جەلىدەگى، جەلىدەن تىسقارعى تۇتىنۋ ورلەپ، مادەنيەت - ساياحات قيمىلدارى ”بۇلتتىق تەرمينالعا“ شىقتى

جەلىدەگى، جەلىدەن تىسقارعى تۇتىنۋ ورلەپ، مادەنيەت - ساياحات قيمىلدارى ”بۇلتتىق تەرمينالعا“ شىقتى

شينحۋا اگەنتتىگىنىڭ تىلشىلەرى

  قياق كۇرىش جەۋ، ءيىستى دوربا ءىلۋ، ايداعارشا قايىق جارىسى، مىنە بۇل دۋان - ۋ مەرەكەسىنىڭ مادەنيەت جالعاسىمى. سونىمەن بىرگە، وسى كەزدە تاۋار تۇتىنۋى كۇشەيىپ، حالىقتىق سالت - سانا مەرەي توي قيمىلدارى ”بۇلتتىق تەرمينالعا“ شىعىپ، ءداستۇرلى مەرەكە ءداۋىردىڭ جاڭا ەرەكشەلىگىن ايگىلەدى.

قياق كۇرىشتىڭ ءيىسى اڭقىپ، جەر - جەردىڭ مادەنيەت - ساياحات قيمىلدارى ”بۇلتتىق تەرمينالعا“ شىقتى

  دۋان - ۋدىڭ 3 كۇندىك دەمالىسىندا شاڭحاي قالاسىنىڭ تۇرعىنى شۇي حايچيڭ ۇزاق ۋاقىت جۇزدەسپەگەن تۋىس - تۋعاندارىمەن، دوس - جاراندارىمەن تاعى دا باس قوستى، تۋىس - تۋعانداردى، دوس - جارانداردى ارالاعاندا ارينە، جەۋگە ءتيىستى تاعام قياق كۇرىش بولماسا بولمايدى. ”دۋان - ۋ ەلىمىز ىندەتتەن ساقتانۋ - تىزگىندەۋدى ۇدايىلاندىرۋ كەزەڭىنە اياق باسقاننان بەرى، تۇڭعىش رەت تۋىس - تۋعاندارمەن، دوس - جاراندارمەن باس قوسۋعا ساي كەلەتىن، ءبىر - ءبىرىنىڭ اماندىعىن تىلەيتىن جۇڭحۋانىڭ ءداستۇرلى مەرەكەسى بولدى“، - دەدى شۇي حايچيڭ.

  تۇرعىنداردىڭ تۇتىنۋ ىنتاسى جوعارىلادى، ايتۋلى قياق كۇرىش ونىمدەرىنىڭ جەلىدەگى، جەلىدەن تىسقارى ساتىلىمى ءوتىمدى بولىپ، شاڭحاي قالاسى وڭىرىندەگى دۇكەندەردىڭ ەسىك الدىنا قويىلىپ، تۇتىنۋشىلار ۇزىننان - ۇزاق قاتارعا تۇرىپ ساتىپ الدى؛ تىكە بەرىلىمدە، ينتەرنەتتە ساتۋ تەكشەسىندە توراپتاستار ءبىر جاعىنان ىقپالداسىپ، ءبىر جاعىنان ”توردا ساتىپ الدى“.

  شيڭحۋالوۋ ازىق - تۇلىك، اس - سۋ جارنا شەكتى سەرىكتەستىگىنىڭ ورىنباسار باس ديرەكتورى جى جيڭ بىلاي دەدى: بيىل دۋان - ۋدا سۇرانىسقا قاراي 3 ميلليون 800 مىڭنان استام قياق كۇرىش جاسالىپ، بىلتىرعى ءونىم مولشەرىنەن ەسەلەپ ارتتى. ادەمى، باعاسى ارزان قاپتالعان قياق كۇرىشتەردىڭ ساتىلىمى ءوتىمدى بولۋمەن بىرگە، باعاسى 150 نەشە يۋاننان 250 نەشە يۋانعا دەيىنگى سالەمدەمە قورابىنا سالىنعان قياق كۇرىشتىڭ سۇرانىسى دا بارىنشا ارتتى.

  ”ىندەتتى باستان كەشكەن ادامدار دەنساۋلىققا باسا ءمان بەرەتىن بولدى، ازىق - تۇلىك، اس - سۋ تۇتىنۋىنىڭ دەڭگەيى كوتەرىلىپ، ءتىپتى دە كوپ تۇتىنۋشىلار ينتەرنەتتە ساتىپ الۋعا داعدىلاندى“، - دەدى جى جيڭ.

