلاردان 46 سىن تاربيەلەپ بەردى.

  بيىل ايماقتىق مادەنيەت-دەنەتاربيە، راديو-تەلەۆيزيا جانە ساياحات مەكەمەسى مەملەكەتتىك ادام كۇشى جانە قوعامدىق قامتاماسىزداندىرۋ مينيسترلىگى، مەملەكەتتىك دەنەتاربيە باس مەكەمەسى جاعىنان مەملەكەتتىك دەنەتاربيە سالاسىنداعى وزات كوللەكتيۆ، مەملەكەتتىك دەنەتاربيە باس مەكەمەسى جاعىنان 2017-جىلدان 2020-جىلعا دەيىنگى مەملەكەتتىك بۇقارالىق دەنەتاربيەدەگى وزات ورىن بولىپ باعالاندى.

جاۋاپتى رەداكتور: قارلىعاش ءماۋلىت قىزى