جۇڭگو مەن نەپالدىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعى بايلانىسىمەن شي جينپيڭ مەن نەپال زۇڭتۇڭى بانداري ءوزارا قۇتتىقتاۋ تەلەگرامماسىن جولدادى

لي كىچياڭ مەن نەپال زۇڭليى ولي ءوزارا قۇتتىقتاۋ تەلەگرامماسىن جولدادى

  شينحۋا اگەنتتىگىنىڭ 8 - ايدىڭ 1 - كۇنى بەيجيڭنەن بەرگەن حابارى. 8 - ايدىڭ 1 - كۇنى مەملەكەت ءتوراعاسى شي جينپيڭ مەن نەپال زۇڭتۇڭى بانداري ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعىن قىزۋ قۇتتىقتادى.

  شي جينپيڭ قۇتتىقتاۋ تەلەگرامماسىندا بىلاي دەپ اتاپ كورسەتتى: جۇڭگو مەن نەپالدىڭ دوستىعى تەرەڭنەن تامىر الىپ، ۇزاقتان جالعاسىپ، ۋاقىت وتكەن سايىن جاڭارىپ كەلەدى. ديپلوماتيالىق قارىم - قاتىناس ورناتقان 65 جىلدان بەرى، ەكى ەل قاشاندا ءبىرىن - ءبىرى قۇرمەت ەتىپ، تەڭ تۇرعىدا مامىلە جاساپ، ساياسيداعى ءوزارا سەنىمدىلىكتى نىعايتىپ، ءوزارا ءتيىمدى سەلبەستىكتى تەرەڭدەتىپ كەلەدى. بىلتىر بانداري زۇڭتۇڭ ەكەۋىمىز ءوزارا ساپاردا بولىپ، ەكى ەل قارىم - قاتىناسىن دامۋ مەن گۇلدەنۋگە بەت العان ۇرپاقتار بويى دوس وتەتىن ستراتەگيالىق سەلبەستىك سەرىكتەستىك قارىم - قاتىناسقا كوتەردىك. ەكى ەل قيىندىقتى بىلەك بىرىكتىرە جەڭىپ، ءبىر - بىرىنە قارايلاسىپ، ءوزارا دەم بەرىپ كەلەدى، سونداي - اق جاڭا تيپتى ايدارشا ۆيرۋس وكپە قابىنۋ ىندەتىنە تىزە قوسا قارسى اتتانىپ، جۇڭگو - نەپال دوستىعىنىڭ جاڭا تاراۋىن جازدى. مەن جۇڭگو - نەپال قارىم - قاتىناسىن دامىتۋعا ايرىقشا ءمان بەرەمىن، بانداري زۇڭتۇڭمەن بىرگە قۇلشىنىپ، ەكى ەل قارىم - قاتىناسىنىڭ ۇزدىكسىز الدىعا قادام تاستاۋىن ىلگەرىلەتىپ، ەكى ەل حالقىنا اناعۇرلىم كوپ ىرىس - قۇت اكەلىپ، ءوڭىردىڭ ورنىقتىلىعى مەن دامۋىنا بەلسەندى كۇش قوسۋدى قالايمىن.

  بانداري قۇتتىقتاۋ تەلەگرامماسىندا مىنانى ءبىلدىردى: نەپال مەن جۇڭگونىڭ دوستىعى تەرەڭنەن تامىر الىپ، ۇزاقتان جالعاسقان، مىعىم نەگىزگە يە. ديپلوماتيالىق قارىم - قاتىناس ورناتقاننان بەرى، ەكى ەل قارىم - قاتىناسى ايتارلىقتاي كەڭەيدى جانە تەرەڭدەدى. نەپال جاق جۇڭگو جاق ورتاعا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن قارسى الادى، ”ءبىر بەلدەۋ، ءبىر جولدى“ بىرگە قۇرۋ سەلبەستىگىنە بەلسەنە ات سالىسادى. نەپال جاق جۇڭگو جاقتىڭ ۇتىمدى شارا قولدانىپ جاڭا تيپتى ايدارشا ۆيرۋس وكپە قابىنۋ ىندەتىن تىزگىندەگەندىگىن القايدى، جۇڭگو جاقتىڭ نەپالدىڭ ىندەتكە قارسى اتتانۋىنا كورسەتكەن قىمباتتى قولداۋىنا شىن جۇرەكتەن العىس ايتادى. نەپال جاق جۇڭگو جاقپەن بىرگە قۇلشىنىپ، ەكى ەل مەملەكەت باسشىلارى قول جەتكىزگەن كەڭ ورتاق تانىمدى جالپى بەتتىك تياناقتاندىرىپ، ەكى ەلدى جانە ەكى ەل حالقىن باقىتقا كەنەلتۋدى قالايدى.

  سول كۇنى مەملەكەتتىك كەڭەستىڭ زۇڭليى لي كىچياڭ مەن نەپالدىڭ زۇڭليى ولي دە ءوزارا قۇتتىقتاۋ تەلەگرامماسىن جولدادى. لي كىچياڭ قۇتتىقتاۋ تەلەگرامماسىندا بىلاي دەدى: بيىل جىل باسىنان بەرى، جۇڭگو مەن نەپال ەكى جاق جاڭا تيپتى ايدارشا ۆيرۋس وكپە قابىنۋ ىندەتىنە قول ۇستاسا قارسى اتتانىپ، ەكى ەلدىڭ ءوزارا سەنىمى مەن دوستىعىن ونان ارى نىعايتتى. جۇڭگو جاق نەپال جاقپەن بىرلەسە وتىرىپ، ءار سالاداعى جان - جاقتى سەلبەستىكتى كۇشەيتىپ، ”ءبىر بەلدەۋ، ءبىر جولدى“ جوعارى ساپادا بىرگە قۇرىپ، ەكى ەل قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايدى. ولي قۇتتىقتاۋ تەلەگرامماسىندا مىنانى ءبىلدىردى: ديپلوماتيالىق قارىم - قاتىناس ورناتقاننان بەرى، ەكى ەل قارىم - قاتىناسى ۇزدىكسىز، ورنىقتى، اقاۋسىز العا دامىدى. نەپال جاق جۇڭگو جاقتىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋىنا قولداۋ كورسەتكەندىگىنە العىس ايتادى، جۇڭگو جاقپەن تىعىز سەلبەسىپ، ەكونوميكانىڭ قايتا سەرپىلۋىن جۇزەگە اسىرىپ، ەكى جاقتى قارىم - قاتىناستا اناعۇرلىم زور دامۋشىلىققا جەتۋدى ىلگەرىلەتۋدى كۇتەدى.

جاۋاپتى رەداكتور: ءاننا اكىمقان قىزى