دۇنيە ءجۇزى عىلىم - تەحنيكاسىنىڭ الدىڭعى لەگىن بەتكە الىپ، ەكونوميكانىڭ نەگىزگى شايقاس مايدانىن بەتكە الىپ، مەملەكەتتىڭ ماڭىزدى قاجەتىن بەتكە الىپ، حالىقتىڭ ءومىرىنىڭ سالاماتتىعىن بەتكە الىپ، عىلىم - تەحنيكانىڭ كەڭدىگى مەن تەرەڭدىگىنە قاراي ۇزدىكسىز شەرۋ تارتۋ كەرەك

شي جينپيڭ عالىمدار اڭگىمە ءماجىلىسىن باسقارىپ اشقاندا بىلاي دەپ باسا دارىپتەدى

  دۇنيە ءجۇزى عىلىم - تەحنيكاسىنىڭ الدىڭعى لەگىن بەتكە الىپ، ەكونوميكانىڭ نەگىزگى شايقاس مايدانىن بەتكە الىپ، مەملەكەتتىڭ ماڭىزدى قاجەتىن بەتكە الىپ، حالىقتىڭ ءومىرىنىڭ سالاماتتىعىن بەتكە الىپ، عىلىم - تەحنيكانىڭ كەڭدىگى مەن تەرەڭدىگىنە قاراي ۇزدىكسىز شەرۋ تارتۋ كەرەك

  ۋاڭ حۋنيڭ، حان جىڭ قاتىناستى

  9 - ايدىڭ 11 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭدە عالىمدار اڭگىمە ءماجىلىسىن باسقارىپ اشتى ءارى ماڭىزدى ءسوز سويلەدى. □ سۋرەتتى شينحۋا اگەنتتىگىنىڭ ءتىلشىسى ياۋ دا - ۋي تۇسىرگەن

  شينحۋا اگەنتتىگىنىڭ 9 - ايدىڭ 11 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 9 - ايدىڭ 11 - كۇنى تۇستەن كەيىن بەيجيڭدە عالىمدار اڭگىمە ءماجىلىسىن باسقارىپ اشتى ءارى ماڭىزدى ءسوز سويلەپ، ”14 - بەسجىلدىق“ مەزگىلىندەگى ەلىمىزدىڭ عىلىم - تەحنيكا ىستەرىنىڭ دامۋى جونىندەگى پىكىرلەرىن تىڭدادى. ول بىلاي دەپ باسا دارىپتەدى: ەلىمىزدىڭ ەكونوميكالىق، قوعامدىق دامۋى جانە حالىق تۇرمىسىنىڭ جاقسارۋى عىلىم - تەحنيكالىق شەشۋ جوباسىن بۇرىنعى ءارقانداي مەزگىلدەگىدەن دە نەعۇرلىم قاجەت ەتەدى، جاڭالىق اشۋ سىندى ءبىرىنشى قوزعاۋشى كۇشتى كۇشەيتۋدى ءتىپتى دە قاجەت ەتەدى. ەلىمىزدەگى قالىڭ عالىمدار مەن عىلىم - تەحنيكا قىزمەتكەرلەرىنىڭ عىلىم شىڭىنا شىعۋعا سەنىمى، ەرىك - جىگەرى، قابىلەتى بار. قالىڭ عالىمدار مەن عىلىم - تەحنيكا قىزمەتكەرلەرىنىڭ تاريحي جاۋاپكەرشىلىكتى ارقالاپ، دۇنيە ءجۇزى عىلىم - تەحنيكاسىنىڭ الدىڭعى لەگىن بەتكە الۋدان، ەكونوميكانىڭ نەگىزگى شايقاس مايدانىن بەتكە الۋدان، مەملەكەتتىڭ ماڭىزدى قاجەتىن بەتكە الۋدان، حالىقتىڭ ءومىرىنىڭ سالاماتتىعىن بەتكە الۋدان جازباي، عىلىم - تەحنيكانىڭ كەڭدىگى مەن تەرەڭدىگىنە قاراي ۇزدىكسىز شەرۋ تارتۋىن ءۇمىت ەتەمىن.

  جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ۋاڭ حۋنيڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى حان جىڭ اڭگىمە ماجىلىسكە قاتىناستى.

