جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ، ورتالىق اسكەري ىستەر كوميتەتىنىڭ بەيدوۋ - 3 جەر شارى جاساندى سەرىك جول نۇسقاۋ جۇيەسىنىڭ قۇرىلۋىنا، اشىلۋىنا جولداعان قۇتتىقتاۋ تەلەگرامماسى

بەيدوۋ - 3 جەر شارى جاساندى سەرىك جول نۇسقاۋ جۇيەسىن زەرتتەۋگە قاتىناسقان، قۇرۋعا قاتىناسقان ورىندار جانە بارشا جولداستار:

  بەيدوۋ - 3 جەر شارى جاساندى سەرىك جول نۇسقاۋ جۇيەسىن قۇرۋ جۇمىسى باستالعاننان بەرى، زەرتتەۋگە قاتىناسقان، قۇرۋعا قاتىناسقان ورىندار مەن بارشا جولداستار باستان - اياق عارىش ىستەرىندە وتاننىڭ ءۇمىتىن اقتاۋ، عىلىم - تەحنيكا ارقىلى مەملەكەتتى قۇدىرەتتەندىرۋ بورىشىن ۇستىنە الىپ، ىنتىماقتاسا سەلبەسىپ، قاجىرلىلىقپەن ايانباي كۇرەسىپ، كۇش بىرىكتىرە جاڭالىق اشىپ، قامال الىپ، قيىندىقتاردى ەڭسەرىپ، جاڭا تيپتى ايدارشا ۆيرۋس وكپە قابىنۋ ىندەتىنىڭ ىقپالىن تابىستى تۇردە جەڭىپ، جۇيە قۇرىلىسىن كۇن ىلگەرى ورىنداپ، ەلىمىزدىڭ دەربەس، ءوز - وزىنە قوجايىن بولعان، اشىق، سيىسىمدى جەر شارى جاساندى سەرىك جول نۇسقاۋ جۇيەسىن قۇرىپ شىقتى، جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى سىزدەردى قىزۋ قۇتتىقتايدى جانە سىزدەردەن شىن ىقىلاسپەن حال سۇرايدى!

  بەيدۋ - 3 جەر شارى جاساندى سەرىك جول نۇسقاۋ جۇيەسىنىڭ قۇرىلۋى، اشىلۋى − ەلىمىزدىڭ عىلىم - تەحنيكانىڭ شىڭىنا شىعىپ، عارىش ىستەرىندە قۋاتتى ەل بولۋعا قادام تاستاۋىنداعى ماڭىزدى بەلەس، ەلىمىزدىڭ الەمدىك الەۋمەتتىك قىزمەت وتەۋ نەگىزدىك قۇرىلعى قۇرىلىسىنا قوسقان ماڭىزدى ۇلەسى، جۇڭگوشا سوتسياليزم جاڭا داۋىرگە وتكەندە قول جەتكىزگەن كەلەلى نىشاندىق ستراتەگيالىق جەتىستىك، وعان ءار بۋىن عارىش ىستەرى ادامدارىنىڭ ءبىرىنىڭ ءىزىن ءبىرى باسا كۇرەس جۇرگىزگەن ماڭداي تەرى سىڭگەن، جۇڭحۋا ۇلتىنىڭ ءوزىن تىنباي الۋەتتەندىرەتىن قاسيەتى قامتىلعان، ەلىمىزدىڭ سوتسياليستىك وسىزامانداندىرۋ قۇرىلىسىن ىلگەرىلەتۋدە جانە ادامزاتتىڭ تاعدىرلاس ورتاق تۇلعاسىن ورناتۋدى ىلگەرىلەتۋدە كەلەلى ءارى تەرەڭ مانگە يە. بۇل ءبىزدىڭ شي جينپيڭنىڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە جاڭاشا بۇكىل ەلدىك جۇمىلۋ ءتۇزىلىسىنىڭ ابزالدىلىعىن تولىق ساۋلەلەندىرىپ، جۇڭگوشا ەرەكشەلىككە يە دەربەس جاڭالىق اشۋ جولىنان اۋىتقىماي ءجۇرۋدىڭ جاڭا ساپارىندا قول جەتكىزگەن تاعى ءبىر ۇلى جەڭىسىمىز، بۇل، ءسوز جوق، بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن ”ءتورت تانىمدى“ ونان ارى كۇشەيتۋگە، ”ءتورت سەنىمدى“ بەكەمدەۋگە، ”ەكىنى قورعاۋدى“ ورىنداۋعا، قايراتتانا ىسكەرلىك كورسەتەتىن رۋحاني كۇيمەن، ەسىل شاقتاردى زايا جىبەرمەيتىن داۋىرلىك جاۋاپكەرشىلىك ارقالاۋمەن، ناقتى ىستەر ىستەۋ مەملەكەتتى گۇلدەندىرەتىن بەكىممەن، ەرىك - جىگەرمەن جاڭا داۋىردەگى جۇڭگوشا سوتسياليزم ىستەرىنىڭ جاڭا جاعدايىن قۇلشىنا اشۋعا ىنتالاندىرادى. وتان مەن حالىق سىزدەردىڭ تاريحي ەڭبەكتەرىڭىزدى ماڭگى جادىندا ساقتايدى!

