جەر-جەر كۇزگى مول ءونىم شاتتىعىنا شومدى

  ەرىكتى ءتىلشى ليۋ جينرۇي، چين شۋان حابارلايدى. جاقىنعى كۇندەردەن بەرى، كۇزگى مول ءونىم شىڭگىل دالاسىن شاتتىققا بولەدى. بارلىق جەردەن ەگىنشى-مالشىلاردىڭ قۋانىشتى، باقىتتى تۇرمىسىن كورۋگە بولادى.

  ءبيداي ورۋدىڭ قاربالاستىعى

  8-ايدىڭ اياعىنان باستاپ شىڭگىل اۋدانىنىڭ 83 مىڭ مۋ جەردەگى ءبيدايى ورىلدى، ءبيدايدان مول ءونىم الدى.

  30 نەشە جىلدىق ەگىنشىلىك تاجىريبەسى بار ءبيداي ەگىنشىلىگى وتباسى ۋاڭ جياجۋ شىڭگىل اۋدانىنىڭ اقدالا قالاشىعىندا 14 مىڭ مۋ جەرگە ءبيداي ەكتى. بيىل اگرو تەحنيكتەردىڭ جەتەكشىلىگىندە، ۋاڭ جياجۋ عىلمي جولمەن ءبيداي ەگىپ، ءار مۋىنان 550 كيلوگرام اينالاسىندا ءونىم الۋدى مەجەلەپ وتىر.

  بيىل شىڭگىل اۋدانىنىڭ ءبيداي ءونىم مولشەرى مەجەمەن 40 مىڭ توننا. ءبيدايدىڭ قامبالانۋىنا كەپىلدىك ەتۋ ءۇشىن، شىڭگىل اۋداندىق استىق-ماي ساتىپ الۋ، زاپاس ساقتاۋ شەكتى جاۋاپكەرلىك سەرىكتەستىگى جەتكىزۋ ماشيناسى، قامبا تولىقتاۋ ماشيناسى، استىق تازارتۋ ماشيناسى سياقتى استىق تيەۋ جابدىقتارىن تەكسەرىپ-وتكىزىپ الۋ، قورعاۋ، كۇتىمدەۋ قىزمەتىن كۇنى بۇرىن ءبىتىرىپ، استىق ساتىپ الاتىن كەزدە ماشينا جابدىقتارىنىڭ قالىپتى جۇمىس ىستەۋىنە كەپىلدىك ەتتى. سونىمەن بىرگە، اۋداندىق ورتالىق قامبا استىق پۋنكتى، بايشىڭ استىق پۋنكتى، شاعانعول اۋىلدىق استىق پۋنكتى، ارالتوبە قالاشىعى استىق پۋنكتى، اقدالا قالاشىعى استىق قامباسى سىندى 5 ءبيداي ساتىپ الۋ ءتۇيىنىن قۇرىپ، استىق تيەگەن كولىك كەلە سالىسىمەن تۇسىرۋگە كەپىلدىك ەتىپ، كولىكتىڭ توسىلىپ قالۋىنىڭ الدىن الدى.

  كارتوپتان مول ءونىم الدى

  ءدال قازىرگى كەز كارتوپتىڭ جيىن-تەرىن مەزگىلى. شىڭگىل اۋدانى ارال قالاشىعىنىڭ مىڭ مۋلىق كارتوپ ەگىنشىلىك بازاسىندا قىستاق تۇرعىندارى كارتوپ جيناۋ، سۇرىپتاۋ، دوربالاۋمەن قاربالاس بولىپ جاتتى، كوپشىلىكتىڭ جۇزىنەن مول ءونىم شاتتىعىن ابدەن سەزىنۋگە بولادى. تانىستىرۋعا قاراعاندا، بۇل ەگىنشىلىك بازاسى ەگىنشىلىك كاسىپ قۇرىلىمىن ۇزدىكسىز رەتكە سالىپ وڭاپ، كاسىپتىك سەلبەستىك كووپەراتيۆىن قۇرىپ، ەرەكشەلىككە يە كاسىپتى بەلسەنە دامىتىپ، ەگىنشى-مالشىلاردىڭ كىرىسىن ارتتىرۋعا دەم بەرگەن. ارالتوبە قالاشىعىنداعى ەگىنشىلىك وتباسى سۇن يۇيجياڭ تىلشىگە ءوزىنىڭ بيىل 1100 مۋ جەرگە كارتوپ ەككەندىگىن، ءونىمى وتكەن جىلداعىدان ءسال جوعارى ەكەندىگىن ايتتى. سۇن يۇيجياڭنىڭ ەگىس اتىزىندا قاربالاس جۇمىس ىستەپ جاتقان ارال قالاشىعى بۇعابا قىستاعىنىڭ تۇرعىنى باقىتنۇر دالەلبەك قىزى بىلاي دەدى: شەشەم ەكەۋىمىز كارتوپ سۇرىپتاۋ ارقىلى ءار ادام كۇنىنە 200 يۋان كىرىس كىرگىزەمىز.