       اڭگىمە ماجىلىستە، جۇڭگو ينجەنەريا اكادەمياسىنىڭ اكادەميگى شۇي كۋاڭدي، چيڭحۋا داشۋەسى ايقاسپالى ينفورماتسيا زەرتتەۋ ورنىنىڭ باستىعى، جۇڭگو عىلىم اكادەمياسىنىڭ اكادەميگى ياۋ چيجى، شيحۋ داشۋەسىنىڭ باستىعى، جۇڭگو عىلىم اكادەمياسىنىڭ اكادەميگى شى يگۇڭ، جۇڭگو ينجەنەريا اكادەمياسىنىڭ ورىنباسار باستىعى، جۇڭگو ينجەنەريا اكادەمياسىنىڭ اكادەميگى چىن زونيڭ، اليبابا توبى تەحنيكالىق كوميتەتىنىڭ ءتوراعاسى، جۇڭگو ينجەنەريا اكادەمياسىنىڭ اكادەميگى ۋاڭ جيان، جۇڭگو عىلىم اكادەمياسى ەجەلگى ومىرتقالى جانۋارلار جانە ەجەلگى ادامزات زەرتتەۋ ورنىنىڭ زەرتتەۋشىسى فۋ چياۋمەي، بەيجيڭ حيميا ونەركاسىبى داشۋەسىنىڭ ارناۋلى ۇسىنىس ەتىلگەن پروفەسسورى داي ۋي قاتارلى 7 عالىمدار ۋاكىلى ىلگەرىندى - كەيىندى ءسوز سويلەپ، عىلىم - تەحنيكا ءتۇزىلىسى رەفورماسىن تەرەڭدەتۋ، عىلىم - تەحنيكادا جاڭالىق اشۋ مەن دامۋدى ىلگەرىلەتۋ سياقتى ماسەلەلەر جونىندە پىكىر - ۇسىنىس قويدى. شي جينپيڭ ءسوز سويلەگەن ءاربىر عالىممەن پىكىر اۋىستىرىپ، كەيبىر كەلەلى عىلىم - تەحنيكالىق ماسەلەلەردى جانە عىلىم - تەحنيكا ءتۇزىلىسى رەفورماسىندا جاڭالىق اشۋ ماسەلەسىن ىشكەرىلەي تالقىلادى.

  كوپشىلىكتىڭ ءسوزىن مۇقيات تىڭداعان سوڭ، شي جينپيڭ ماڭىزدى ءسوز سويلەدى. ول مىنانى ءبىلدىردى: كوپشىلىك وتە جاقسى سويلەدى، وزدەرىنىڭ زەرتتەۋ سالاسىمەن ۇشتاستىرا وتىرىپ كوپتەگەن قۇندى پىكىرلەر مەن ۇسىنىستاردى قويدى، قاتىستى جاقتاردىڭ مۇقيات زەرتتەپ قابىلداۋىن سۇرايمىن.

  شي جينپيڭ بىلاي دەپ اتاپ كورسەتتى: پارتيا 18 - قۇرىلتايىنان بەرى، ءبىز عىلىم - تەحنيكادا جاڭالىق اشۋ قىزمەتىنە ايرىقشا ءمان بەردىك، جاڭالىق اشۋدى دامۋعا جەتەكشىلىك ەتۋدىڭ ءبىرىنشى قوزعاۋشى كۇشى ەتۋگە تاباندى بولدىق. بۇكىل قوعامنىڭ بىرگە قۇلشىنۋىنىڭ ارقاسىندا، ەلىمىزدىڭ عىلىم - تەحنيكا ىستەرىندە تاريحي جەتىستىكتەرگە قول جەتتى، تاريحي وزگەرىستەر جارىققا شىقتى. كەلەلى جاڭالىق اشۋ جەتىستىكتەرى جارىسا جارىققا شىعىپ، ءىشىنارا العى سالالار قاتار جۇگىرۋ، باستاپ جۇگىرۋ كەزەڭىنە وتە باستادى، عىلىم - تەحنيكالىق ناقتى كۇش ساندىق توپتالۋدان ساپالىق سەكىرۋگە، تۇيىندەردە ناتيجە شىعارۋدان جۇيەلىك قابىلەتتىڭ وسۋىنە قاراي ارشىندى قادام تاستاۋدا. وسى رەتكى جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ بارىسىندا قالىڭ عىلىم - تەحنيكا قىزمەتكەرلەرى ەمدەۋ، ۆاكسينا زەرتتەۋ - اشۋ، ساقتانۋ - تىزگىندەۋ سياقتى كوپتەگەن ماڭىزدى سالالاردا عىلىم - تەحنيكالىق زەرتتەۋدەن قامال الىپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى ءبىر تۇتاس جوسپارلاپ ىلگەرىلەتۋگە پارمەندى تىرەك ازىرلەپ، ماڭىزدى ۇلەس قوستى. وسى ورايدا مەن قالىڭ عىلىم - تەحنيكا قىزمەتكەرلەرىنە شىن جۇرەكتەن العىس ايتامىن!

