شينجياڭعا باعىتتامالى كومەكتەسۋ التايعا مول رىزدىق اكەلدى

حيلۇڭجياڭ (التاي) ءتۇيىندى كاسىپ جاعىندا سەلبەستىك جاساۋ تاجىريبە الماستىرۋ ءماجىلىسى التايدا اشىلدى

  التاي گازەتىنىڭ جالپىلىق اقپارات قۇرالدارى ءتىلشىسى حۋ جۇنشيۋ حابارلايدى. 7-ايدىڭ 14-كۇنى التاي ايماقتىق اكىمشىلىك مەكەمەسى، حيلۇڭجياڭ ولكەلىك ونەركاسىپ جانە ينفورماتسيالاندىرۋ مەڭگەرمەسى، بيڭتۋان 10-شى بىرلىكتە حيلۇڭجياڭ (التاي) ءتۇيىندى كاسىپ جاعىندا سەلبەستىك جاساۋ تاجىريبە الماستىرۋ ءماجىلىسى التاي كاسىپ اشىپ، جاڭالىق جاراتۋ بازاسىندا اشىلدى. حيلۇڭجياڭ ولكەلىك ونەركاسىپ جانە ينفورماتسيالاندىرۋ مەڭگەرمەسىنىڭ ورىنباسار باستىعى لي حۇڭبيڭ ولكەدەگى قاتىستى 13 ءتۇيىندى كاسىپورىننىڭ ۋاكىلدەرىن باستاپ ماجىلىسكە قاتىناستى ءارى باعىتتامالى كومەكتەسەتىن التاي ايماعىنداعى، بيڭتۋان 10-شىسىنداعى قاتىستى ءتۇيىندى كاسىپورىندارمەن تاجىريبە الماستىردى. ەكى جاق ازىق-تۇلىك مانەرلەۋ، جۇڭگوشا ءشوپ ءدارى زەرتتەۋ، جابدىق جاساۋ، ينفورماتسيالاندىرۋ، ساۋدا قاتارلى سالالاردا سەلبەستىك جاساۋ كەلىسىمىنە قول قويىستى.

  التاي ايماقتىق پارتكومنىڭ ورىنباسار شۋجيى، حيلۇڭجياڭ ولكەسىنىڭ شينجياڭعا كومەكتەسۋ قىزمەتىنىڭ الدىڭعى شەپ قولباسشىلىق شتابىنىڭ باس قولباسشىسى گۋان ۋي مىنالاردى اتاپ كورسەتتى: 10 نەشە جىلدىق شينجياڭعا باعىتتامالى كومەكتەسۋ بارىسىندا حيلۇڭجياڭ ولكەسى التاي ايماعىمەن تەرەڭ دوستىق قاتىناس ورناتتى. ەكى جەردەگى كاسىپورىنشىلار بۇل رەتكى تاجىريبە الماستىرۋ ورايىن مىقتى يگەرىپ، سەلبەستىكتى اناعۇرلىم كۇشەيتىپ، ەكى جەردىڭ بايلىق ابزالدىلىعىن رەتكە سالىپ بىرىكتىرىپ، كۇش-قۋاتتى ۇيىستىرىپ، ورتاق يگىلىكتەنۋدى جۇزەگە اسىرادى.

  لي حۇڭبيڭ بىلاي دەدى: بۇل رەت ۇيىرمە باستاپ التايعا كەلىپ، ”مىڭ شاقىرىمدىق ساياحات كاريدورىنداعى“ تابيعاتتىڭ كوركەم كورىنىسىن ءوز كوزىممەن كورىپ، ساحارا مادەنيەتىنىڭ وزگەشە تارتىمدىلىعىن شىنايى سەزىنىپ، سۇبەلى دامۋ تابىستارىنا كۋا بولىپ، تەرەڭ شابىت الدىم. كوپ جىلداردان بەرى، حيلۇڭجياڭ ولكەلىك ونەركاسىپ جانە ينفورماتسيالاندىرۋ مەڭگەرمەسى التاي ايماقتىق ونەركاسىپ جانە ينفورماتسيالاندىرۋ مەكەمەسىمەن، حيلۇڭجياڭ ولكەسىنىڭ شينجياڭعا كومەكتەسۋ قىزمەتىنىڭ الدىڭعى شەپ قولباسشىلىق شتابىمەن تىعىز قىزمەت قاتىناسىن ساقتاپ، ەكى جەردەگى كاسىپورىن ءۇشىن تەكشە قۇردى. وسى رەتكى حيلۇڭجياڭ ولكەسىنىڭ كاسىپورىن ۋاكىلدەرى مەن ينفورماتسيالاندىرۋ ماماندارىن التايعا كەلىپ تاجىريبە الماستىرۋعا ۇيىمداستىرىپ، التايدىڭ ءسۇت ونىمدەرى، جابدىق جاساۋ كاسىبىن دامىتۋ، ازىق-تۇلىك مانەرلەۋ، ساۋدا اينالىمى، سونداي-اق ينفورماتسيالاندىرۋ دارىندىلارىنىڭ تاجىريبە الماستىرۋ كۋرسى قاتارلى قىزمەتتەر جونىندە ۇسىنىستارىن ورتاعا قويدى ءارى ىشكەرىلەي تاجىريبە الماستىردى.

  بۋىرشىن اۋدانىنداعى نوگان شەكتى جارنا سەرىكتەستىگىنىڭ باس ديرەكتورى گو حۇڭلياڭ بىلاي دەدى: حيلۇڭجياڭ ولكەسىندەگى كاسىپورىندارىمەن سەلبەستىك جاساسقانىمىزدى داڭق سانايمىز، مىنە، بۇل ونىمدەرىمىزدىڭ حيلۇڭجياڭ جانە ىشكى ولكەلەردەگى بازارعا تەز قارقىنمەن كىرۋىنە جول اشتى.ايماقتىق اكىمشىلىك مەكەمەسىنىڭ جاۋاپتى ورىنباسار ءۋاليى، بيڭتۋان 10-شىسىنىڭ جاۋاپتى باسشىسى، ايماققا توتە قاراستى قاتىستى تاراۋلاردىڭ جاۋاپتىلارى، ايماعىمىزداعى ءارقايسى اۋدانداردىڭ (قالانىڭ، كورىنىس رايونداردىڭ) جاۋاپتى باسشىلارى، قاتىستى ءتۇيىندى كاسىپورىنداردىڭ ۋاكىلىنەن 100 گە جۋىق ادام ماجىلىسكە قاتىناستى. ماجىلىستەن كەيىن حيلۇڭجياڭ ولكەسىنىڭ كاسىپورىنشىلارى التاي قالاسى، بۋرىلتوعاي، كوكتوعاي اۋدانىنداعى قاتىستى ءتۇيىندى كاسىپورىندارعا تەكسەرۋ جۇرگىزدى.

جاۋاپتى رەداكتور: ءاننا اكىمقان قىزى