شي جينپيڭ ورتالىق قازىنا - ەكونوميكا كوميتەتىنىڭ 8 - رەتكى ءماجىلىسىن باسقارىپ اشتى

شي جينپيڭ ورتالىق قازىنا - ەكونوميكا كوميتەتىنىڭ 8 - رەتكى ءماجىلىسىن باسقارىپ اشقاندا بىلاي دەپ باسا دارىپتەدى

وسى زامانعى اينالىم جۇيەسى قۇرىلىسىن ءبىر تۇتاس جوسپارلاپ ىلگەرىلەتىپ، جاڭا دامۋ ارناسىن قالىپتاستىرۋعا پارمەندى تىرەك ازىرلەۋ كەرەك

لي كىچياڭ، ۋاڭ حۋنيڭ، حان جىڭ قاتىناستى

  شينحۋا اگەنتتىگىنىڭ 9 - ايدىڭ 9 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى، ورتالىق قازىنا - ەكونوميكا كوميتەتىنىڭ مەڭگەرۋشىسى شي جينپيڭ 9 - ايدىڭ 9 - كۇنى تۇستەن كەيىن ورتالىق قازىنا - ەكونوميكا كوميتەتىنىڭ 8 - رەتكى ءماجىلىسىن باسقارىپ اشىپ، حالىق شارۋاشىلىعى اينالىمىن ىركىلىسسىزدەندىرۋ جانە وسى زامانعى اينالىم جۇيەسى قۇرىلىسى ماسەلەلەرىن اقىلداستى، پارتيا 19 - قۇرىلتايىنان بەرگى ورتالىق قازىنا - ەكونوميكا كوميتەتى ءماجىلىسى شەشىمدەرىنىڭ، ورنالاستىرۋلارىنىڭ تياناقتانۋ جاعدايىن اقىلداستى. شي جينپيڭ ماجىلىستە ماڭىزدى ءسوز سويلەپ بىلاي دەپ باسا دارىپتەدى: اينالىم جۇيەسى حالىق شارۋاشىلىعىندا نەگىزدىك رول اتقارادى، جاڭا دامۋ ارناسىن قالىپتاستىرۋدا، ءسوز جوق، وسى زامانعى اينالىم جۇيەسىن ماڭىزدى ستراتەگيالىق مىندەت رەتىندە مىقتى يگەرۋ كەرەك. جاڭا دامۋ ۇستانىمىن دايەكتىلەندىرىپ، جوعارى ساپالى دامۋدى ىلگەرىلەتىپ، قامداۋ جاعىنداعى قۇرىلىمدىق رەفورمانى تەرەڭدەتىپ، بازاردىڭ بايلىقتى جايعاستىرۋداعى شەشۋشى رولىن تولىق ساۋلەلەندىرىپ، ۇكىمەتتىڭ رولىن اناعۇرلىم ويداعىداي ساۋلەلەندىرىپ، وسى زامانعى اينالىم جۇيەسىنىڭ قاتتى بولشەك جانە جۇمساق بولشەك قۇرىلىسىن ءبىر تۇتاس جوسپارلاپ ىلگەرىلەتىپ، اينالىمنىڭ جاڭا تەحنيكالارىن، جاڭا كاسىپ كۇيلەرىن، جاڭا ۇلگىلەرىن دامىتىپ، اينالىم سالاسىنداعى تۇزىمدىك جۇيەلەر مەن ولشەمدەردى كەمەلدەندىرىپ، حالىقارالىق باسەكەلىك قابىلەتكە يە وسى زامانعى زات اينالىمى كاسىپورىندارىن جەتىلدىرىپ، ۇلعايتىپ، ەل ءىشى اينالىمىن نەگىز ەتكەن، ەل ءىشى مەن حالىقارا قوس اينالىم ءوزارا جەبەيتىن جاڭا دامۋ ارناسىن ورناتۋعا پارمەندى تىرەك ازىرلەۋ كەرەك.

  جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى، ورتالىق قازىنا - ەكونوميكا كوميتەتىنىڭ ورىنباسار مەڭگەرۋشىسى لي كىچياڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى، ورتالىق قازىنا - ەكونوميكا كوميتەتىنىڭ مۇشەسى ۋاڭ حۋنيڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى، ورتالىق قازىنا - ەكونوميكا كوميتەتىنىڭ مۇشەسى حان جىڭ ماجىلىسكە قاتىناستى.

  ءماجىلىس مەملەكەتتىك دامۋ جانە رەفورما كوميتەتىنىڭ، قاتىناس - تاسىمال مينيسترلىگىنىڭ، ساۋدا مينيسترلىگىنىڭ، جۇڭگو حالىق بانكەسىنىڭ حالىق شارۋاشىلىعىنىڭ اينالىمىن ىركىلىسسىزدەندىرۋ جانە وسى زامانعى اينالىم جۇيەسى قۇرىلىسى جونىندەگى مالىمەتىن تىڭدادى، مەملەكەتتىك دامۋ جانە رەفورما كوميتەتى، عىلىم - تەحنيكا مينيسترلىگى، ونەركاسىپ جانە ينفورماتسيالاندىرۋ مينيسترلىگى، ەكولوگيالىق ورتا مينيسترلىگى، توتەنشە جاعدايلاردى باسقارۋ مينيسترلىگى، جۇڭگو حالىق بانكەسى سياقتى تاراۋلاردىڭ پارتيا 19 - قۇرىلتايىنان بەرگى ورتالىق قازىنا - ەكونوميكا كوميتەتىنىڭ شەشىمدەرىن، ورنالاستىرۋلارىن تياناقتاندىرۋ جاعدايى جونىندەگى مالىمەتىن تىڭدادى.

  ءماجىلىس مىنالاردى اتاپ كورسەتتى: وسى زامانعى اينالىم جۇيەسىن قۇرۋ جاڭا دامۋ ارناسىن قالىپتاستىرۋدا كەلەلى ماڭىز الادى. قوعامدىق ۇدايى ءوندىرىس بارىسىندا اينالىم ونىمدىلىگى مەن ءوندىرىس ونىمدىلىگى بىردەي ماڭىزدى، حالىق شارۋاشىلىعىنىڭ جالپى تۇلعالىق اينالىم ونىمدىلىگىن جوعارىلاتۋدىڭ ماڭىزدى جاعى. جوعارى ءونىمدى اينالىم جۇيەسى اناعۇرلىم كەڭ كولەمدە ءوندىرىس پەن تۇتىنۋدى بايلانىستىرىپ، ايىرباس كولەمىن كەڭەيتىپ، جۇمىس ءبولىسىنىڭ تەرەڭدەۋىن ىلگەرىلەتىپ، ءوندىرىس ونىمدىلىگىن جوعارىلاتىپ، بايلىق جاراتۋدى جەبەيدى. ەل ءىشى اينالىمى مەن حالىقارالىق اينالىمنىڭ ەكەۋى دە جوعارى ءونىمدى وسى زامانعى اينالىم جۇيەسىنەن قول ۇزە المايدى.

  ءماجىلىس مىنالاردى باسا دارىپتەدى: پارتيا 18 - قۇرىلتايىنان بەرى، ەلىمىزدىڭ اينالىم جۇيەسى قۇرىلىسى ايتارلىقتاي ىلگەرىلەۋشىلىككە قول جەتكىزىپ، مەملەكەتتىڭ تىرەكتى اينالىم تورى بىرتىندەپ اقاۋسىزدانىپ، اينالىم سالاسىنداعى جاڭا كاسىپ كۇيلەرى، جاڭا ۇلگىلەر توقتاۋسىز جارىققا شىعىپ، بۇكىل ەل بويىنشا ءبىر تۇتاس ۇلكەن بازار جەدەل قۇرىلىپ، تاۋار مەن فاكتور اينالىمىنىڭ تۇزىمدىك ورتاسى كورنەكتى جاقساردى. جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ بارىسىندا، اينالىم كاسىبى ماڭىزدى رول اتقاردى. سونىمەن بىرگە، ەلىمىز اينالىم جۇيەسىنىڭ وسىزاماندانۋ دەڭگەيى ءالى دە جوعارى بولماي وتىر، اشۋدى كۇتىپ تۇرع−ان ءبىرتالاي كەپتەلىس تۇيىندەرى بار.