  6 - ايدىڭ 1 - كۇنىنەن 21 - كۇنىنە دەيىن، تاۋباۋ تيانماۋ تەكشەسىندە قياق كۇرىشتىڭ كەلىسىم سوماسى سايكەس مەزگىلدەگىدەن %153 ارتتى. مۇنان سىرت، جابىسقاق كۇرىش، قياق كۇرىش جاپىراعى سياقتى ازىقتىق ماتەريالداردىڭ كەلىسىم سوماسى سايكەس مەزگىلدەگىدەن زور مولشەردە ارتتى، سونداي - اق ”زىرىشيڭ“ قياق كۇرىشى، ”رىنزاۋروۋ“ قياق كۇرىشى سياقتى جاڭا ءونىم تۇرلەرى مولايدى.

  جەر - جەردىڭ مادەنيەت - ساياحات قيمىلدارى دا ايشىقتالا ءتۇستى. شاڭحاي حۋانلىگۋدىڭ ”’قياق كۇرىشى‘ شاتتىعىنان ءلاززات الۋ“ ءداستۇرلى قيمىلى ناق مايدانىندا شاينەككە جەبە تاستاۋ ءداستۇرلى قيمىلى كوپتەگەن ساياحاتشىلاردى قاتىناسۋعا باۋرادى؛ شاڭحاي حايچاڭ تەڭىز - مۇحيت باقشاسى جۇلدىزدى ءتۇن بازارى قالپىنا كەلدى. شي - انداعى داتاڭ ءتۇنسىز قالا جاياۋلار كوشەسىندە ساياحاتشىلار وزدەرى جاساعان ۇرمە بۇرشاق پىراندىگىن جەي ءجۇرىپ، ”تاڭ ارۋلارى“ ورىنداعان ءان - ءبي كونسەرتىن تاماشالادى؛ داميڭگۇڭ مەملەكەتتىك ەسكى جۇرت باقشاسىندا ادامدار تاڭ كيىمدەرىن كيىپ، كۇشالا تۇتاندىرىپ، سۋ جاڭعاعىن وراپ، ءداستۇرلى سالت - سانا مەن وسى زامانعى تۇرمىستى توعىستىردى.

  ءداستۇرلى حالىقتىق سالت - سانا قيمىلى ”بۇلتتىق تەرمينالدا“ تىپتەن تىرشىلىك تىنىسىن مازداتتى. چۇي يۋاننىڭ مەكەنى حۋبەي ولكەسىنىڭ زىگۇي اۋدانىندا بۇرىنعى جىلدارداعى ايداعارشا قايىق جارىسى، اندىز ورۋ، ولەڭ ايتۋ سياقتىلاردان وزگەشە جەلىدەن تىسقارى ادامدار سەڭدەي سوعىلىسقان كورىنىستەر جارىققا شىعىپ، ”2020 - جىلعى چۇي يۋاننىڭ مەكەنىندە دۋان - ۋ مادەنيەت مەرەكەسى“ ”بۇلتتا“ شىمىلدىعىن اشتى. ”چۇي يۋان مەكەنىندەگى بۇلت كورمەسى“ بەتىنە كىرىپ، بەينەجازبا جالعانىمىن باساتىن بولساق، كورەرمەندەر ”چۇي يۋان مەكەنىندە دۋان - ۋدا ازا تۇتۋ“ سالتاناتىنىڭ ناق مايدانىندا تۇرعانداي سەزىنەدى.

اۋرۋدى الاستاپ، ىندەتتەن ساقتاندى، ”ىندەتپەن“ شايقاسۋ سەنىمى كۇشەيدى، تۇرمىس الاڭسىز بولدى

  شي - انداعى قالا دارەجەلى بەيزاتتىق مادەنيەت مۇرا نىسانى يانتا ماقتا ۇلپاسىنان سۋرەت سالۋ ونەرىن جالعاستىرۋشى جاڭ باۋلان داتاڭ ءتۇنسىز قالا جاياۋلار كوشەسىنىڭ ءبىر كورمە ورنىندا ساياحاتشىلارعا ءيىستى دوربانى قالاي جاساۋدى كورسەتتى. ”ۋىتتى جويىپ، كەسىردى الاستاۋ دۋان - ۋ مادەنيەتىنىڭ ماڭىزدى قۇرامداس بولىگى، ’دۋان - ۋ كەلگەندە بەس ۋىت الاستالادى‘، سوندىقتان دا ادامدار ءيىستى دوربا اسادى“.

