بۋىرشىن اۋدانى اۋىل-قىستاقتا كومىردەن پايدالانىپ جىلىتۋدى ەلەكتردەن پايدالانىپ جىلىتۋعا وزگەرتۋ ينجەنەرياسىن اتقاردى

  ەرىكتى ءتىلشى جارقىن حابارلايدى. بۋىرشىن اۋدانى جىلۋمەن قامداۋدا ”كومىردىڭ ورنىنا ەلەكتر پايدالانۋ “ينجەنەرياسىن بار كۇشپەن اتقارىپ، جالپىلاستىرۋ ارقىلى جىلۋمەن قامداۋدىڭ ءداستۇرلى تاسىلىنە قوش ايتىپ، تۇرعىنداردى ”تازا جىلۋمەن قامداۋدىڭ“ قولايلىلىعىنان يگىلىكتەندىردى.

  قىس كىرگەننەن بەرى، بۋىرشىن اۋدانى تازا جىلۋمەن قامداۋ قىزمەتىن كۇش سالا ىلگەرىلەتىپ، ەگىنشى-مالشىلاردىڭ ۇيىنە تازا، حاۋىپسىز، قولايلى، قورشاعان ورتانى قورعايتىن ەلەكتردەن پايدالانىپ جىلىتۋ جابدىعىن ورناتتى. 2-ايدىڭ 18-كۇنى، ءتىلشى بۋىرشىن اۋدانى ويماقى قالاشىعى ەلامان قىستاعىنىڭ تۇرعىنى باقىتنۇردىڭ ۇيىنە بارعاندا ءۇيىنىڭ جىلى دا تازا ەكەنىن كوردى. ۇعىسۋعا قاراعاندا، بىلتىر قىستا ەلەكتردەن پايدالانىپ جىلىتۋ جابدىعىن ورناتىپ، كومىر جاعاتىن پار قازانعا قوش ايتقان ەكەن.

  باقىتنۇر ساياحات ءتيىمدى ساياساتىنان يگىلىكتەنىپ ساياجاي اشىپ، ساياجايىن اشەكەيلەگەندە اس ۇيىندەگى وشاقتى دا كومىر گازى وشاعىنا وزگەرتتى”. قازىر جاڭا ەنەرگيالى ەلەكتردەن پايدالانىپ جىلىتۋ جابدىعىن ورناتتىق، تازادا جوعارى ءونىمدى جىلۋ قاينارى اۋا ساپاسى مەن تۇرمىس شارت-جاعدايىمىزدى جاقسارتتى“،-دەدى باقىتنۇر قۋانا.

  ءۇي سىرتىنىڭ اۋا تەمپەراتۋراسى نولدەن تومەن 20 سەلتسي گرادۋس اينالاسىندا بولسادا، ءۇي ىشىندە قىسقا جەڭدى كيىممەن جۇرگەن ويماقى قالاشىعى قاتاي قىستاعىنىڭ تۇرعىنى جارقىنبەك ەلەكتردەن پايدالانىپ جىلىتۋ جابدىعىن قۋانا تانىستىردى. ”ءۇي ىشىنىڭ تەمپەراتۋراسىن ەمىن-ەركىن مەڭگەرۋگە بولادى، سۋ تەمپەراتۋراسى 48 سەلتسي گرادۋس بولعاندا ءۇيدىڭ تەمپەراتۋراسى ادەتتە 25 سەلتسي گرادۋستان جوعارى بولادى، وتە قولايلى ەكەن “،-دەدى ول.

  جارقىنبەكتىڭ ءۇيىنىڭ كولەمى 170 شارشى مەتر، ەلەكتردەن پايدالانىپ جىلۋمەن قامداۋعا ءبىر ايدا 1200 يۋان شاماسىندا اقشا جۇمسالادى، ەلەكتردىڭ ءبىر كيلوۆاتى ورتا ەسەپپەن 0.2 يۋان اينالاسىندا بولعاندا، كومىردىڭ باعاسىمەن قارايلاس ەكەن.” ەلەكتردەن پايدالانىپ جىلۋمەن قامداۋ وتە قولايلى، ەگەر بىرنەشە كۇن ۇيدە بولماعاندا، تەمپەراتۋرانى تومەن تەڭشەپ قويساق بولعانى، وتە حاۋىپسىز، الاڭداۋدىڭ قاجەتى جوق“،-دەدى ول.

  ” پارتيانىڭ حالىققا تيىمدىلىك جاساۋ ساياساتىنىڭ كومەگىندە، ەلامان قىستاعىنا قاراستى اۋىل شارۋاشىلىق قىستاقتارداعى ەگىنشى-مالشىلار بەيقۇت ۇيگە كوشىپ كىردى، جاقىنعى جىلداردان بەرى، ساياحات كاسىبىنىڭ دامۋىنا ىلەسە، قىستاقتىڭ ورتاسى ءتىپتى دە كوركەيدى، قورشاعان ورتانى قورعاۋ قىزمەتىن جەبەۋ ءۇشىن، ەلامان قىستاعىنداعى 15 ەگىنشى-مالشى وتباسى جاڭا ەنەرگيالى جىلۋمەن قامداۋ جابدىعىن ورناتتى، بۇل ۇلتتىق سالت-سانا ساياحاتىنا قولايلىلىق تۋدىرىپ قانا قالماستان، جىلۋمەن قامداۋدىڭ وزىندىك قۇنىن تومەندەتىپ، ساياحات ورتاسىن ءتىپتى دە جاقسارتتى“،-دەدى ەلامان قىستاعى پارتيا ياچەيكاسىنىڭ شۋجيى گۇلجاينا.

  بۋىرشىن اۋدانى تازا جىلۋمەن قامداۋ قىزمەتىن بەلسەنە ىلگەرىلەتىپ، قوعامنىڭ ءار سالاسىنىڭ ”تومەن كومىرتەكتى ورتانى قورعاۋ “سىندى ورتانى قورعاۋ تانىمىن ۇزدىكسىز كۇشەيتىپ، بۋىرشىن اۋدانىنىڭ اسپانى ءتىپتى دە اشىق، تۇرعىنداردىڭ ءۇيىنىڭ جىلى دا جايلى بولۋىنا كەپىلدىك ەتتى.

  اۋدارعان: جانار قاناپيا قىزى

جاۋاپتى رەداكتور: ءاننا اكىمقان قىزى