  ءماجىلىس مىنالاردى اتاپ كورسەتتى: ەل ىشىندەگى ءبىر تۇتاس ۇلكەن بازاردى جەدەل كەمەلدەندىرىپ، قامداۋ مەن قاجەتسىنۋ ءوزارا جەبەيتىن، ءوندىرۋ مەن ساتۋ قاتار ىلگەرىلەيتىن ۇتىمدى اينالىم قالىپتاستىرىپ، بازارلانعان، زاڭمەن جونگە سالىناتىن، حالىقارالانعان شارۋاشىلىق - ساۋدا ورتاسىن تۇلعالاپ، باسەكە ساياساتىنىڭ رولىن كۇشەيتۋ كەرەك. وسى زامانعى كەشەندى تاسىمال جۇيەسىن قۇرىپ، ءبىر تۇتاس، اشىق قاتىناس - تاسىمال بازارىن قالىپتاستىرىپ، كەشەندى تاسىمال ارنالارىنىڭ ورنالاسۋىن ساپالىلاندىرىپ، كەمەلدەندىرىپ، جوعارى قارقىندى تەمىر جول جۇك تاسىمالى مەن حالىقارالىق اۋە جۇك تاسىمالى قابىلەتى قۇرىلىسىن كۇشەيتىپ، ءىش پەن سىرت ۇلاسقان، حاۋىپسىز، جوعارى ءونىمدى زات اينالىمى تورىن جەدەل قالىپتاستىرۋ كەرەك. وسى زامانعى ساۋدا اينالىمى جۇيەسىن كەمەلدەندىرىپ، الەمدىك باسەكە قابىلەتىنە يە ءبىر توپ وسى زامانعى اينالىم كاسىپورىندارىن جەتىلدىرىپ، سيفرلاندىرىپ، زەردەلىلەندىرىپ جاڭالاۋدى جانە سالالار ارالىق توعىسۋدى ىلگەرىلەتىپ، ولشەمدەندىرۋ قۇرىلىسى مەن جاسىل دامۋدى كۇشەيتىپ، تۇرعىنداردىڭ كۇندەلىكتى تۇرمىسىنا قاتىستى ساۋدا اينالىمى قۇرىلعىلارىنىڭ جاڭالانۋىن، دارەجەسىنىڭ جوعارىلاۋىن، اقاۋسىز دامۋىن قولداۋ كەرەك. قوعامدىق سەنىمدىلىك جۇيەسىن كەمەلدەندىرىپ، ماڭىزدى ونىمدەردىڭ تەگىن قۋزاۋ جۇيەسىن جەدەل ورناتىپ، سەنىمدىلىكتى نەگىز ەتكەن جاڭاشا باقىلاۋ - باسقارۋ مەحانيزمىن ورناتۋ، كەمەلدەندىرۋ كەرەك. تولەۋ، ەسەپ جابۋ سياقتى فينانس نەگىزدىك قۇرىلعىلارى قۇرىلىسىن كۇشەيتىپ، فينانستىڭ قامداۋ جاعىنداعى قۇرىلىمدىق رەفورماسىن تەرەڭدەتىپ، ءارقايسى اينالىم بۋىندارىنداعى شارۋاشىلىق جۇرگىزۋشى تۇلعالارعا تىكە باراتىن اناعۇرلىم كوپ فينانس ونىمدەرىمەن قامداۋ كەرەك. جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋ تاجىريبەلەرىن مۇقيات زەرتتەپ، زاپاس ساقتاۋ جەتكىلىكتى، جەدەل ارەكەتكە كەلەتىن، سوققىعا توتەپ بەرۋ قابىلەتى كۇشتى توتەنشە جاعدايعا توتەپ بەرۋ زات اينالىمى جۇيەسىن جەدەل ورناتۋ كەرەك.

