شي جينپيڭ مەن ارگەنتينانىڭ زۇڭتۇڭى فەرناندەز ءوزارا حات جولدادى

  شينحۋا اگەنتتىگىنىڭ 7 - ايدىڭ 7 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ مەن ارگەنتينانىڭ زۇڭتۇڭى فەرناندەز جۋىردا ءوزارا حات جولداپ، ەكى ەلدىڭ جاڭا تيپتى ايدارشا ۆيرۋس وكپە قابىنۋ ىندەتىنە قول ۇستاسا قارسى اتتانۋى، ءار سالاداعى ناقتى سەلبەستىكتەردى كۇشەيتۋى جونىندە پىكىر اۋىستىردى.

  شي جينپيڭ بىلاي دەپ باسا دارىپتەدى: ىندەت الدىندا جۇڭگو - ارگەنتينا حالىقتارى قيىندىقتى بىلەك بىرىكتىرە جەڭىپ، ءوزارا قولداۋ كورسەتىپ، ەكى ەل حالىقتارىنىڭ تەرەڭ دوستىق سۇيىسپەنشىلىگىن ايگىلەدى. قازىر جۇڭگو جانە ارگەنتينا سياقتى لاتىن امەريكا ەلدەرى تۇگەلدەي ىندەتكە قارسى اتتانۋدىڭ، ەكونوميكانى ورنىقتىرۋدىڭ، حالىق تۇرمىسىن قامتاماسىز ەتۋدىڭ جاپالى دا اۋىر مىندەتىنە ءدوپ كەلىپ وتىر. جۇڭگو جاق ۇزدىكسىز تۇردە ارگەنتينامەن ىندەتكە قارسى اتتانۋ جاعىنداعى سەلبەستىكتى بەلسەندىلىكپەن ورىستەتۋدى ءارى ارگەنتيناعا قولىنان كەلگەنىنشە كومەك كورسەتۋدى قالايدى. شي جينپيڭ بىلاي دەپ باسا دارىپتەدى: جۇڭگو جاق ارگەنتينا جاقتىڭ مەملەكەتتىڭ ورنىقتىلىعى مەن دامۋىن قورعاۋ جولىندا جاساعان قۇلشىنىسىن تاباندىلىقپەن قولدايدى، ەكى ەلدىڭ ءار سالاداعى دوستىق اۋىس - كۇيىسى مەن ناقتى سەلبەستىگىن تەرەڭدەتىپ، جۇڭگو - ارگەنتينا جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى.

  فەرناندەز مىنالاردى ءبىلدىردى: جۇڭگو ۇكىمەتى مەن حالقىنىڭ ىندەتكە توتەپ بەرۋ جولىندا جاساعان وراسان زور قۇلشىنىسىنا جانە حالىقارانىڭ ىندەتكە قارسى اتتانۋ كۇرەسىندە اتقارعان باسشىلىق رولىنا العىس ايتامىن، جۇڭگو جاقتىڭ ارگەنتينا جاققا كومەك بەرگەندىگىنە ەرەكشە العىس ايتامىن. ناعىز سۇيىسپەنشىلىك قيىنشىلىققا جولىققاندا ايگىلەنەدى، وسى ەرەكشە ساتتە، ءبىز جۇڭگو مەن ارگەنتينا دوستىعىنىڭ تەرەڭدىگىن ابدەن سەزىندىك. مەن ءبىزدىڭ ەكى ەل قارىم - قاتىناسىنىڭ شۇعىلالى مەزگىلىن اشاتىندىعىمىزعا، ارگەنتينا - جۇڭگو جان - جاقتى ستراتەگيالىق سەرىكتەستىك قارىم - قاتىناسىنىڭ، سونداي - اق كوپ جاقتى سەلبەستىكتىڭ ىشكەرىلەي تەرەڭدەيتىندىگىنە كامىل سەنەمىن.

جاۋاپتى رەداكتور: ءاننا اكىمقان قىزى