رايونىمىزدان 10 ادام ”مەملەكەتتىك تاڭداۋلى شارۋا جۇمىسكەر“ بولىپ باعالاندى

  انار بۇلت/ شينجياڭ گازەتىنىڭ ءتىلشىسى لي چۇنشيا، پراكتيكانت اراشجاپ پاما 1 - ايدىڭ 11 - كۇنى ۇرىمجىدەن حابارلايدى. اۆتونوميالى رايوندىق ادام كۇشى بايلىعى جانە قوعامدىق قامتاماسىزداندىرۋ مەڭگەرمەسىنەن ۇعىسۋىمىزشا، 1 - ايدىڭ 6 - كۇنى اشىلعان مەملەكەتتىك تاڭداۋلى شارۋا جۇمىسكەرلەردى جانە شارۋا جۇمىسكەرلەر قىزمەتىندەگى وزات كوللەكتيۆتەردى ماداقتاۋ - سيلاۋ جينالىسىندا رايونىمىزدان كۇيتۇن قالاسى تيانحۇڭ توقىما شەكتى سەرىكتەستىگىنىڭ باقىلاۋشى جۇمىسكەرى جەڭىسباي شىلدەباي قاتارلى 10 ادام ”مەملەكەتتىك تاڭداۋلى شارۋا جۇمىسكەر“ اتاعىنا يە بولدى، حوتان ايماقتىق ادام كۇشى بايلىعى جانە قوعامدىق قامتاماسىزداندىرۋ مەكەمەسى، ماكىت اۋداندىق ادام كۇشى بايلىعى جانە قوعامدىق قامتاماسىزداندىرۋ مەكەمەسى ”مەملەكەتتىك شارۋا جۇمىسكەرلەر قىزمەتىندەگى وزات كوللەكتيۆ“ بولىپ باعالاندى.

  مەملەكەتتىك تاڭداۋلى شارۋا جۇمىسكەرلەر جانە شارۋا جۇمىسكەرلەر قىزمەتىندەگى وزات كوللەكتيۆتەر ءار 5 جىلدا ءبىر رەت ماداقتالىپ - سيلانادى. تالاپ بويىنشا وسى رەتكى باعالاۋ، نەگىزىنەن، مەملەكەتتىڭ جەر - جەرىندەگى قالىڭ شارۋا جۇمىسكەرلەر مەن شارۋا جۇمىسكەرلەر ءۇشىن قىزمەت وتەگەن نەگىزگى ساتى مەكەمەلەرىنە باعىتتالعان، نەگىزگى ساتىدا جانە ءبىرىنشى شەپ جۇمىس ورنىندا قىزمەت ىستەگەن شارۋا جۇمىسكەرلەر %90تەن استامىن ۇستايدى. مەملەكەتتىك تاڭداۋلى شارۋا جۇمىسكەرلەردىڭ جاسى 16دان 60 جاس ارالىعىندا، نوپوسى اۋىل - قىستاقتا بولۋدى (نوپوسى اۋىل - قىستاقتاعى تولىق كۇندىك جوعارى مەكتەپتەردەن وقۋ تاۋىسقان وقۋشىلاردى قامتىمايدى)، قالاعا كەلىپ جۇمىس ىستەگەن، ساۋدا جاساعان نەمەسە سول جەردە، جاقىن ماڭدا باسقا كاسىپكە ويىسىپ جۇمىستانعان، شارۋاشىلىق قۇرعان ۋاقىتى 3 جىلدان جوعارى بولۋدى تالاپ ەتەدى.

  رايونىمىزدان ماداقتالىپ - سيلانعان مەملەكەتتىك تاڭداۋلى 10 شارۋا جۇمىسكەر تۇگەلدەي نەگىزگى ساتىدان جانە ءبىرىنشى شەپتەگى قىزمەت ورنىنان كەلگەن، الەۋمەتتىك اۆتوكولىك شوفەرى، كاسىپورىن جۇمىسشى - قىزمەتكەرلەرى بار، ەڭبەك سەلبەستىك كووپەراتيۆىنىڭ، باعىمشىلىق سەلبەستىك كووپەراتيۆىنىڭ باستاماشىلارى دا بار. ولار وزدەرىنىڭ قىزمەت ورنىندا قۇلشىنا ۇيرەنىپ، تەحنيكانى ۇڭىلە زەرتتەپ، ناتيجەسى ۇزدىك بولىپ، ۇلگىلىك جانە ونەگەلىك، باستاماشىلىق رول اتقاردى؛ اۋىلعا قايتىپ، اۋىلدا قالىپ شارۋاشىلىق قۇرۋدا، اۋىل - قىستاق ەڭبەككۇشتەرىن باسقا كاسىپكە ويىستىرىپ جۇمىستاندىرۋ سياقتى جاقتاردا كورنەكتى ۇلەس قوستى.

جاۋاپتى رەداكتور: قارلىعاش ءماۋلىت قىزى