  ول بىلاي دەدى: ەلىمىز ىندەتتەن ساقتانۋ - تىزگىندەۋدى ۇدايىلاندىرۋ كەزەڭىندە تۇر، ادامداردىڭ اۋرۋدى الاستاپ، ىندەتتەن ساقتانۋعا باسا ءمان بەرۋدە، ماسكى تاعۋ، ءجيى قول جۋۋ، ارالىق ساقتاۋ، ءبولىنىپ تاماقتانۋ سياقتى جاڭا ادەتتەر دۋان - ۋدىڭ ءداستۇرلى سالت - ساناسىمەن ءوزارا ۇندەستى.

  چۇڭچيڭنەن كەلگەن ساياحاتشى دۋ گاڭ شي - ان اسحاناسىنا كەلىپ ءدامدى تاماقتان قۇزىرلاندى. اسحاناعا كىرۋدىڭ الدىندا ءنومىردى جايمالاپ، تەمپەراتۋرا ولشەتۋ، اسحانانىڭ ىدىس - اياقتارىن قاتاڭ زارارسىزداندىرۋ، تاماقتانعان كەزدە ورتاق ساقپى، قاسىق ىستەتۋ سياقتى ىندەتتەن ساقتانۋ - تىزگىندەۋ شارالارى ونى ايرىقشا الاڭسىز ەتتى. ”جان - جاقتى ساقتانۋ - تىزگىندەۋ شارالارى ادامدارعا ’ىندەتپەن‘ شايقاسۋ سەنىمى بار ەكەندىگىن، الاڭسىز تۇرمىس كەشىرۋگە بولاتىندىعىن بارىنشا سەزىندىردى“، - دەدى دۋ گاڭ.

  بۇكىل ەل بويىنشا A دارەجەلى 10 مىڭ 64 ساياحات كورىنىس ءوڭىرى قالپىنا كەلىپ، سىرتقا ەسىك اشتى، جەر - جەردەگى ساياحات كورىنىس وڭىرلەرى ”سانعا شەك قويۋعا، الدىن الا كەلىسۋگە، ۋاقىت كەزەگىنە بولۋگە“ تاباندى بولىپ، ساياحاتشى قابىلداۋ مولشەرىن ەڭ جوعارعى كوتەرىمدىلىك مولشەرىنىڭ %30ىنەن اسىرمادى. شاڭحايدا 100 نەشە ورىنداعى مەملەكەتتىك A دارەجەلى كورىنىس وڭىرلەرى ەسىك بەلەتىنە الدىن الا كەلىسۋ مەحانيزمىن جالپى بەتتىك اتقارىپ، ”ساياحاتقا الدىن الا كەلىسۋدى“ ۇدايىلاندىرۋ جونىندە ىزدەنىس جاسادى. حۋبەيدا مادەنيەت - ساياحات ورىندارىن، سارايلارىن قالپىنا كەلتىرۋ، اشىق ۇستاۋ جوباسىن باعىتتامالى تۇردە جاسادى، مىسالى، حۋبەي ولكەلىك كىتاپحاناسى كىتاپتاردى باسقارۋدى كۇشەيتۋگە ايرىقشا ءمان بەرىپ، قايتارىلعان جانە پايدالانۋعا بەرىلگەن كىتاپتاردى قاتاڭ تۇردە ءونىمدى زارارسىزداندىردى.

  ءوندىرىس كاسىپورىندارى قىزمەتكەرلەردى ۇستەمە قىزمەت ىستەۋگە ۇيىمداستىرىپ، تۇتىنۋدىڭ قاۋىرت مەزگىلىندە ءتۇرلى ونىمدەرمەن قامداۋدى قامتاماسىز ەتتى. شيڭحۋالوۋدىڭ شاڭحايعا ورنالاسقان بۋمەن پىسىرىلاتىن ازىق - تۇلىكتەردى ءوندىرۋ سەحىندا قىزمەتكەرلەر قياق كۇرىش جاپىراعىن جەتىك اۋدارىپ، كۇرىش جارماسى، جاس ەت سياقتىلاردى قوستى...