  ءماجىلىس مىنالاردى باسا دارىپتەدى: پارتيا 19 - قۇرىلتايىنان بەرى، ورتالىق قازىنا - ەكونوميكا كوميتەتى ءبىرسىپىرا كەلەلى شەشىمدەر، ورنالاستىرۋلار جاسادى، ءارقايسى تاراۋلار مۇقيات دايەكتىلەندىرىپ، تياناقتاندىرىپ، كوپتەگەن ساياسات - شارالاردى ورتاعا قويدى، بۇل ايتارلىقتاي ناتيجە كورسەتتى. كەزەكتە، ەلىمىز دامۋىنىڭ ىشكى، سىرتقى ورتاسى كۇردەلى، قاتاڭ بولىپ وتىر، كوپتەگەن ماسەلەلەردى، ءسوز جوق، ۇزاق بولاشاقتىق تۇرعىدان، ستراتەگيالىق دەڭگەيدەن جوسپارلاۋ جانە ىلگەرىلەتۋ ارقىلى شەشۋ كەرەك. ورتالىق قازىنا - ەكونوميكا كوميتەتىنىڭ ءماجىلىسى اقىلداسىپ، شەشىم جاساعان ءبىرتالاي ىستەر مەملەكەتتىڭ ەكونوميكالىق، قوعامدىق دامۋىنا ساياتىن ۇزاق بولاشاقتىق، ستراتەگيالىق ءىرى ىستەر. پارتيا ورتالىق كوميتەتىنىڭ ەكونوميكا قىزمەتىنە ورتالىقتانعان ءبىر تۇتاس باسشىلىعىن كۇشەيتىپ، تياناقتاندىرۋدى يگەرۋدەگى ىرىقتىلىق پەن سانالىلىقتى كۇشەيتىپ، پارتيا ورتالىق كوميتەتى جاساعان كەلەلى شەشىمدەردى، ورنالاستىرۋلاردى اناعۇرلىم ويداعىداي تياناقتاندىرۋ كەرەك.

  ءماجىلىس مىنالاردى اتاپ كورسەتتى: ”ەكىنى قورعاۋدى“ ورىنداۋدىڭ تەتىگى ارەكەتتە ايگىلەۋدە باس ماقسات تانىمىن كۇشەيتىپ، دۇرىس ساياسي ناتيجە كوزقاراسىن ورناتىپ، ساياسيدى دارىپتەۋ تۇرعىسىنان تياناقتاندىرۋدى يگەرۋ كەرەك. تياناقتاندىرۋدى يگەرۋدىڭ سالماعى ناقتى ونىمدىلىكتە، باستىسى، ساياسات بەلگىلەگەن كەزدەگى نىسانالاردىڭ جۇزەگە اسقان - اسپاعانىنا قاراۋ كەرەك. پارتيا ورتالىق كوميتەتى جاساعان كەلەلى شەشىمدەردى دەر كەزىندە ناقتى ساياسات پەن زاڭ ەرەجەگە اينالدىرىپ، تاراۋلار ارا سايكەسۋدى، سەلبەسۋدى نىعايتىپ، ستراتەگيالىق بىركەلكىلىكتى كۇشەيتۋ كەرەك. قىزمەتتىڭ اشىق ەسەبىن ورناتىپ، دەر كەزىندە ەسەپتى سالىستىرىپ، تەكسەرىپ، باعالاۋ مەحانيزمىن كەمەلدەندىرىپ، كەلەلى شەشىمدەردىڭ تياناقتانۋ جاعدايىن قۋزاۋ - تەكسەرۋدى ويداعىداي يگەرۋ كەرەك.

  ورتالىق قازىنا - ەكونوميكا كوميتەتىنىڭ مۇشەلەرى ماجىلىسكە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار ماجىلىسكە سىرتتاي قاتىناستى.

جاۋاپتى رەداكتور: ءاننا اكىمقان قىزى