قۇبا تۇزدە جاڭا كاسىپ بوي كوتەردى

  − كۇنلۇن ەتەگىندەگى تۇڭان اۋىلىنىڭ 2 جىلدا كەدەيلىكتەن ارىلۋ جولى

  شينحۋا اگەنتتىگىنىڭ ءتىلشىسى گاۋ حان

   12 - ايدا ىزعارلى ءارى قۇرعاق وڭتۇستىك شينجياڭ دالاسىندا كوپتەن كۇتكەن قار جاۋىپ، شارۋالاردىڭ قاز - قاتار تىزىلگەن تاس كەرپىشتى ۇيلەرى اق كورپە جامىلدى. ”80 - جىلداردىڭ تۇلەگى“ راناگۇل قاھارمان جىپ - جىلى ۇيىندە تىلشىگە تۇرمىسىنداعى وزگەرىستەردى ايتىپ بەردى.

  ”بۇل جەر كۇن سايىن تۇرلەنۋدە، قۇبا ءتۇز شۇراتقا اينالىپ، تۇرمىسىمىز كۇن سايىن جاقسارۋدا، قارا كەرپىش ۇيلەر، تىك بەتكەيدەگى جولدار وتكەننىڭ ەنشىسىندە قالدى“، - دەدى راناگۇل قاھارمان.

  راناگۇل قاھارمان قونىس جاڭالاپ كوشىرىلگەن كەدەي وتباسى. 2 جىلدىڭ الدىندا ونىڭ وتباسىن قامتىعان 1000نان استام وتباسى ”تاۋلى وبلىس“ اتانعان قىزىلسۋ قىرعىز اۆتونوميالى وبلىسىنان قازىرگى كۇنلۇن تاۋىنىڭ ەتەگىندەگى كوشىرىلىپ ورنالاستىرىلاتىن شاعىن اۋماق − قاشقار ايماعى پوسكام اۋدانىنىڭ تۇڭان اۋىلىنا كوشىرىلگەن ەدى.

  كوشىرىلگەن بۇقارانىڭ ”كوشىپ شىعۋىنا، ورنىعىپ وتىرۋىنا، بايۋىنا“ مۇمكىندىك جاساۋ ءۇشىن، ۇكىمەت بەلسەندىلىكپەن ولارعا تىرشىلىك جولىن قاراستىردى.

   توپىراق اۋىستىردى، توسپاداعى لاي - باتپاقتى ءۇيدى، اۋلا تىڭايتقىشىن شاشتى... ياركەن وزەنىنە تاياۋ ورنالاسقان تۇڭان اۋىلى قىسقا عانا 2 جىلدا وسى ”جەرگىلىكتى ادىستەر“ ارقىلى 12 مىڭ ەگىستىك جەردى قۇنارلاندىردى. تىرشىلىك تىرەگى جەرگە يە بولعان سوڭ جەرگىلىكتى ورىن ەرەكشە ەگىمشىلىك، باعىمشىلىق كاسىپتەرىن زور كۇشپەن دامىتا باستادى.

  تۇڭان اۋىلىنىڭ باستىعى يمىن قادىر تىلشىگە مىنانى ايتتى: قازىر قۇنارلاندىرىلعان 4000 مۋلىق ىشەر استىق اتىزىنىڭ مۋ باسىندىق ءونىمى 250 كيلوگرامعا جەتەدى، 8000 مۋلىق جەم - شوپتىك جەردەن ءشوپ ءوندىرىلىپ، قوي مەن سيىردىڭ قىسقى ازىق ماسەلەسى شەشىلدى، ۇكىمەت سالىپ بەرگەن 30 جىلىجاي بۇقارانىڭ قىستا جاڭا كوكونىس تۇتىنۋىنا مۇمكىندىك بەردى.

  استىقتان مول ءونىم الىنىپ، كوشىپ كەلگەن كوپتەگەن تۇرعىندار العاش رەت وزدەرى ەككەن استىقتىڭ ءدامىن تاتتى، اتىزداعى سابان - توپان مال ازىعىنا پايدالانىلدى، تۇرمىستاعى وزگەرىستەر جەرگىلىكتى بۇقارانىڭ بايۋ بەلسەندىلىگىن بارىنشا جوعارىلاتتى، ارىن كۇشەيدى، 2 جىلدان بەرى تۇڭان اۋىلىنداعى مال باسى اۋەلدەگى 11 مىڭنان ارتىپ قازىرگى 17 مىڭعا جەتتى، تاماشا ەكونوميكالىق ونىمدىلىك جاراتۋمەن قاتار، مالدىڭ تەزەگى دە اۋلا تىڭايتقىشى رەتىندە پايدالانىلىپ، توپىراقتىڭ قۇنارلىلىعىن ارتتىرىپ، تاماشا اينالىم قالىپتاستىردى.

  كوز الدا 10 مىڭ مۋلىق قۇنارلى اتىز قورشاپ جاتقان تۇڭان اۋىلى جاڭا بەينەگە ەنگەن، قىلتان شىقپايتىن قۇبا تۇزدە جاڭا كاسىپ بوي كوتەردى.

  بيىل تۇڭان اۋىلى تۇتاسىمەن كەدەيلىكتەن ارىلىپ، كوشىرىلگەن تۇرعىنداردىڭ تۇرمىسى بارعان سايىن جاقسارا ءتۇستى، قالالىقتارداي تۇرمىس كەشىرىپ قانا قويماي، اۋدان قالاشىعىنا جاقىن بولعاندىقتان، جول قاتىناس بۇرىنعىداي ماسەلە بولۋدان قالدى، اناعۇرلىم كوپ دۇنيەنى كورىپ، ادامداردا دا تىرشىلىك ەتۋ، بايۋ تاڭداۋى ءتىپتى كوبەيە ءتۇستى.

  2019 - جىلى شينجياڭنىڭ ”13 - بەسجىلدىقتاعى“ قونىس اۋدارىپ كەدەيلەردى سۇيەمەلدەۋ قۇرىلىسى مىندەتى مەرزىمنەن ءبىر جىل بۇرىن ورىندالدى، 40 مىڭ 146 وتباسى، 169 مىڭ 400 ادام وسى ساياساتتىڭ يگىلىگىن كورىپ جاڭا قونىسقا قۋانا كوشىپ كىردى. ولار دا راناگۇل قاھارمان سياقتى جولدىڭ باتىل قادامدارمەن اشىلاتىندىعىنا، تاۋ قويناۋىنان شىقسا ءورىستىڭ كەڭ ەكەندىگىنە كامىل سەنەدى.

  قوشتاساردا راناگۇل قاھارمان تىلشىگە بىلاي دەدى: ”قازىر ەگىستىك جەرىم، جاڭا ءۇيىم، ساۋدا دۇكەنىم بار، بالالار وقۋ وقىسا جولى اشىلادى، جاقسى ىستەمەسەك، مەملەكەتتىڭ ابزال ساياساتىنىڭ ءۇمىتىن اقتاي الماعان بولامىز“.

  (شينحۋا اگەنتتىگىنىڭ 12 - ايدىڭ 29 - كۇنى ۇرىمجىدەن بەرگەن حابارى)

جاۋاپتى رەداكتور: ءاننا اكىمقان قىزى