  شي جينپيڭ بىلاي دەپ باسا دارىپتەدى: بۇگىنگى تاڭداعى دۇنيە ءجۇزى ءجۇز جىلدا بولماعان زور وزگەرىستەردى باستان وتكەرۋدە، ەلىمىزدىڭ دامۋى ءدوپ كەلگەن ەل ءىشى - سىرتى ورتاسىندا تۋىلعان تەرەڭ كۇردەلى وزگەرىستەر، ەلىمىزدىڭ ”14 - بەسجىلدىق“ مەزگىلىندەگى، سونداي - اق ونان دا ۇزاق مەزگىلدەگى دامۋى عىلىم - تەحنيكادا جاڭالىق اشۋدى جەدەلدەتۋگە اناعۇرلىم كوكەي تەستى تالاپتار قويدى. عىلىم - تەحنيكادا جاڭالىق اشۋدى جەدەلدەتۋ − جوعارى ساپالى دامۋدى ىلگەرىلەتۋدىڭ قاجەتى، حالىقتىڭ جوعارى ساپالى تۇرمىسىن جۇزەگە اسىرۋدىڭ قاجەتى، جاڭا دامۋ ارناسىن قالىپتاستىرۋدىڭ قاجەتى، جاپپاي سوتسياليستىك وسىزاماندانعان مەملەكەت قۇرۋ جاڭا ساپارىن ءساتتى باستاۋدىڭ قاجەتى.

