A دارەجەلىدەن جوعارى كورىنىس وڭىرلەرىنىڭ بارلىعىندا ينتەرنەت جەلىسىندە ۋاقىتقا ءبولىپ ۋادەلەسۋ جۇزەگە اسىرىلدى

 شينجياڭنىڭ زەردەلى ساياحاتتى باسقارۋ تۇعىرى مەن ۋادەلەسۋ جۇيەسى ينتەرنەت جەلىسىنە قاتار شىعارىلدى

  A دارەجەلىدەن جوعارى كورىنىس وڭىرلەرىنىڭ بارلىعىندا ينتەرنەت جەلىسىندە ۋاقىتقا ءبولىپ ۋادەلەسۋ جۇزەگە اسىرىلدى

  گازەتىمىزدىڭ جالپىلىق اقپارات قۇرالدارى تىلشىلەرى رىن جياڭ، ياۋ گاڭ 7 - ايدىڭ 6 - كۇنى ۇرىمجىدەن حابارلايدى. 7 - ايدىڭ 6 - كۇنى ”شينجياڭ زەردەلى ساياحات“ باسقارۋ تۇعىرى مەن ”شينجياڭ كورىنىس وڭىرلەرى ۋادەلەسۋ“ جۇيەسىنىڭ ينتەرنەت جەلىسىنە شىعارىلىپ جۇمىس جۇرگىزۋىنە بايلانىستى، بۇكىل رايونداعى A دارەجەلىدەن جوعارى ساياحات كورىنىس وڭىرلەرىنىڭ بارلىعىندا ينتەرنەت جەلىسىندە ۋاقىتقا ءبولىپ ۋادەلەسۋدى باسقارۋ جۇزەگە اسىرىلدى. سونىمەن شينجياڭ ساياحاتىن زەردەلىلەندىرۋ قۇرىلىسى جاڭا ساتىعا قادام تاستادى.

  ”شينجياڭ كورىنىس وڭىرلەرى ۋادەلەسۋ“ جۇيەسى 4 - ايدىڭ 29 - كۇنى ينتەرنەت جەلىسىنە شىعارىلىپ ىسكە قوسىلعان ”شينجياڭدى ساياحاتتاۋ“ تۇعىرىن سۇيەنىش ەتىپ، ۋادەلەسۋ، بەلەت ساتىپ الۋ سياقتىلاردى ءبىر تۇلعادا جۇرگىزۋدى جۇزەگە اسىردى. ءارقايسى ساياحات وڭىرلەرى ”شينجياڭ كورىنىس وڭىرلەرى ۋادەلەسۋ“ ۋيچات شاعىن باعدارلاماسى ارقىلى ۋاق - ۋاق ينتەرنەت جەلىسىندە ۋاقىتقا ءبولىپ ۋادەلەسۋدى باسقارۋدى ىسكە اسىرا الادى. ساياحاتشىلار ۋيچاتتا ”شينجياڭ كورىنىس وڭىرلەرى ۋادەلەسۋ“ شاعىن باعدارلاماسىن ءتىنتۋ ارقىلى ۋادەلەسە الادى.

  قازىر اۆتونوميالى رايونداعى A دارەجەلىدەن جوعارى 440 كورىنىس وڭىرىنە، بيڭتۋانداعى 4A دارەجەلىدەن جوعارى 18 كورىنىس وڭىرىنە ”شينجياڭ كورىنىس وڭىرلەرى ۋادەلەسۋ“ ۋيچات شاعىن باعدارلاماسى ارقىلى ۋادەلەسۋگە بولادى. اۆتونوميالى رايوندىق مادەنيەت جانە ساياحات مەڭگەرمەسى بايلىق اشۋ باسقارماسىنىڭ باستىعى جاڭ چۇنميڭ بىلاي دەپ تانىستىردى: كەلەسى قادامدا ”شينجياڭ كورىنىس وڭىرلەرى ۋادەلەسۋ“ ۋيچات شاعىن باعدارلاماسىن كورىنىس وڭىرلەرىنىڭ ەسىك بەلەتىنە الدىن الا ۋادەلەسۋ، ينتەرنەت جەلىسىندە اقشا تولەۋ، باقشاعا كىرۋدە ەسىك بەلەتىن سكانەرلەپ تەكسەرۋ سياقتىلارمەن جالعاستىرىپ، ساياحاتشىلاردى الدىن الا ۋادەلەسۋ ارقىلى ساياحاتتىڭ قاۋىرت مەزگىلىنە سوقپاي ساياحاتتاۋعا جەتەكتەيمىز.

