جەمەنەي اۋدانى كوكتەمدەگى تۇڭعىش توپتاعى 100 ادامدىق ساياحات ۇيرمەسىن قارسى الدى

  التاي گازەتىنىڭ جالپىلىق اقپارات قۇرالدارى ءتىلشىسى گۇلناز حابارلايدى.

  ــ جەمەنەي، راسىندا، كوركەم ەكەن. ۇلى تابيعاتتىڭ شەبەرلىگى بەينەلەنگەن قويتاستىڭ ايبىندى اسەم كورىنىسى ادامدى ەرىكسىز باۋراسا، بۇل جەردىڭ شەكارانى قورعاۋ رۋحىدا ءبىزدى ەرەكشە اسەرلەندىردى، ساپارىمىزدىڭ ءمانى وزگەشە بولدى،-دەدى 4-ايدىڭ 5-كۇنى حىبەي ولكەسىنەن كەلگەن ساياحاتشى گىڭ رۇڭگو.

  4-ايدىڭ 3-كۇنى جەمەنەي اۋدانى حىبەي، حىنان، سىچۋان، حيلۇڭجياڭ قاتارلى جەرلەردەن كەلگەن كوكتەمگى تۇڭعىش توپتاعى 100 ادامدىق ساياحات ۇيىرمەسىن قارسى الدى. ساياحاتشىلار قويتاس كورىنىس رايونىن، جەمەنەي شەكارا وتكەلىن ساياحاتتاپ، جەمەنەي اۋدانىنىڭ تابيعات كورىنىسىنەن لاززاتتانۋمەن بىرگە، مەملەكەت قاقپاسى الدىندا شەكارا وتكەلىنىڭ 100 جىلدىق ساۋدا تاريحىن ءتۇسىنىپ، شەكارا قورعاۋ مادەنيەتىن سەزىندى، سونداي-اق جەمەنەي اۋدانىنداعى باي يۇيشۋ قارتتىڭ ءومىر بويى شەكارا قورعاعان اسەرلى ىزگى ىستەرىن تىڭداپ، وتانشىلدىق تاربيە قابىلدادى.

  وسى توپتاعى ساياحات ۇيىرمەسىن باستاپ جۇرگەن شينجياڭ ارمان ساپارى ساياحات ورنىنىڭ ۇيىرمە باستاۋشىسى دۇڭ گى تىلشىگە بىلاي دەدى: وسى رەتكى ساپاردا قويتاس كورىنىس رايونى ساياحاتشىلاردىڭ القاۋىنا بولەنىپ، كوركەم كورىنىستەر ساياحاتشىلارعا تەرەڭ اسەر قالدىردى، اسىرەسە، مەملەكەت قاقپاسىنداعى وتانشىلدىق تاربيە ساياحاتشىلاردى قاتتى تەبىرەنتتى.

  جەمەنەي اۋداندىق مادەنيەت-دەنەتاربيە، راديو-تەلەۆيزيا جانە ساياحات مەكەمەسى مادەنيەت-ساياحات كاسىبىن دامىتۋ ورتالىعىنىڭ ورىنباسار مەڭگەرۋشىسى ليۋ شۋرۇڭ بىلاي دەدى: جەمەنەي اۋدانىنىڭ ساياحات ۇگىت تەبىنىن ۇزدىكسىز ارتتىرۋىنا ىلەسە، جاقىننان بەرى جەمەنەي اۋدانىنىڭ ساياحات لەنياسىن ۇعىسقان ساياحات ورىندارى، ءوز كولىگىمەن ساياحاتتايتىن كلۋبتار كوبەيدى. العاشقى مەجەگە قاراعاندا، 4-ايدا 30 توپقا جۋىق سىرت جەرلەردەن كەلەتىن 2000 ساياحاتشى جەمەنەي اۋدانىنا كەلىپ ساياحاتتايدى.

  ۇعىسۋعا قاراعاندا، جەمەنەي اۋدانى 100 جىلدىق شەكارا وتكەلى ــ جەمەنەي شەكارا وتكەلىن، مەملەكەتتىك A4 دارەجەلى كورىنىس رايونى قويتاس كورىنىس رايونىن نەگىز ەتىپ، جەمەنەي اۋدانىندا 2 كۇندىك سارا ساياحات لەنياسىن جولعا قويعان. شينجياڭ ارمان ساپارى، شينجياڭ قارعالداعى، ءۇرىمجى قالالىق قول ۇستاسىپ مەملەكەتتى ساپارلاۋ، قارامايلى ناروركەش ساياحات ورنى جانە التايعا ساپار، قىزىل جاھۇت قاتارلى كوپتەگەن ساياحات ورىندارى جەمەنەي اۋدانىنداعى 2 كۇندىك ساياحاتتاۋ لەنياسىن وزدەرىنىڭ داعدىلى لەنياسىنا كىرگىزىپ ۇگىتتەپ تانىستىرادى.

  تانىستىرۋعا قاراعاندا، 2021-جىلى جەمەنەي اۋدانى قويتاس كورىنىس رايونىنىڭ نەگىزدىك قۇرىلعىلارىن، توستى اۋىلىنداعى حالىقتىق قونالقى قۇرىلىسىن جانە جەڭىل ونەركاسىپ تاۋارلارى بازارىن، تۇسەلحانا، ەرەكشە ساۋدا كوشە قۇرىلىسىن جەدەلدەتىپ، ساياحاتتا ساۋداگەر شاقىرىپ، قارجى ەنگىزۋ تەبىنىن كۇشەيتىپ، ەرەكشە ماركالى اس-سۋ جانە ەرەكشە ساياحات ەستەلىك بۇيىمدارىن جەدەل جاراتۋمەن بىرگە، ساياحات كاسىبىمەن شۇعىلدانۋشىلاردى تاربيەلەۋ تەبىنىن كۇشەيتىپ، ساياحاتشىلارعا ساپالى ساياحات ورتاسىن جاراتىپ، شينجياڭنىڭ ءىشى-سىرتىنداعى ساياحاتشىلاردىڭ جەمەنەي اۋدانىندا ساپارىنىڭ كوڭىلدى بولۋىنا كەپىلدىك ەتەدى ەكەن.

جاۋاپتى رەداكتور: ءاننا اكىمقان قىزى