  شي جينپيڭ بىلاي دەپ باسا دارىپتەدى: ەلىمىزدە عىلىم - تەحنيكا قىزمەتكەرلەرىنىڭ سانى مول، زەرتتەۋ - اشۋعا قوسىلعان قارجىنىڭ كولەمى زور، شەشۋشى ءتۇيىن عىلىم - تەحنيكادا جاڭالىق اشۋ ەكولوگياسىن جاقسارتىپ، جاڭالىق اشۋدىڭ، جاسامپازدىقتىڭ ومىرشەڭدىگىن قاۋلاتىپ، قالىڭ عالىمدار مەن عىلىم - تەحنيكا قىزمەتكەرلەرىنە ءوز دارىن - قابىلەتتەرىن ساۋلەلەندىرەتىن ساحنا ازىرلەپ، عىلىم - تەحنيكادا جاڭالىق اشۋ جەتىستىكتەرىن تولاسسىز جارىققا شىعارۋ كەرەك. سۇرانىستى باعدار ەتۋگە جانە ماسەلەنى باعدار ەتۋگە تاباندى بولىپ، تەز ناتيجە شىعارا الاتىن، ماسەلەلەردى دەر كەزىندە شەشە الاتىن تەحنيكالاردى مىقتى يگەرىپ ىلگەرىلەتۋ؛ ستراتەگيالىق سيپات الاتىن، ۇزاق ەڭبەك ەتۋگە تۋرا كەلەتىن تەحنيكالاردى الدىن الا ورنالاستىرۋ كەرەك. ەلىمىزدىڭ سوتسياليستىك ءتۇزىمىنىڭ كۇشتى شوعىرلاندىرىپ، ءىرى ىستەر تىندىرۋ ابزالدىلىعىن ساۋلەلەندىرىپ، عىلىم - تەحنيكا بايلىقتارىنىڭ جايعاسۋىن بىرىكتىرىپ ساپالىلاندىرىپ، جاڭالىق اشۋ جۇيەسى قۇرىلىسىن مىقتى يگەرىپ، ساپالى ۇيىمداستىرىپ، ءبىر توپ مەملەكەتتىك تاجىريبەحانالار قۇرىپ، ەلىمىز تاجىريبەحانالار جۇيەسىن قالىپتاستىرۋ، جوعارى مەكتەپتەردىڭ عىلمي زەرتتەۋدەگى ماڭىزدى رولىن ساۋلەلەندىرىپ، ماڭىزدى سالالارداعى شەشۋشى وزەكتى تەحنيكالاردان قامال الۋدى ىلگەرىلەتۋ كەرەك. نەگىزدىك زەرتتەۋدى تاباندىلىقپەن كۇشەيتىپ، ەلىمىزدىڭ نەگىزدىك زەرتتەۋ سالاسىنىڭ بەتالىسى مەن دامۋ نىساناسىن ايقىنداپ، نەگىزدىك زەرتتەۋگە ۇسىنىلىمدى ارتتىرىپ، قازىنا، فينانس، سالىق كىرىسى سياقتى جاقتاردا قاجەتتى ساياساتتىق قولداۋ كورسەتىپ، نەگىزدىك زەرتتەۋگە ءتيىمدى تاماشا عىلمي زەرتتەۋ ەكولوگياسىن قالىپتاستىرۋ، عىلمي باعالاۋ جۇيەسىن، شابىتتاندىرۋ مەحانيزمىن ورناتىپ، اقاۋسىزداندىرىپ، باياندى تۇردە ۇزبەي جالعاستىرۋ كەرەك. جاڭالىق اشاتىن دارىندىلاردى تاربيەلەۋدى، باۋلۋدى كۇشەيتىپ، وقۋ - اعارتۋدى اناعۇرلىم ماڭىزدى ورىنعا قويىپ، وقۋ - اعارتۋ ساپاسىن جاپپاي جوعارىلاتۋ، ماتەماتيكا، فيزيكا، حيميا، بيولوگيا سياقتى نەگىزدىك پاندەر قۇرىلىسىن كۇشەيتىپ، شارت - جاعدايى بار جوعارى مەكتەپتەردى نەگىزدىك زەرتتەۋگە، ايقاسپالى پاندەرگە قاتىستى ءپان - ماماندىقتاردى بەلسەنە ورنالاستىرۋعا شابىتتاندىرىپ، نەگىزدىك ءپان بويىنشا تولىق كۋرس وقۋشىلارىن باۋلۋدى كۇشەيتىپ، وقۋشىلاردىڭ جاڭالىق اشۋ تانىمى مەن جاڭالىق اشۋ قابىلەتىن جەتىلدىرۋگە ءمان بەرۋ كەرەك. رەفورماعا سۇيەنە وتىرىپ عىلىم - تەحنيكادا جاڭالىق اشۋدىڭ ومىرشەڭدىگىن قاۋلاتىپ، عىلىم - تەحنيكا ءتۇزىلىسى رەفورماسى ارقىلى جاڭالىق اشۋدىڭ وراسان زور كومەسكى كۇشىن ءونىمدى تۇردە جارىققا شىعارۋ، ”ديسسەرتاتسياعا قاراۋدى، كاسىپتىك اتاققا قاراۋدى، وقۋ تاريحىنا قاراۋدى، سيلىققا قاراۋدى“ باتىل تالقانداۋ كەرەك. حالىقارالىق عىلىم - تەحنيكالىق سەلبەستىكتى كۇشەيتىپ، الەمدىك جاڭالىق اشۋ ينتەرنەت جەلىسىمەن اناعۇرلىم ىرىقتىلىقپەن توعىسىپ، اشىق سەلبەستىك جاساۋ بارىسىندا وزىندىك عىلىم - تەحنيكالىق جاڭالىق اشۋ قابىلەتىن جوعارىلاتۋ كەرەك.

