ايماق تاياۋدا ءسۇت شارۋاشىلىعى قوعامىن قۇرادى

  التاي گازەتىنىڭ ءتىلشىسى دۋ پىڭفي مەن ەرىكتى ءتىلشى لو پىڭفي حابارلايدى. 7 ـ ايدىڭ 14 ـ كۇنى، ءتىلشىنىڭ ايماقتىق اۋىل شارۋاشىلىعى، اۋىل ـ قىستاق مەكەمەسىنەن ۇعىسۋىنشا، ءسۇت شارۋاشىلىعىنىڭ دامۋىن جەبەۋ ءۇشىن، ايماق تاياۋدا، ءسۇت شارۋاشىلىعى قوعامىن قۇرادى ەكەن. سول كەزدە بۇل قوعام ءسۇت شارۋاشىلىعى اۋىس ـ كۇيىسىنىڭ ماڭىزدى دانەكەرىنە اينالىپ، كاسىپورىنداردىڭ ءادىل باسەكەسىن جەبەۋگە، ءسۇت قاينارىنىڭ ساپاسىن جوعارىلاتۋعا، ءسۇت بازارىنىڭ ارەكەتىن ارناعا تۇسىرۋگە، ءسۇت شارۋاشىلىعى كاسىبىنىڭ ماركاسىن جاراتۋعا،ءسۇت شارۋاشىلىعىمەن شۇعىلداناتىن شارۋالار مەن ءسۇت شارۋاشىلىعى كاسىپورىندارىنىڭ بارىس ـ كەلىسىن جالعاستىرۋعا كۇش سالىپ، التاي ءسۇت شارۋاشىلىعىنىڭ جوعارى ساپالى دامۋىن جەبەيدى.

  ءسۇت شارۋاشىلىعى اقاۋسىز جۇڭگونى قۇرۋدا، ۇلتتى قۇدىرەتتەندىرۋدە كەم بولسا بولمايتىن كاسىپ. ازىق ـ تۇلىك حاۋىپسىزدىگىندەگى ۋاكىلدىك سيپاتتى كاسىپ، اۋىل شارۋاشىلىعىن وسىزامانداندىرۋداعى بەلگى سيپاتتى كاسىپ، 1 ـ، 2 ـ، 3 ـ كاسىپتى سايكەستىرىپ دامىتۋداعى ستراتەگيالىق كاسىپ. ايماقتىڭ مال شارۋاشىلىعىن كاسىپ سالالاندىرۋىنىڭ ماڭىزدى قۇرامداس بولەگى بولعان ءسۇت شارۋاشىلىعى ەگىنشى ـ مالشىلاردىڭ كەدەيلىكتەن ارىلىپ، اۋقاتتانۋىنداعى ماڭىزدى كاسىپ سانالادى. تاياۋ جىلداردان بەرى، ايماق مەملەكەتتىڭ ”ءسۇت شارۋاشىلىعىن گۇلدەندىرۋ جوسپارى“ ءتيىمدى ورايىن مىقتى يگەرىپ، ەلدەن ەرەك تابيعي بايلىق ابزالدىلىعىن جانە مال باعىمشىلىعىمەن ۇزاق ۋاقىت اينالىسۋ ابزالدىلىعىن تولىق ساۋلەلەندىرىپ، ءسۇت شارۋاشىلىعىن گۇلدەندىرۋدى كاسىپ قۇرىلىمىن تەڭشەۋدىڭ ماڭىزدى مازمۇنى ەتىپ، ولشەمدەنگەن، كولەمدەنگەن باعىمشىلىق جانە ساپالى ءسۇت بازاسى قۇرىلىسىن كۇش سالا ىلگەرىلەتىپ، ايماعىمىزدىڭ ءسۇت شارۋاشىلىعىنىڭ دامۋ ساپاسى مەن باسەكەلىك قۋاتىن شىنايى كۇشەيتتى.

  ايماقتىق پارتكوم اۋىل ـ قىستاق قىزمەت كەڭسەسىنىڭ ۇنەمىلىك ىستەرگە جاۋاپتى ورىنباسار مەڭگەرۋشىسى، ايماقتىق اۋىل شارۋاشىلىعى، اۋىل ـ قىستاق مەكەمەسى پارتگرۋپپاسىنىڭ ورىنباسار شۋجيى ۋىن شياۋپيڭ تىلشىگە: ءوندىرىس تيجارات ءتاسىلى مەشەۋ، ءسۇت ءونىمىن مانەرلەۋ ونىمدىلىگى تومەن، تاۋاردىڭ ساتىلۋ مولشەرى مەن ەكونوميكالىق ونىمدىلىگى تومەن بولۋ قاتارلى ماسەلەلەر ايماعىمىز ءسۇت شارۋاشىلىعىنىڭ دامۋىنا توسالعى بولىپ كەلدى. ماشينامەن شوعىرلى ساۋۋ جاپپاي جولعا قويىلىپ، ٴسۇت شارۋاشىلىعىمەن شۇعىلداناتىن شارۋالار، ءسۇت جيناۋشى دانەكەر، ءسۇت كاسىپورىندارى اراسىندا ورتاق يگىلىكتەنۋ سىندى مۇددە مەحانيزمىن ورناتىپ جانە كەمەلدەندىرۋ، ءسۇت ساپاسى ماسەلەسىن شەشۋدىڭ شەشۋشى تۇيىنىنە اينالدى ـ دەدى.

