ايماقتىق حالىق شيپاحاناسى تۇڭعىش ”كۇرە تامىردان تىرەۋ قويۋ وپەراتسياسىن“ ءساتتى جاسادى

   التاي گازەتىنىڭ جالپىلىق اقپارات قۇرالدارى پراكتيكانت ءتىلشىسى گۇزال ابدىرەشيت پەن ەرىكتى ءتىلشى ۋي يۇيحۇي حابارلايدى. تاياۋدا، ايماقتىق حالىق شيپاحاناسى كۇرە تامىر وسپە اۋرۋىنا شالدىققان ناۋقاسقا ”كۇرە تامىردان تىرەۋ قويۋ وپەراتسياسىن“ ءساتتى جاسادى، بۇل ايماعىمىزدا تۇڭعىش جاسالعان وپەراتسيا بولىپ، ايماقتىق حالىق شيپاحاناسىنىڭ جۇرەك-قان تامىرى اۋرۋلارىن ەمدەۋ تەحنيكاسىنىڭ تىڭ بەلەسكە كوتەرىلگەندىگىنىڭ بەلگىسى.

سۋرەتتىڭ تۇسىنىگى: كۇرە تامىردان تىرەۋ قويعاننان كەيىن.

  تانىستىرۋعا قاراعاندا، كۇرە تامىردىڭ قاباتتالۋى جوعارى قان قىسىمى اۋرۋىنا شالدىققان ناۋقاستاردا بولاتىن قوسالقى اۋرۋدىڭ ءبىر ءتۇرى، مۇنىڭ ىشىندە كۇرە تامىر قاباتتالۋىنىڭ اۋرۋى شۇعىل، قاتەرلى بولىپ، كوكىرەك-ارقا قاتتى اۋىرىپ، پىشاقپەن كەسكەندەي نەمەسە تىلگىلەگەندەي سەزىلەدى، كۇرە تامىر جارىلۋدان كوپ مولشەردە قان شىعىپ، قۇرساق قۋىسىنداعى ورگاندار مەن اياققا قان جەتىسپەي قالادى، ەگەر وپەراتسيا جاسالماسا، كۇرە تامىردىڭ كەز كەلگەن ۋاقىتتا جارىلىپ قان شىعۋ قاتەرى تۋىلادى. مۇنداي وپەراتسيا توتەنشە دالمە-ءدال شەبەرلىكتى قاجەت ەتەدى، حاۋىپ-قاتەرى دە ءبىرشاما زور بولادى.

      بۇل ناۋقاس 51 جاستاعى ايەل، قاتىستى تەكسەرۋدى كەمەلدەندىرىپ جانە كوكىرەك ءبولىمىن CT اپپاراتىندا كۇشەيتپەلى تەكسەرگەندە، ”كۇرە تامىرعا قاباتتالعان وسپە اۋرۋىنا“ شالدىققانى ءمالىم بولادى. ناۋقاستىڭ اۋرۋ جاعدايى ءبىرشاما سالماقتى بولعاندىقتان، باسقا شيپاحاناعا جوتكەۋ ءبىرشاما حاۋىپتى. شيپاگەر ناۋقاستىڭ وتباسىنداعىلارمەن پىكىرلەسىپ ءارى شينجياڭ مەديتسينا داشۋەسىنە قاراستى 1-شيپاحانانىڭ شيپاگەرلەرىن شاقىرىپ دياگنوزىن تۇراقتاندىرعاننان كەيىن جەرگىلىكتى ورىننىڭ وزىندە ”كۇرە تامىردان تىرەۋ قويۋ وپەراتسياسىن“ جاساۋدى ۇيعارادى. سونىمەن، 3 ساعات ىشىندە وپەراتسيا ءساتتى اياقتالىپ، ناۋقاس CCU اۋرۋحاناسىنا الىنىپ جالعاستى ەمدەلەدى.

    جاقىنعى جىلداردان بەرى، ۇلكەن قان تامىر اۋرۋلارى، اسىرەسە، كۇرە تامىردىڭ قاباتتالۋى پايدا بولۋ مولشەرى جىل سايىن جوعارىلاپ كەلەدى، ونىڭ 48 ساعات ىشىندە جانىنان جۇدا ەتۋ مولشەرى %50 تەن جوعارى بولادى. ال، كۇرە تامىردىڭ قاباتتالۋى اپات سيپاتتى قان تامىر اۋرۋى، ءولىم مولشەرى وتە جوعارى، ەمدەۋ وتە قيىن، ”قان تامىردىڭ قاس جاۋى“ دەپ تە اتالادى، ەگەر دەركەزىندە ەمدەلمەسە، ناۋقاستىڭ كەز كەلگەن ۋاقىتتا قاباتتالعان كۇرە تامىرى جارىلىپ، قان كوپ كەتەدى، ءتىپتى، ومىرىنە حاۋىپ تونەدى. ءداستۇرلى وپەراتسيادا كۇرە تامىردىڭ قاباتتالۋى جانە قان تامىر وسپەسى قاتارلى اۋرۋلار ءۇشىن كەۋدە مەن قۇرساقتى اشۋ جانە دەنە سىرتىنداعى اينالىستى ازىرلەگەن شارت-جاعدايدا وپەراتسيا جاساپ ەمدەيدى، وپەراتسيانىڭ جاراقات اۋزى ۇلكەن، قاتەرى جوعارى، قوسانجار اۋرۋى كوپ، قاراجاتى جوعارى، قالپىنا كەلۋى باياۋ بولادى.

  بۇل رەتكى ”كۇرە تامىردان تىرەۋ قويۋ وپەراتسياسىنىڭ“ ءساتتى جاسالۋى ايماقتىق حالىق شيپاحاناسىنىڭ ينتەرفەرەنتسيالىق وپەراتسيا جاساۋ سالاسىنداعى تىڭ سەكىرىسى، بارعان سايىن كوبەيىپ كەلە جاتقان ۇلكەن قان تامىر اۋرۋىنا شالدىققاندارعا قىزمەت وتەۋگە ءتيىمدى بولىپ، ناۋقاستار دەركەزىندە، ءونىمدى ەمدەلە الادى.

جاۋاپتى رەداكتور: ءاننا اكىمقان قىزى