  جۇلدىز جامىراعان اسپانعا قاراساق، بەيدوۋ ەرەكشە نۇر شاشىپ تۇر، نىق باسقان بايسالدى قادام ءبىزدى الىسقا جەتەكتەيدى. بەيدوۋ جاساندى سەرىك جول نۇسقاۋ جۇيەسى الەمدىك قىزمەت وتەۋدىڭ جاڭا كەزەڭىنە ءوتتى، بەيدوۋ جۇيەسىن ىشكەرىلەي قولدانۋدى كەڭ بولاشاق جانە شىت جاڭا سىن - سايىس كۇتىپ تۇر، اناعۇرلىم كەمەلدى بەيدوۋ جالپىلىق ورىن بەلگىلەۋ، جول نۇسقاۋ، ۋاقىت قىزمەتى جۇيەسىن ورناتۋ سياقتى كەيىنگى مىندەتتەر ءالى دە زور، ماشاقاتتى، كۇردەلى، اۋىر. سىزدەردىڭ شي جينپيڭ جولداستى ۇيتقى ەتكەن پارتيا ورتالىق كوميەتىنىڭ توڭىرەگىنە تىعىز ىنتىماقتاسىپ، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 19 - قۇرىلتايىنىڭ جانە 19 - كەزەكتى ورتالىق كوميتەتىنىڭ ەكىنشى، ءۇشىنشى، ءتورتىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ”بەستى ءبىر تۇلعالاندىرۋ“ جالپىلىق ورنالاستىرۋىن ءبىر تۇتاس جوسپارلاپ ىلگەرىلەتۋدى جانە ”ءتورتتى جاپپاي ورىنداۋ“ ستراتەگيالىق ورنالاستىرۋىن سايكەستى ىلگەرىلەتۋدى تىعىز ارقاۋ ەتىپ، ”دەربەس جاڭالىق اشۋ، اشىق بولۋ جانە توعىستىرۋ، بارشا ادام ءبىر نيەتپەن جۇمىلۋ، بىرەگەي بولۋعا تالپىنۋ“ سىندى جاڭا ءداۋىر بەيدوۋ رۋحىن زور كۇشپەن اسقاقتاتىپ، اۋەلگى ماقساتتى ۇمىتپاي، بورىشى ەستە بەرىك ساقتاپ، قاجىماي - تالماي ىزدەنىس جاساپ، ۇدەرە العا باسىپ، ”قوس 100 جىلدىق“ كۇرەس نىساناسىن جۇزەگە اسىرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ ءۇشىن تىڭ، اناعۇرلىم زور ۇلەس قوسۋلارىڭىزدى ءۇمىت ەتەمىز!

  جۇڭگو كوممۋنيستىك پارتياسى ورتالىق كوميتەتى

  مەملەكەتتىك كەڭەس

  ورتالىق اسكەري ىستەر كوميتەتى

  2020 - جىلى 7 - ايدىڭ 31 - كۇنى

  (شينحۋا اگەنتتىگىنىڭ 7 - ايدىڭ 31 - كۇنى بەيجيڭنەن بەرگەن حابارى)

جاۋاپتى رەداكتور: ءاننا اكىمقان قىزى