  جاڭا جاعداي، جاڭا مىندەت الدىندا ايماق ءسۇت شارۋاشىلىعىن دامىتۋدا ءبىر جاعىنان اۆتونوميالى رايوننىڭ ءسۇت شارۋاشىلىعىن گۇلدەندىرۋ ارەكەت جوباسىنىڭ تالابى بويىنشا بىرتىندەپ ىلگەرىلەتتى. ەندى ءبىر جاعىنان ايماقتىڭ ءسۇت ساتىپ الۋ ولشەمىن بەلگىلەپ، ءسۇت قاينارىنىڭ ساپا وتكەلىن دە مىقتى يگەرۋ ارقىلى ءسۇت شارۋاشىلىعىنىڭ دامۋىنداعى ءالسىز بۋىندار مەن كورنەكتى ماسەلەلەردى شەشىپ، ءسۇت شارۋاشىلىعىنىڭ جوعارى ساپالى دامۋىن جاپپاي ىلگەرىلەتتى. سول سەبەپتى دە، ءسۇت شارۋاشىلىعى قوعامىن قۇرۋ كەزەك كۇتتىرمەيتىن ماسەلەگە اينالدى.

  ايماقتىق اۋىل شارۋاشىلىعى، اۋىل ـ قىستاق مەكەمەسىنىڭ ءسۇت شارۋاشىلىعى كاسىبىنە جاۋاپتى ادامى جاۋ ديڭفا تىلشىگە: كەلەسى قادامدا ءسۇت شارۋاشىلىعى قوعامىن قۇرۋمەن بىرگە، ”سيىر، قوي، تۇيە، جىلقى، ەسەك“سىندى 5 ۇلكەن كاسىپ جۇيەسى قۇرىلىسىن ارقاۋ ەتىپ، جايلىم مال شارۋاشىلىعىنىڭ ايگىلى ماركاسىن جاراتۋعا، كولەمىن تىزگىندەۋگە، ٴسۇت ساپاسىنا كەپىلدىك ەتۋگە تاباندى بولامىز. ەگىنشىلىك رايوندارىنداعى مال شارۋاشىلىعىن كولەمدەندىرىپ، ونىمدىلىگىن ارتتىرىپ، وزىندىك قۇنىن تومەندەتۋمەن بىرگە، ۇكىمەتتىڭ، ءسۇت شارۋاشىلىعى كاسىپورىندارىنىڭ، ٴسۇت شارۋاشىلىعىمەن شۇعىلداناتىن شارۋالاردىڭ قاتىناسىن ويداعىداي سايكەستىرىپ، مۇددە مەحانيزمىن كەمەلدەندىرىپ، ءسۇت شارۋاشىلىعىنىڭ ساپا حاۋىپسىزدىگىن باقىلاۋ ـ باسقارۋدى كۇشەيتىپ، ءسۇت قاينارىنىڭ ساپاسىنا كەپىلدىك ەتىپ، ءونىم ساپاسىن جوعارىلاتۋعا كۇش سالامىز ـ دەدى.

  جاقىنعى جىلداردان بەرى، ءسۇت شارۋاشىلىعىنىڭ ۇزدىكسىز دامۋىنا ىلەسىپ، ايماق تۇيە ءسۇتى، جىلقى ٴسۇتى، ەسەك ءسۇتىن نەگىزدىك زەرتتەۋ جانە ءونىمدى زەرتتەپ اشۋ سياقتى سالالاردا بەلگىلى ىلگەرىلەۋشىلىككە قول جەتكىزدى. مەجەمەن ايماقتىڭ بيىلعى ءسۇت ٴتۇرىنىڭ ءونىم مولشەرى 200 مىڭ توننادان اسىپ، 2025 ـ جىلعا بارعاندا جاڭادان ارتقان باعىمداعى سيىر سانى 20 مىڭعا جەتىپ، جاڭادان قوسىلعان ءسۇت ءونىم مولشەرى 60 مىڭ توننادان اسادى، ءسۇت ٴتۇرىنىڭ ءونىم مولشەرى 300 مىڭ تونناعا جەتىپ، ەگىنشىلىك رايوندارىنداعى مالدىڭ باعىم مولشەرى جالپى باعىم مولشەرىنىڭ %55 تەن استامىن ۇستايدى.

جاۋاپتى رەداكتور: ءاننا اكىمقان قىزى