  شي جينپيڭ بىلاي دەپ اتاپ كورسەتتى: عىلمي جەتىستىكتەر رۋحاني تىرەكتەن ايرىلا المايدى. عالىمدار رۋحى − عىلىم - تەحنيكا قىزمەتكەرلەرىنىڭ ۇزاق ۋاقىتتىق عىلمي پراكتيكادا توپتاعان باعالى رۋحاني بايلىعى. قالىڭ عىلىم - تەحنيكا قىزمەتكەرلەرىنىڭ اۋەلگى ماقساتتى ۇمىتپاي، بورىشتى ەستە بەرىك ساقتاپ، مەملەكەتتىڭ مۇددەسى مەن حالىقتىڭ مۇددەسىن بارىنەن جوعارى قويۋدان جازباي، اعا بۋىن عالىمداردىڭ وتاندى كوكەيدە ساقتايتىن، حالىققا قىزمەت ەتەتىن تاڭداۋلى قاسيەتىنە مۇراگەرلىك ەتىپ جانە ونى ساۋلەلەندىرىپ، ”ەكى بومبى، ءبىر سەرىك“ رۋحىن اسقاقتاتىپ، تاريحي ماڭىزدى تاپسىرمانى ىرىقتىلىقپەن ارقالاپ، وزدەرىنىڭ عىلمي تالپىنىسىن سوتسياليستىك وسىزاماندانعان مەملەكەت قۇرۋ ۇلى ىسىمەن توعىستىرۋىن ءۇمىت ەتەمىن. قالىڭ عىلىم - تەحنيكا قىزمەتكەرلەرى باتىلدىقپەن جاسامپازدىق جاراتۋ سىندى ۇلى مۇرات، اسقاق جىگەر ورناتىپ، باتىلدىقپەن جاڭا نازاريالاردى العا قويىپ، جاڭا سالالاردى اشىپ، جاڭا جولداردى قاراستىرىپ، وزگەشە جاسامپازدىق جاراتۋ، وزگەشە بولۋى جاعىنا كۇش سالۋى كەرەك. جوعارى دەڭگەيلى ءتول جاسامپازدىق جەتىستىكتەرىن كوبىرەك جارىققا شىعارىپ، عىلىم جۇيەسىن ۇزدىكسىز بايىتۋعا جانە دامىتۋعا ۇلەس قوسۋ كەرەك. عىلىم - تەحنيكا قىزمەتكەرلەرىن وزدەرىنىڭ عىلمي زەرتتەۋ ىستەرىنە دەن قويىپ، قاجىرلىلىقپەن زەرتتەپ، قۇر اتاققا بوي ۇرماي، اتاق - ابىرويمەن ەسەپتەسپەۋگە شابىتتاندىرۋ كەرەك. عىلىم - تەحنيكا قىزمەتكەرلەرىنىڭ باتىلدىقپەن ىزدەنىس جاساۋ، ءوزىن عىلىمعا ارناۋ جاندى ىزگى ىستەرىن كەڭىنەن ۇگىتتەۋ كەرەك. قىزىعۋشىلىق − ادامنىڭ تابيعاتى، عىلىمعا قىزىعۋشىلىققا جەتەكتەۋ مەن باۋلۋدى بالا كەزدەن باستاپ يگەرىپ، ولاردىڭ عىلمي بىلىمدەردى كوبىرەك بىلۋىنە، عىلمي ادىستەردى يگەرۋىنە مۇمكىندىك جاساپ، عالىمدىق كومەسكى قابىلەت ازىرلەگەن ءبىر توپ جاستار مەن ورەندەر شوعىرىن قالىپتاستىرۋ كەرەك.

  شي جينپيڭ بىلاي دەپ باسا دارىپتەدى: ءار دارەجەلى پارتكوم مەن ۇكىمەت، سونداي - اق ءار دارەجەلى باسشى كادرلار پارتيا ورتالىق كوميتەتىنىڭ عىلىم - تەحنيكادا جاڭالىق اشۋ جونىندەگى شەشىمدەرىن، ورنالاستىرۋلارىن مۇقيات دايەكتىلەندىرىپ، جاڭالىق اشۋ ارقىلى دامۋعا دەم بەرۋ ستراتەگياسىن ويداعىداي تياناقتاندىرىپ، ەڭبەككە، بىلىمگە، دارىندىلارعا، جاسامپازدىققا قۇرمەت ەتىپ، عىلىمنىڭ دامۋ زاڭدىلىعىنا بويسۇنىپ، عىلىم - تەحنيكادا جاڭالىق اشۋ جەتىستىكتەرىنىڭ ۇزدىكسىز جارىققا شىعۋىن ىلگەرىلەتۋ ءارى ونى رەال وندىرگىش كۇشكە اينالدىرۋ كەرەك. باسشى كادرلار جاڭا عىلمي بىلىمدەردى ۇيرەنۋدى كۇشەيتىپ، الەمدىك عىلىم - تەحنيكانىڭ دامۋ بەتالىسىنا نازار اۋدارۋى كەرەك.

  ديڭ شۋەشياڭ، ليۋ حى، سۇن چۇنلان، چىن شي، حۋاڭ كۇنميڭ، ۋان گاڭ، حى ليفىڭ اڭگىمە ماجىلىسكە قاتىناستى.

  ورتالىقتىڭ پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنداعى جاۋاپتى جولداستار، عالىمدار ۋاكىلدەرى قاتارلىلار اڭگىمە ماجىلىسكە قاتىناستى.

جاۋاپتى رەداكتور: ءاننا اكىمقان قىزى