  100 مىڭ مۋلىق شىرعاناق جيناۋ مەزگىلىن قارسى الدى

  وسى 2 كۇننەن بەرى، شىڭگىل اۋدانى تايكەشكەن قالاشىعىنىڭ ەگىنشىلىك ءىرى وتباسى جۋ گۇيفاڭ جۇمىسشىلاردى باستاپ ءوزى كوتەرەگە العان 2600 مۋ شىرعاناق ورمانىنا بارىپ جەمىس تەرۋمەن قاربالاس بولدى. جۋ گۇيفاڭ بىلاي دەدى: قازىر توڭازىتىلعان جەمىس تاپسىرىسى 100 توننادان استام بولىپ، نەگىزىنەن وڭتۇستىك شينجياڭعا ساتىلادى. بيىل 200 توننادان استام شىرعاناق جەمىسىن تەرۋگە، سونىمەن بىرگە، 800 دە 900 مىڭ يۋان كىرىس كىرگىزۋگە بولادى.

  شىڭگىل اۋدانىنىڭ 100 مىڭ مۋلىق شىرعاناق جەمىسى تولىق پىستى، ەگىنشىلىك وتباسىلارى جەمىس تەرۋمەن جانە كاسىپورىنعا ساتۋمەن قاربالاستاندى.

  تايكەشكەن قالاشىعى شىگەنتوبە قىستاعىنىڭ تۇرعىنى تابىس ءار جىلى 8-، 9-ايلاردا شىرعاناق تەرۋمەن شۇعىلدانىپ، كۇنىنە 200 دە 300 يۋان اقشا تاۋىپتى، 2 ايدا 20 مىڭ يۋانعا جۋىق كىرىس كىرگىزدى.

  شينجياڭ حۇيحۋا شىرعاناق بيو عىلىم-تەحنيكا ساۋدا شەكتى سەرىكتەستىگىنىڭ باس ديرەكتورى ساي يۇڭگونىڭ تانىستىرۋىنشا، ولار ءار جىلى 2000 توننادان استام شىرعاناق جەمىسىن ساتىپ الادى، شىرعاناق كاسىبى ارقىلى ەگىنشى-مالشىلاردان 5000 ادامدى تىكەلەي نەمەسە جانامالاي كاسىپتەندىرەدى ەكەن. بيىل ۇستەگى جارىم جىلدا كاسىپورىننىڭ ساتىلىم سوماسى 10 ميلليون يۋاننان استام بولىپ، سوڭعى جارىم جىل ساۋدانىڭ كۇسەت مەزگىلىندە ساتىلىم سوماسى مەجەمەن 20 ميلليون يۋاننان اساتىن كورىنەدى. ۇعىسۋعا قاراعاندا، شىرعاناق كاسىپتىك تىزبەگى تاعى شىڭگىل اۋدانىنىڭ زات اينالىم، قىزمەت وتەۋ، ەلەكتروندى ساۋدا، ساياحات قاتارلى كاسىپتەرىنىڭ دامۋىن ءونىمدى جەتەلەگەن. قازىر بۇل اۋداندا 200 دەن استام ادام تيانماۋ، جيڭدۇڭ، تاۋباۋ، شينجياڭ داتاڭ جىبەك جولى، دوۋين قاتارلى تور تەكشەسىندە جۇمىس ىستەيدى. شىڭگىل اۋدانىنداعى دۋمۋرىن ەلەكتروندىق ساۋداعا قىزمەت وتەۋ شەكتى سەرىكتەستىگىنىڭ باس ديرەكتورى چۇي شاۋفي بىلاي دەدى: تەكشەمىز نەگىزىنەن شىرعاناق جەلىلەس ونىمدەرى تيجاراتىمەن شۇعىلدانادى. جىل باسىنان قازىرگە دەيىن جيڭدۇڭ جانە تيانماۋ ەكى تەكشەنىڭ جەلىدەگى جالپى ساتىلىم سوماسى 2 ميلليون 700 مىڭ يۋاننان اسىپ، سەرىكتەستىك قىزمەتكەرلەرىنىڭ ايلىق ورتاشا كىرىسى 4000 دا 5000 يۋان بولدى. بيىل ءبىز جەلىدە تىكە تاراتۋ سىندى ساتۋ فورماسىن ارقاۋ ەتىپ، شىڭگىل اۋدانىنىڭ سارا ونىمدەرىن بارشاعا تانىستىرىپ، تۇتىنۋشىلاردىڭ كوڭىلىنە ۇيالاتامىز.