  ”’شينجياڭ كورىنىس وڭىرلەرى ۋادەلەسۋ‘ جۇيەسى ساياحات كورىنىس وڭىرلەرىنىڭ ’ادام سانىن شەكتەۋ، الدىن الا ۋادەلەسۋ، ساياحاتتىڭ قاۋىرت كەزىنە سوقپاۋ‘ تالابىنا جەتۋىنە دەم بەرىپ، ’ۋادەلى ساياحاتتاۋدىڭ‘ ۇدايىلانۋىن ىلگەرىلەتىپ، شينجياڭنىڭ ساياحاتتى باسقارۋىنىڭ اناعۇرلىم ارناعا تۇسۋىنە، كەمەلدەنۋىنە جوعارى ءونىمدى بولۋىنا مۇمكىندىك جاسايدى. سونىمەن بىرگە، كورىنىس وڭىرلەرىنىڭ ينتەرنەت جەلىسىندەگى، ينتەرنەت جەلىسىنەن سىرتقى جۇمىستارىنىڭ توعىسۋىن ىلگەرىلەتىپ، شينجياڭ ساياحاتىنىڭ جوعارى ساپادا دامۋىنا دەم بەرەدى“، - دەدى اۆتونوميالى رايوندىق مادەنيەت جانە ساياحات مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى گۇلي ابىلەلىم.

  ”شينجياڭ زەردەلى ساياحاتىنىڭ“ 1 - مەرزىمدىك قۇرىلىس نىسانى 2018 - جىلى باستالىپ تىركەلگەن، مۇنىڭ ىشىندەگى ”ءبىر ورتالىق، ەكى تۇعىر“ (ساياحات ءىرى ساندى مالىمەت ورتالىعى، زەردەلى ساياحات باسقارۋ تۇعىرى، زەردەلى ساياحات تيجاراتى جانە قىزمەت وتەۋ تۇعىرى) وزەكتى قۇرىلىس نىسانى ەسەپتەلەدى. ”شينجياڭ زەردەلى ساياحات“ باسقارۋ تۇعىرىنىڭ ينتەرنەت جەلىسىندە جۇمىس جۇرگىزۋى ”ءبىر ورتالىق، ەكى تۇعىردىڭ“ تۇگەلدەي جەلىگە شىعارىلىپ پايدالانىلعانىن، شينجياڭنىڭ زەردەلى ساياحات جەلىسىنىڭ العاشقى قادامدا قۇرىلعانىن كورسەتەدى.

  ”’شينجياڭ زەردەلى ساياحات‘ باسقارۋ تۇعىرى بۇلتتىق ەسەپتەۋ، ۇلكەن ساندى مالىمەت، زاتتار ينتەرنەتى، جاساندى زەردە، 5G، VR/AR، باياۋ تىكە تاراتۋ سياقتى وسىزاماندانعان ينتەرنەتتىك قولدانۋ تەحنولوگيالارىن توعىستىرىپ، قاتىستى مەڭگەرمە - مەكەمەلەر، بايلانىس وپەراتورلارى، كورىنىس وڭىرلەرىنىڭ ساندى مالىمەتتەرى، OTA سياقتى ساياحاتقا قاتىستى بايلىقتاردى بىرىكتىرەدى، باسقارۋشىلار كاسىپتى قاداعالاۋ تۇعىرى ارقىلى كورىنىس وڭىرلەرىنىڭ ناقتى ۋاقىت جاعدايلارىن ديناميكالى يگەرىپ، ساياحاتشىلارعا قولايلى، سيفرلى، زەردەلى ساياحاتتىق قىزمەت وتەيدى“، - دەپ تانىستىردى اۆتونوميالى رايوندىق مادەنيەت جانە ساياحات مەڭگەرمەسى ساياحاتتى ۇگىتتەۋ - جالپىلاستىرۋ ورتالىعىنىڭ مەڭگەرۋشىسى لي مىڭ.

  اۆتونوميالى رايوندىق مادەنيەت جانە ساياحات مەڭگەرمەسى پارتيا باسشىلىق گرۋپپاسىنىڭ شۋجيى حوۋ حانمين مىنانى ءبىلدىردى: ىندەتتەن ساقتانۋ - تىزگىندەۋدى ۇدايىلاندىرۋ جاعدايىندا، شينجياڭنىڭ ساياحات كاسىبىنىڭ دامۋىن جەدەلدەتىپ، شينجياڭدى ساياحات بايلىعىنداعى ۇلكەن رايوننان ساياحات ەكونوميكاسىنداعى قۋاتتى رايونعا قاراي ويىسۋىن ىلگەرىلەتۋ زەردەلى ساياحاتتىڭ پارمەندى قولداۋىنان ايرىلا المايدى. ”ءبىر ورتالىق، ەكى تۇعىردىڭ“ تۇگەلدەي ينتەرنەت جەلىسىنە شىعارىلىپ قولدانىسقا ءتۇسۋى شينجياڭنىڭ ساياحاتتى جونگە سالۋ قابىلەتىنىڭ ءداستۇرلى باسقارۋ تاسىلىنەن ينفورماتسيالانۋ، تورلاسۋ، زەردەلىلەنۋ تاسىلىنە قاراي ماڭىزدى قادام تاستاعاندىعىن كورسەتەدى.

جاۋاپتى رەداكتور: ءاننا اكىمقان قىزى