بال اراسىن باعىپ كەدەيلىكتەن ارىلدى

  التاي گازەتىنىڭ ءتىلشىسى گۇلناز حابارلايدى. قاناس كورىنىس رايونىنىڭ قوم ـ قاناس موڭعۇل ۇلتتىق اۋىلى پارتيا قۇرىلىسىن جەتەكشى، قىستاقتاعى ەگىنشى ـ مالشىلاردىڭ كاسىپتىك سەلبەستىك كووپەراتيۆىن دانەكەر، اۋىل ـ قىستاق ساياحاتىن تۇعىر ەتىپ، ”سەلبەستىك كووپەراتيۆى + كەدەي وتباسى“ تيجارات ۇلگىسىن قولدانىپ، بال اراسىن باعىپ كەدەيلىكتەن ارىلتۋدان قامال الۋعا دەمبەردى.

  7 ـ ايدىڭ 4 ـ كۇنى ءتىلشى قاناس كورىنىس رايونى التاي تاۋى قارا ارا باعىمشىلىق شارۋالار كاسىپتىك سەلبەستىك كووپەراتيۆىنەن كورىنىس رايونىنداعى جايقالعان قىر گۇلىنەن شىرىن جيناپ جۇرگەن توپ ـ توپ بال اراسىن باپتاپ جۇرگەن سەلبەستىك كووپەراتيۆىنىڭ جاۋاپتىسى ءاليقان مۇسا ۇلىن كوردى، 500 نەشە ارا ساندىعىنان بالدىڭ ءيىسى اڭقىپ تۇر.

  قىستاقتىڭ باعىمشىلىعى جونىندە ءسوز بولعاندا، قاناس كورىنىس رايونىنىڭ قوم ـ قاناس موڭعۇل ۇلتتىق اۋىلى قوم قىستاعى پارتيا ياچەيكاسىنىڭ شۋجيى بايىر تىلشىگە: قاناس كورىنىس رايونى التاي تاۋىنىڭ ورتا بولەگىنە ورنالاسقان، مەملەكەتتىك A5 دارەجەلى كورىنىس رايونى. ورمان بايلىعى مول، ونىڭ ۇستىنە، كليماتى ۇيلەسىمدى، اينالاسىنىڭ ەكولوگيالىق ورتاسى جاقسى. تاۋداعى قاردىڭ ەرىگەن سۋىنان قالىپتاسقان وزەن مەن كول جاسىل جەلەك جامىلعان قارلى تاۋعا ەرەكشە كوركەمدىك بەرىپ، بال اراسىنىڭ ءوسىپ ـ جەتىلۋىنە تابيعي ورتا جاراتتى. بۇل ارادا ءدارى ءشوپ، دالا گۇلى قاتارلى شىرىندى وسىمدىكتەر مول، بۇل جەردە وندىرىلگەن بال جاسىل ءونىم، اقاۋسىز، ساپالى، ءدامى ءتىل ۇيىرەدى، قورەكتىگى جوعارى ـ دەدى.

  بايىردىڭ تانىستىرۋىنشا، التاي تاۋى قارا ارا باعىمشىلىعى شارۋالار كاسىپتىك سەلبەستىك كووپەراتيۆى 2017 ـ جىلى 3 ـ ايدا قۇرىلىپ، ”سەلبەستىك كووپەراتيۆى + كەدەي وتباسى“ تيجارات ۇلگىسىن قولدانعان، كووپەراتيۆ قۇرىلعان كەزدە 6 وتباسى مۇشە بولىپ، ارا ساندىعى 300 گە، تىزىمگە الدىرعان قارجىسى 300 مىڭ يۋانعا جەتىپ، سول جىلعى كووپەراتيۆتىڭ ءار ساندىقتاعى بالىنىڭ ءونىم مولشەرى 25 كيلوگرام بولعان؛ جالپى ءونىم قۇنى 750 مىڭ يۋاننان اسىپ، 6 وتباسىنىڭ ءاربىرىنىڭ كىرىسى 125 مىڭ يۋاننان استام ارتتى. 2018 ـ جىلى اۋىلدىق ۇكىمەتتىڭ شابىتتاندىرۋىندا كووپەراتيۆ مۇشەلەرى 18 وتباسىنا، ارا ساندىعى 1000 عا جەتتى. مۇنىڭ ىشىندە ارحيۆ تۇرعىزىلىپ كارتوچكالاندىرىلعان 6 كەدەي وتباسىنىڭ ءاربىرىنىڭ سول جىلعى جالپى ءونىم مولشەرى 1500 كيلوگرامعا جەتتى. 2019 ـ جىلى كووپەراتيۆ ۇزدىكسىز دامىپ، مۇشە سانى 28 وتباسىنا، ارا ساندىعى 1600 گە جەتتى. مۇنىڭ ىشىندە ارحيۆ تۇرعىزىلىپ كارتوچكالاندىرىلعان 15 كەدەي وتباسىنىڭ ءاربىرى 150 مىڭ يۋاننان استام كىرىس كىرگىزىپ، كەدەيلىكتەن ارىلتۋدان قامال الۋعا دەمبەردى.

  كاكىمبەك تە قىستاقتاعى ارحيۆ تۇرعىزىلىپ كارتوچكالاندىرىلعان كەدەي وتباسى. بۇل وتباسىندا 7 جان بار، اكە ـ شەشەسىنىڭ جاسى ۇلعايعان، 3 بالاسى وقۋدا بولعاندىقتان ول سىرتقا شىعىپ جۇمىس ىستەي المايدى. 2018 ـ جىلى كاكىمبەك قىستاق تۇرعىندار كوميتەتى مەن ءاليقاننىڭ كومەگىندە قارا ارا باعىمشىلىق سەلبەستىك كووپەراتيۆىنە مۇشە بولدى. كاكىمبەك تىلشىگە: بىرنەشە جىلدىق ۇيرەنۋ جانە قۇلشىنۋ ارقىلى قازىر ارا ساندىعىمنىڭ سانى جىل سايىن كوبەيىپ كەلەدى، قاناس ساياحاتىنىڭ جانداۋىنا ىلەسە 2019 ـ جىلى 100 مىڭ يۋان كىرىس كىرگىزدىم، تۇرمىسىمىز بارعان سايىن جاقسارىپ كەلەدى ـ دەدى.بۇگىنگى تاڭدا ءاليقان اۋىلدىق ۇكىمەتتىڭ كومەگىندە ارا باعۋ تەحنيكالىق كۋرسىن اشۋ، ەڭبەك قابىلەتى بار كەدەي وتباسىلارىن سەلبەستىك كووپەراتيۆىنە بارىپ كاسىپتەنۋگە باۋراۋ سياقتى شارالار ارقىلى اناعۇرلىم كوپ ەگىنشى ـ مالشىنى ارا باعىمشىلىعى سالاسىنا بەلسەنە ات سالىسۋعا جەتەلەدى. بيىل سەلبەستىك كووپەراتيۆىنە ارحيۆ تۇرعىزىلىپ كارتوچكالاندىرىلعان 30 كەدەي وتباسى تىڭنان قوسىلىپ، 15 ادامدى باعىمشىلىق تەحنيگى ەتىپ تاربيەلەدى.

جاۋاپتى رەداكتور: ءاننا اكىمقان قىزى