التىن وزەن اڭعارى جولتىعا بارعاندا ...

  التاي گازەتىنىڭ ۇسىنىس ەتىلگەن ءتىلشىسى جۋاڭ شياۋپو حابارلايدى. التاي تاۋىنىڭ ساي ـ سالاسى التىنعا تولى. بۋرىلتوعاي اۋدانى شەكاراسىنداعى جولتى وزەنىنىڭ ”التىن وزەن اڭعارى“ دەگەن اتى بار.

  6 ـ ايدىڭ سوڭىندا، اۆتور تالەيىنە جاراي تىلشىلەر قوسىنىنا ىلەسىپ، تاۋلى ءوڭىردىڭ كورىنىسىن سۋرەتكە ءتۇسىرىپ، جولتى وزەنىنىڭ كوركى كوز سۇرىندىرەتىن التىن وزەن اڭعارىنان تاعى ءبىر رەت ءلاززات الدى. اۆتوكولىك وزەندى بويلاپ العا ىلگەرىلەگەندە كوز ۇشىنداعى بيىك تاۋلارمەن كوك اسپان ءبىرتۇلعالانىپ، اق مامىق بۇلتتار بەينە شوق ـ شوق ماقتا ءتارىزدى تاۋ باسىندا قالىقتايدى؛ وزەن اڭعارى جاسىل ءدالىزى ـــ قاراعاي، ارشا سىندى جاسىل جامىلعىمەن ورانعان؛ سۋدىڭ تۇنىقتىعى سونشالىق، تۇبىندەگى تاستاردا كوزگە بىردەن انىق كورىنەدى.

  ءبىز جول بويى مەملەكەت دارەجەلى ورمان باقشاسى، اراسان ورمان باقشاسىنا باردىق. اراسان ورمان باقشاسى التاي تاۋى بۋرىلتوعاي اۋدانىنىڭ جيىنتاس تاۋلى جەر جايلىمى جاراتىلىستىق قورىعىندا، بۋرىلتوعاي اۋدان قالاشىعىنان 190 كيلومەتر شالعايدا. اراسان ورمان باقشاسىنىڭ جالپى ۇزىندىعى 25 كيلومەتر، تەڭىز دەڭگەيىنەن بيىكتىگى 1310 مەتر. ءۇستىرتتى اراسان تۇرىنە جاتادى. بۇل اراسان ەلىمىزدە سيرەك كەزدەسەتىن رادون بۇلاقتارىنىڭ ءبىرى، شينجياڭداعى ەڭ ءىرى ٴۇستىرتتى اراسان شوعىرى بولىپ ەجەلدەن ەل ءىشى ـ سىرتىنا اتى ايگىلى. بۇل ارانىڭ ورمان بايلىعى مول، اعاش ءتۇرى كوپ، اۋاسى تازا، وتتەگى تەرىس يونىنىڭ مولشەرى جوعارى ادامدى ەرەكشە باۋرايدى. اڭعارعا تۇسكەن اعاش كولەڭكەسى مەن تارام ـ تارام بۇلاق سۋى كوركەم كورىنىس قالىپتاستىرىپ تۇر.

  سول كۇنى كەشتە، اراساندا تۇنەپ، ەرتەسى تاڭەرتەڭ جولتى وزەنىن بويلاپ، ۇزدىكسىز العا ىلگەرىلەدىك. تاۋ اراسانىن قويۋ تۇمان تورلاپ تاعى ءبىر وزگەشە كورىنىس قالىپتاستىردى. بۋداق ـ بۋداق اپپاق قويۋ تۇمان تاڭ شاپاعىمەن بىرگە جوڭكىلىپ، تاۋ بەتكەيىنە قاراي باياۋ جىلجىپ، وزەن اڭعارىنا شوككەن تۇيدەك ـ تۇيدەك مامىق بۇلتتار وزگەشە كوز تارتادى. التىن كۇن اسقاردان باياۋ كوتەرىلگەندە، تاڭعى تۇمان كۇننىڭ شۇلەن شۇعىلاسىمەن شىرمالىپ كوپكە دەيىن تارامادى.

  اسۋدان اسىپ، كوك شالعىنعا كىرگەندە، ەڭ اۋەلى، كوزدىڭ جاۋىن الاتىنى التىن ءتۇستى تۇڭعيىق گۇلى، شۇعىنىق گۇلى. سونىمەن بىرگە، سان ـ ساناقسىز ايگىلى جابايى گۇلدەر بەينە ءبىر ۇلكەن گۇل باقشاسى ءتارىزدى. مىنە، وسى جاپ ـ جاسىل القاپ، قورا ـ قورا قوي، تابىن ـ تابىن سيىر، اق شاعالاداي كيىز ۇيلەرمەن ونان ارى كورىكتەنىپ، بەينە ستەرولىق سۋرەت ءتارىزدى كوركى كوز سۇرىندىرەدى.

جاۋاپتى رەداكتور: ءاننا اكىمقان قىزى