قىزمەت اترەتى قىستاق تۇرعىندارىنىڭ قاۋىن - قاربىز جيناۋىنا كومەكتەستى

  تيانشان تورىنىڭ حابارى (حابارىن جازعان ەرىكتى تىلشىلەر جاڭ يۇنفي، ما ۋىنتيڭ). قازىر، قاۋىن - قاربىز پىساتىن تاماشا مەزگىل، كەزەكتە شينجياڭ سانجى حۇيزۋ اۆتونوميالى وبلىسى جەمسارى اۋدانى بەيتيڭ قالاشىعى ەككەن قاۋىن ـ قاربىز جالپى بەتتىك جينالىپ، بازارعا سالىندى.

  8 - ايدىڭ 29 - كۇنى تاڭەرتەڭ ەرتە، جەمسارى اۋداندىق حالىق قۇرىلتايى تۇراقتى كوميتەتىنىڭ بەيتيڭ قالاشىعى شاڭحۋ قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ مۇشەلەرى مەن قىستاق ”ەكى كوميتەتىنىڭ“ مۇشەلەرى قىستاق تۇرعىنى پان جينجۇن وتباسىنىڭ قاۋىن ـ قاربىزىن جيناسۋعا كەلدى ءارى وعان كومەكتەسىپ ءىرى تاپسىرىسقا بايلانىس جاسادى.

  پان جينجۇن بەيتيڭ قالاشىعى شاڭحۋ قىستاعىنىڭ ديقانى، بيىل 6 مۋدان استام جەرگە قاۋىن ەكتى، اتىزداعى قاۋىنى تولىق پىسقانىمەن ساتۋ جولىن تابا الماي قينالادى.

  ”بۇگىن قىزمەت اترەتى 10 توننالىق تاپسىرىسقا حابارلاسىپ بەردى، قىزمەت اترەتىنىڭ مۇشەلەرى مەن قىستاق كادرلارى تاڭ بوزىنان كەلىپ، كومەكتەسىپ قاۋىن جيناسىپ، تۇستەن كەيىن باسىپ اكەتۋىنە ۇلگىرتتى“،- دەدى فان جينجۇن قۋانا، ”قىزمەت اترەتىنە ەرەكشە العىس ايتامىن، ءبىز سياقتى كەمپىر - شالدىڭ قيىنشىلىعىن شەشىپ، ۋايىمنان ارىلتتى“. قىزمەت اترەتىنىڭ كومەگىندە، پان جينجيۇن 18 توننا قاۋىن جيىپ، 30 مىڭ يۋاننان استام كىرىس كىرگىزدى.

  ”قىستاق تۇرعىندارىنىڭ قاۋىن ـ قاربىز ساتۋىنا كومەكتەسۋ قىزمەت اترەتىنىڭ ەڭ ماڭىزدى جۇمىسى، اترەت مۇشەلەرىنىڭ كەيبىرەۋى جيناپ الۋعا كومەكتەسسە، كەيبىرەۋى تەلەفون ارقىلى تاپسىرىسقا بايلانىس جاساپ بەردى. ”قىستاق تۇرعىندارىنىڭ ابىرجىعانىن كورگەندە، ءبىز ءتىپتى دە الاڭدادىق، كەشە ٴبىر كۇندە 25 توننا قاۋىن باستىق. قىستاق تۇرعىندارىنىڭ قيىنشىلىعى شەشىلسە، ٴبىزدىڭ بەرگەن بوداۋىمىزدىڭ وتەلگەنى“،- دەدى باتىس شاڭحۋ قىستاعى پارتيا ۇيىمىنىڭ ٴبىرىنشى شۋجيى، قىزمەت اترەتىنىڭ باستىعى ۋاڭ رۇنشياڭ.

جاۋاپتى رەداكتور: ءاننا اكىمقان قىزى