مەملەكەتتىك كەڭەستىڭ اقپارات كەڭسەسى «ادامزاتتىڭ كەدەيلىكتى ازايتۋىنداعى جۇڭگو امالياتى» اق تىستى كىتابىن جاريالادى

  شينحۋا اگەنتتىگىنىڭ 4 - ايدىڭ 6 - كۇنى بەيجيڭنەن بەرگەن حابارى (تىلشىلەر حوۋ شۋەجيڭ، حۋ لۋ). مەملەكەتتىك كەڭەس اقپارات كەڭسەسى 4 - ايدىڭ 6 - كۇنى «ادامزاتتىڭ كەدەيلىكتى ازايتۋىنداعى جۇڭگو امالياتى» اق تىستى كىتابىن جاريالادى.

  اق تىستى كىتاپ 100 جىلدان بەرى جۇڭگو كوممۋنيستىك پارتياسىنىڭ حالىقتى ىنتىماقتاستىرىپ، باستاپ، كەدەيلىكپەن كۇرەس جۇرگىزگەن، اسىرەسە، پارتيا 18 - قۇرىلتايىنان بەرى باس شۋجي شي جينپيڭنىڭ ءوزى قولباسشىلىق ەتىپ، ءوزى ورنالاستىرۋ جاساپ، ءوزى شايقاستى قاداعالاپ، بۇكىل پارتيانىڭ، بۇكىل ەلدىڭ، بۇكىل قوعامنىڭ كۇشىن جۇمىلدىرىپ كەدەيلىكتەن ارىلتۋدان قامال الۋ شايقاسىنىڭ جەڭىسىنە جەتكەن ءدۇبىرلى دە ايبىندى ۇلى بارىسىنا جان - جاقتىلى شولۋ جاساپ، جۇڭگونىڭ كەدەيلىكتى ازايتۋ ءىسىنىڭ دامۋ جەتىستىكتەرى مەن دۇنيە جۇزىنە قوسقان ۇلەسىن ءار قىرىنان بەينەلەدى.

  اق تىستى كىتاپتا بىلاي دەلىندى: جۇڭگو كوممۋنيستىك پارتياسى حالىققا باسشىلىق ەتىپ توڭكەرىستىڭ جەڭىسىنە قول جەتكىزىپ، جاڭا جۇڭگو قۇرىپ، مەملەكەتتى بايىتۋدىڭ، قۇدىرەتتەندىرۋدىڭ، حالىقتى اۋقاتتاندىرۋدىڭ شىت جاڭا بارىسىن باستادى. رەفورما جاساۋ، ەسىك اشۋ جۇڭگونىڭ دامۋىن بارىنشا جەبەپ، جۇڭگونىڭ كەدەيلىكتى ازايتۋ ءۇردىسى جەدەل ىلگەرىلەدى. جۇڭگونىڭ دامۋى جاڭا داۋىرگە ءوتىپ، جۇڭگونىڭ كەدەيلىكتى ازايتۋى كەدەيلىكتەن ارىلتۋدان قامال الۋ تاريحىنداعى جاڭا كەزەڭگە ءوتتى. جۇڭگو كوممۋنيستىك پارتياسىنىڭ 18 - قۇرىلتايىنان بەرى 8 جىل جالعاستىرا كۇرەس جۇرگىزۋ ارقاسىندا، 2020 - جىلدىڭ سوڭىندا جۇڭگو جاڭا داۋىردەگى كەدەيلىكتەن ارىلتۋدان قامال الۋدىڭ نىسانا - مىندەتتەرىن ۋاعىندا ورىندادى.

  اق تىستى كىتاپتا مىنالار اتاپ كورسەتىلدى: كەدەيلىكتەن ارىلتۋدان قامال الۋ شايقاسىنىڭ جۇڭگونىڭ اۋىل - قىستاقتارىن وزگەرتۋى تاريحي سيپاتتى، جان - جاقتى بولدى، جۇڭگونىڭ اۋىل - قىستاقتارىنداعى تاعى ءبىر رەتكى ۇلى توڭكەرىس سانالادى، ول كەدەي وڭىرلەردىڭ مەشەۋ بەت - بەينەسىن تەرەڭدەي وزگەرتىپ، جۇڭگو اۋىل - قىستاقتارىنىڭ جالپى تۇلعالىق دامۋىن پارمەندى ىلگەرىلەتىپ، جاپپاي دوڭگەلەك داۋلەتتى قوعام ورناتۋداعى ەڭ كورنەكتى ولقىلىقتاردى تولىقتاپ، جاپپاي سوتسياليستىك وسىزاماندانعان مەملەكەت قۇرۋ، ەكىنشى 100 جىلدىق كۇرەس نىساناسىن جۇزەگە اسىرۋ ءۇشىن بەرىك نەگىز قالادى. كەدەيلىكتەن ارىلتۋدان قامال الۋ شايقاسى جاپپاي جەڭىسكە جەتىپ، جۇڭحۋا ۇلتى نەشە مىڭ جىلدىق دامۋ تاريحىندا تۇڭعىش رەت مۇلدەم كەدەيلىكتى جالپى تۇلعالىق جاقتان جويىپ، جۇڭگو حالقىنىڭ مىڭ جىلدىق ارمانىن، 100 جىلدىق كوكەي تەستى تىلەگىن جۇزەگە اسىردى.

  اق تىستى كىتاپتا بىلاي دەلىندى: دۇنيە ءجۇزى جان سانىنىڭ بەستەن بىرىنە جۋىعىن ۇستايتىن جۇڭگو مۇلدەم كەدەيلىكتى جاپپاي جويىپ، «بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك تارتىبىندەگى» كەدەيلىكتى ازايتۋ نىساناسىن 10 جىل بۇرىن جۇزەگە اسىردى، بۇل جۇڭحۋا ۇلتىنىڭ دامۋ تاريحىندا بەلەستىك ماڭىز الاتىن ءىرى وقيعا عانا ەمەس، ادامزاتتىڭ كەدەيلىكتى ازايتۋ تاريحىنداعى، ءتىپتى، ادامزاتتىڭ دامۋ تاريحىنداعى ءىرى وقيعا بولىپ، دۇنيە ءجۇزىنىڭ كەدەيلىكتى ازايتۋ ءىسىنىڭ دامۋى مەن ادامزاتتىڭ دامۋى، العا باسۋى ءۇشىن ماڭىزدى ۇلەس قوستى.

  اق تىستى كىتاپ العى ءسوز، سوڭعى سوزدەن سىرت، جالپى 5 بولىكتى قامتيدى، ولار جەكە - جەكە: جۇڭگو كوممۋنيستىك پارتياسىنىڭ ايبىندى ۋادەسى، جاڭا داۋىردەگى كەدەيلىكتەن ارىلتۋدان قامال الۋدىڭ جاپپاي جەڭىسىنە جەتۋ، كەدەيلەردى دالمە - ءدال سۇيەمەلدەۋ جالپى جوباسىن اتقارۋ، ادامزاتتىڭ كەدەيلىكتى ازايتۋى ءۇشىن جاڭا جول تابۋ، كەدەيلىك بولمايتىن، بىرگە داميتىن ادامزاتتىڭ تاعدىرلاس ورتاق تۇلعاسىن قول ۇستاسا بىرگە قۇرۋ.

جاۋاپتى رەداكتور: ءاننا اكىمقان قىزى