  جى جيڭ بىلاي دەپ تانىستىردى: ىندەت كەزىندە، سەحتا جۇمىس تەكشەسى سانى ازايدى، بۇرىندارى 2 ادام ءبىر ۇستەلدەن بىرگە پايدالانسا، قازىر ءبىر ادام ءبىر ۇستەلدەن پايدالاناتىن بولدى، قىزمەتكەرلەر جەتكىلىكتى ارالىقتى ساقتادى. ”بيىل قياق كۇرىش بازارىنىڭ سۇرانىسى كورنەكتى جوعارىلادى، ال سەحتا ءبىر ۋاقىتتا جۇمىس جۇرگىزەتىن قىزمەتكەرلەردىڭ سانى شەكتەمەگە ۇشىرادى، زاۆود وسى سەبەپتى الدىن الا جوسپار جاساپ، قياق كۇرىش ءوندىرىسىن باستاپ قامداۋدى قامتاماسىز ەتتى“.

  حۋبەيدا مادەنيەت - ساياحات بازارىنىڭ سەرپىلۋىنە ىلەسە، قوناقساراي بۇيىمدارى، مەزگىلدىك سالەم - ساۋقىت حانكوۋبەيدىڭ ”زەردەلى بازارىنىڭ“ دۋان - ۋ دەمالىسىنىڭ الدى - ارتىندا ءتۇيىندى تانىستىرعان ساۋدا - ساتتىق ونىمدەرىنە اينالىپ، ساۋداگەرلەر دەنە تەمپەراتۋراسىن ولشەتۋ، دەنساۋلىق تەكسەرۋ ءنومىرىن جايمالاۋ سياقتى قاتاڭ ءتارتىپ ارقىلى بازارعا كىرىپ قاربالاستىققا ءتۇستى.

”قيىندىققا قارسى“ اتتاندى، جوعارى ساپالى دامۋدا جاڭا قوزعالىس قۋاتتارى كۇش ۇستەدى

  شاڭحاي قالاسىنىڭ حۇڭكوۋ رايونىنداعى ءبىر كەشكى بازاردا الۋان ءتۇستى حۋامي قياق كۇرىشى، ساڭىراۋقۇلاق سياقتى يۇننان ولكەسى ۋىنشان جۋاڭزۋ، مياۋزۋ اۆتونوميالى وبلىسىنان كەلگەن ەرەكشە اۋىل شارۋاشىلىق ونىمدەرى ”جارقىراپ بوي كورسەتتى“، وسى ونىمدەر كوپتەگەن ”تۇتىنۋ ارقىلى كەدەيلەردى سۇيەمەلدەۋ“ تىكە بەرىلىمىندە قاۋىرت ساتىلدى. حۋامي قياق كۇرىشىن شاڭحاي قالاسىنىڭ تۇرعىنى ليۋ دو ەرەكشە جاقسى كورەدى، ”ءبىزدىڭ ’كوجە - قاتىعىمىزدى‘ مولايتۋمەن بىرگە، جەرگىلىكتى بۇقارانىڭ ’ازىق - تۇلىگىن‘ تولىقتايدى، ارينە ’ساتىپ الامىز‘“، - دەدى.

  ۋىنشان وبلىستىق حالىق ۇكىمەت−ىنىڭ ورىنباسار باس حاتشىسى پان جىڭۋاڭ بىلاي دەدى: شاڭحايدىڭ يۇننانعا كومەكتەسۋ قىزمەتى 1 - ، 2 - ، 3 - كاسىپتەردىڭ توعىسپالى دامۋىن كوزدە ۇستاپ، جەرگىلىكتى ورىندا سۋارۋ ارىقتارىن، سۋارۋدى باسقارۋ تورىن قارجى قوسىپ قۇرىپ، وندىرىستىك نەگىزدىك قۇرىلعىلاردى بەكەمدەۋدەن تارتىپ اۋىل شارۋاشىلىق ەرەكشە ونىمدەرىن مانەرلەۋ زاۆودىن، توڭازىتۋ قويماسىن سالۋعا دەيىن، 2 - كاسىپتىڭ دارەجەسىن كوتەرۋدى جەبەدى، ونان بۇگىنگى كۇندەگى تىكە ساتۋ، تىكە بەرىلىم تەكشەسىنەن پايدالانىپ 3 - كاسىپتى دامىتۋعا دەيىن، شاڭحاي - يۇننان ەكونوميكاسىندا ”جيىلىكتى رەزونانستى“ ونان ارى ىلگەرىلەي جۇزەگە اسىردى.

  ”كادر - بۇقارا ءبىر جاعادان باس، ءبىر جەڭنەن قول شىعارساق، كەزەكتەگى قيىن وتكەلدەن، ءسوزسىز، وتە الامىز. ءبىز كەدەيلىكتەن ارىلتۋدان قامال الۋ شايقاسىنىڭ جەڭىسىنە، ءسوز جوق، جەتىپ، جاپپاي دوڭگەلەك داۋلەتتىلىككە قول ۇستاسا ۇمتىلامىز“، - دەدى ول.

