ءداستۇرلى ءسۇت ونىمىنە سۇيەنىپ كىرىسىن ارتتىردى

  پراكتيكانت جۇلدىز قۇماربەك قىزى حابارلايدى. 7 ـ ايدىڭ 10 ـ كۇنى، ءبىز التاي قالاسى سارقۋسىن اۋىلى كۇرتى قىستاعىنىڭ تۇرعىنى ءماريا شۇكىروللا قىزىنىڭ وتباسىنا بارعانىمىزدا، اۋلاداعى كوك ءتۇستى بولات سورەگە قاز ـ قاتار ءتىزىلىپ كەپتىرىلگەن قۇرتتى كوردىك. 2 كيلوگرام قۇرت ساتىپ العان ساياحاتشى الما ءنۇريلا قىزى تىلشىگە: قۇرت وتە ءدامدى، ۇيدەگىلەر ءسۇيىپ جەيدى. شەشەم ماعان قۇرت ساتىپ الا كەل دەپ تاپسىرعان ەدى ـ دەدى.

  قۇرت ـ ىرىمشىك، سارماي قاتارلى ءسۇت ءونىمى قازاق ۇلتىنىڭ ءداستۇرلى تاعامدارىنىڭ ءبىرى. ءماريا تىلشىگە: كادىمگى تابيعي قۇرتتان سىرت، شەكەر قوسىپ ءتاتتى قۇرت جاسايمىز. قۇرتتىڭ قورەكتىك قۋاتى وتە جوعارى بولعاندىقتان، ساياحاتشىلاردىڭ قىزۋ قارسى الۋىنا يە بولدى ـ دەدى.

  تاياۋ جىلداردان بەرى، ايماقتىڭ ساياحات كاسىبىنىڭ دامۋىنا ىلەسە، كوپتەگەن ساياحاتشىلاردىڭ بايىرعى ەكولوگيالىق ءداستۇرلى ءدامدى تاعامعا دەگەن قۇشتارلىعى ارتا ءتۇستى. جاقىنعى 2 جىلدان بەرى، ءماريا ورايدى مىقتى يگەرىپ، قۇرت جانە سارماي قاتارلى ءونىمدى ۇيىندە ساتىپ كەلەدى.

  ءماريا تىلشىگە: قۇرت، سارماي الۋ ءبىرشاما اۋرە جۇمىس، ۇيتىلعان ايراندى جانە پىسىرىلعان ءسۇتتى بىرنەشە كۇن ساباعا جيامىز. سابانىڭ سيىمدىلىعىنا قاراي پىسەتىن كەزدە ءبىراز ءسۇتتى جىلىتىپ ساباداعى ايراننىڭ ۇستىنە قۇيىپ پىسەمىز. بىرنەشە ساعات پىسكەننەن كەيىن ساباداعى ايراننىڭ بەتىنە ماي تۇسەدى، سارمايدى ايىرىپ العاننان كەيىن قالعان ىركىتتى قازانعا قۇيىپ 2 دە 3 ساعات قايناتامىز، ىركىت قايناي ـ قايناي ابدەن قويىلادى، قويىلعان ىركىتتى داكىدەن تىگىلگەن دورباعا قۇيىپ اسىپ قويىپ سۇزەمىز، سۋى ءسۇزىلىپ بولعاننان كەيىن قۇرتتى شيدەن توقىلعان سورەگە جايىپ كەپتىرەمىز ـ دەدى.

  ءماريا كوڭىلدى بەينەدە تىلشىگە: قولىمىزدا 6 سيىر بار. ءبىر سيىردان كۇنىنە ورتا ەسەپپەن 5 كيلوگرام ءسۇت شىعادى. مەن 2 دە 3 كۇندە 50 كيلوگرام مولشەرىندەگى ءسۇتتى ءپىسىپ، ودان قۇرت جانە سارماي الامىن. قازىر قۇرتتىڭ بازارداعى باعاسى ءار كيلوگرامى 90 يۋان اينالاسىندا. سارمايدىڭ باعاسى 85 تە 90 يۋان. ءسۇت ونىمىنەن ايىنا 2000 يۋان اينالاسىندا كىرىس كىرگىزەمىن. بىلتىر قۇرت ساتىپ 6000 يۋاننان استام كىرىس كىرگىزدىم ـ دەدى.

  ءماريا شۇكىروللا قىزى سياقتى قۇرت جانە سارماي قاتارلى ءداستۇرلى ءسۇت ءونىمىن ساتىپ كىرىس كىرگىزىپ وتىرعان ەگىنشى ـ مالشىلاردىڭ سانى بارعان سايىن كوبەيۋدە. ول قازىر ءسۇت ءونىمىن ءۇنحات ارقىلى قالاداعى جانە باسقا جەردەگى تۇتىنۋشىلارعا ساتىپ وتىر ەكەن.

جاۋاپتى رەداكتور: ءاننا اكىمقان قىزى