  شىڭگىل اۋدانىنىڭ شىرعاناق جەمىسىنىڭ ساپاسى الىس-جاقىنعا ايگىلى. شىڭگىل اۋداندىق تابيعي بايلىق مەكەمەسى پارتگرۋپپاسىنىڭ ورىنباسار شۋجيى، مەكەمە باستىعى حى پانجياڭنىڭ تانىستىرۋىنشا، بۇل اۋداننىڭ شىرعاناق ەككەن جەر اۋماعى 100 مىڭ مۋعا جەتەدى، جەمىس بەرۋ اۋماعى 35 مىڭ مۋ. بيىل شىڭگىل اۋدانى كاسىپورىندارمەن بەلسەنە سەلبەستىك جاساپ، 4000 توننا شىرعاناق جەمىسىن ساتىپ الىپ، 10 مىڭ ادام (رەت) كاسىپتەندىرىپ، ولاردىڭ جان باسىندىق كىرىسىن 2000 يۋان ارتتىرۋدى جوسپارلاپ وتىر.

  ەگىنشى-مالشىلار جەم-ءشوپ جينادى

  قازىرگى كەز ەگىس جۇمىسى مەن ءشوپ شابۋدىڭ قاربالاس مەزگىلى. شىڭگىل اۋدانىنىڭ ءارقايسى اۋىلىنىڭ (قالاشىعىنىڭ) ەگىنشى-مالشىلارى ۋاقىتتى مىقتى يگەرىپ، جەم-ءشوپ جيناۋمەن قاربالاستىققا ءتۇسىپ، مالدىڭ قىس قىرىنان امان وتۋىنە دايىندالدى.

  جاقىننان بەرى، ارال اۋىلى دۇرگىن قىستاعىنىڭ تۇرعىنى بەكەي ءسالىم ۇلىنىڭ شاپپالىعىندا ۇلكەن ات كۇشىندىك تراكتور تايلاۋ ماشيناسىن تيەپ ارلى-بەرلى جۇمىس ىستەدى، بەكەي وتباسىنداعىلار تايلانعان ءشوپتى جيناپ كولىككە باسۋ، تاسۋمەن قاربالاس بولدى. بەكەي بىلاي دەدى؛ 30 قويىم، 20 سيىرىم بار. جەم-ءشوپتى الدىن الا جيىپ الساق، قىستاي الاڭدامايمىز.

  ارالتوبە قالاشىعى كومىركەن قىستاعىنداعى ەگىس ماشيناسىن جۇرگىزەتىن كابىلا جالىن ۇلى ەگىنشىلىك وتباسىلارىنا كومەكتەسىپ ءبيداي ورىپ بەرۋمەن ءبىر ۋاقىتتا، قوسىمشا كاسىپپەن شۇعىلدانىپ، جەم-ءشوپ دەلدالى بولىپ، ەگىنشىلىك وتباسىلارىمەن بەلسەنە بايلانىس جاساپ، سابان ساتىپ الىپ، ونى قايتادان باعىمشىلىق وتباسىلارىنا ساتىپ بەردى. كابىلا بىلاي دەدى: بيىل ەگىنشىلىك وتباسى جاعىنان 700 مۋلىق ساباندى كوتەرەگە الدىم، بۇدان مەجەمەن 35 مىڭ يۋان كىرىس كىرگىزۋگە بولادى.

  قازىرگە دەيىن شىڭگىل اۋدانى 120 مىڭ توننا سۇرلەم بورمي، 28 مىڭ توننا ءشوپ، 94 مىڭ توننا سابان، 28 مىڭ توننا باسقا دا جەم-ءشوپ جانە 11 مىڭ توننا جەم زاپاسىن ساقتاعان. بۇل 290 مىڭ باس (تۇياق) قوراداعى مالدىڭ ازىعىنىڭ جەتكىلىكتى بولۋىنا كەپىلدىك ەتەدى.

جاۋاپتى رەداكتور: ءاننا اكىمقان قىزى