  دۋان - ۋ دەمالىسىنىڭ العاشقى كۇنى بۇكىل ەل بويىنشا ەل ىشىنەن جالپى 17 ميلليون 276 مىڭ ادام - رەت ساياحاتشى قابىلدانىپ، ەل ءىشى ساياحات كىرىسى 4 ميلليارد 470 ميلليون يۋان بولدى. شيەچىڭ ساياحات ۇلكەن ساندى مالىمەتى بىرلەسپە تاجىريبەحاناسىنىڭ زەرتتەۋشىسى پىڭ لياڭ بىلاي دەپ تالداۋ جاسادى: شيەچىڭ تەكشەسىنىڭ دۋان - ۋداعى تاپسىرىسى 5 - ايدىڭ سوڭعى شەنىنەن تاعى دا ارتتى. ادامداردىڭ تاماشا تۇرمىسقا تالپىنىسىنىڭ ىندەت سەبەبىنەن وزگەرمەگەندىگى ەلىمىز ەكونوميكاسىنىڭ جوعارى ساپالى دامۋىنداعى ەرەكشە ۇلكەن بازار سۇرانىسى نەگىزىن كورنەكتىلەندىردى.

  بۇقارا شاتتانا تىڭداپ، قۋانا كورەتىن جەلى جاڭا ەكونوميكاسىنىڭ سىرتقى ساۋدانى، سىرتقى قارجىنى ورنىقتىرۋداعى نەگىزگى جاعدايى دا ماڭىزدى رول اتقاردى. دۋان - ۋ قارساڭىندا ەندى عانا جابىلعان، العاش رەت ”بۇلت تەرمينالىندا“ تۇتاس تۇلعادا كوشكەن گۋاڭجوۋ جارمەنكەسى بۇلتتىق تۇعىرى 217 مەملەكەت پەن رايوننان كەلگەن شەكارا سىرتىنداعى ساتىپ الۋشى ساۋداگەرلەردى تىركەۋگە الىنىپ، كورمەگە قاتىناسۋعا باۋراپ، كەلۋ قاينارىنىڭ تارالۋى جاعىندا تاريحي رەكورد جاراتتى، يۇنلۋيان، بۇلتتىق كەلىسىمگە كەلۋ سياقتى جاڭالىق اشۋ ۇلگىسى دە ءار ەلدىڭ كورمەگە قاتىناسقان ساۋداگەرلەرىنە قولايلىلىق جاسادى.

  شاڭحاي قازىنا - ەكونوميكا داشۋەسى جۇڭگو كاسىپ سالاسىن دامىتۋدى زەرتتەۋ ورنىنىڭ ۇنەمىلىك ىستەرگە جاۋاپتى ورىنباسار باستىعى يۇي ديانفان بىلاي دەپ تالداۋ جاسادى: ەلىمىزدىڭ جەلىدەگى جاڭا ەكونوميكاسى قارىشتاپ دامۋدا، جاڭا نەگىزگى قۇرىلىس سان مىڭداعان كاسىپ سالاسىن جانداندىرىپ، قامداۋ مەن قاجەتسىنۋدىڭ ارتۋى ءبىر - ءبىرىن جەبەپ، ەكونوميكالىق جاڭا قوزعالىس قۋاتتارىنا ۇزدىكسىز كۇش ۇستەيدى. جاڭا تيپتى ايدارشا ۆيرۋس وكپە قابىنۋ ىندەتى حالىقارانىڭ، ەل ءىشىنىڭ ەكونوميكاسىنا بەلگىلى تۇراقسىزدىق اكەلگەنىمەن، ءبىر نيەتپەن ىنتىماقتاسىپ، قايراتتانا العا ۇمتىلاتىن بولساق، جۇڭگو ەكونوميكاسىنىڭ ايداعارشا قايىعى، ءسوزسىز، ەرلىكپەن العا ىلگەرىلەيتىن، ورگە ۇمتىلاتىن بولادى.

(تىلشىلەر چىن ايپيڭ، لياڭ جيانچياڭ، ساي شين - ي، ۋاڭ شياۋدان)

(شينحۋا اگەنتتىگىنىڭ 6 - ايدىڭ 27 - كۇنى بەيجيڭنەن بەرگەن حابارى)

جاۋاپتى رەداكتور: ءاننا اكىمقان قىزى