جاقىندا شينجياڭنىڭ ءىشىنارا جەرلەرىندە نوسەر جاۋادى

  ەرتەڭ تۇننەن 5-ايدىڭ 22-كۇنىنە دەيىن شينجياڭنىڭ مىنا جەرلەرىندە نوسەر جاۋادى

  ءتىلشىنىڭ 5-ايدىڭ 15-كۇنى شينجياڭ ۇيعۇر اۆتونوميالى رايوندىق اۋارايى ستانسياسىنان ۇعىسۋىنا قاراعاندا، 5-ايدىڭ 17-كۇنى تۇننەن 22-كۇنىنە دەيىن، شينجياڭنىڭ ىلە قازاق اۆتونوميالى وبلىسى، بۇراتالا مۇڭعۇل اۆتونوميالى وبلىسىنىڭ باتىس بولەگى، تارباعاتاي ايماعى قاتارلى جەرلەردە جاۋىن-شاشىن ءجيى بولاتىندىعى، جالپى جاۋىن - شاشىن مولشەرى ءبىرشاما كوپ بولىپ، ىلە وبلىسىنىڭ ءىشىنارا جەرلەرىندە نوسەر جاۋاتىندىعى مەجەلەنگەن.

  5-ايدىڭ 17-كۇنى تۇننەن 22 - كۇنىنە دەيىن، ورتا ازيا جاۋىن - شاشىن جۇيەسىنىڭ ءۇرتىس ىقپالىندا ىلە قازاق اۆتونوميالى وبلىسى، بۇراتالا موڭعۇل اۆتونوميالى وبلىسى، تارباعاتاي ايماعى، شىحىزى قالاسىنىڭ وڭتۇستىك تاۋلى رايونى، سانجى حۇيزۋ اۆتونوميالى وبلىسىنىڭ تاۋلى رايونى، ءۇرىمجى قالاسىنىڭ تاۋلى رايونى جانە التاي ايماعىنىڭ سولتۇستىك جانە شىعىس تاۋلى رايونى، قۇمىل قالاسىنىڭ سولتۇستىگى، قاشقار ايماعىنىڭ تاۋلى رايونى، قىزىلسۋ قىرعىز اۆتونوميالى وبلىسىنىڭ تاۋلى رايونى، اقسۋ ايماعىنىڭ سولتۇستىك تاۋلى رايونى، بايىنعولين موڭعۇل اۆتونوميالى وبلىسىنىڭ تاۋلى رايونى قاتارلى جەرلەردىڭ ءبىر ءبولىم وڭىرلەرىندە جاۋىن-شاشىن بولاتىندىعى؛ ءىشىنارا جەرلەردە قىسقا ۋاقىتتىق نوسەر، بورشاق، ناجاعايلى داۋىل قاتارلى كۇشتى كونۆەكسيالىق اۋارايى قوسانجارلايتىندىعى مەجەلەنگەن.

  اسىرەسە، ىلە قازاق اۆتونوميالى وبلىسى، بۇراتالا موڭعۇل اۆتونوميالى وبلىسىنىڭ باتىس بولەگى، تارباعاتاي ايماعى قاتارلى جەرلەردىڭ ءىشىنارا وڭىرلەرىندە ورتاشا جانە قاتتى جاڭبىر جاۋادى (جالپى جاۋىن-شاشىن مولشەرى 25~50 ميلليمەتر). ىلە قازاق اۆتونوميالى وبلىسىنىڭ ءىشىنارا جەرلەرىندە نوسەر جاۋادى (جالپى جاۋىن-شاشىن مولشەرى 50-70 ميلليمەتر)، ەڭ جوعارى ساعاتتىق جاۋىن-شاشىن مولشەرى 30-40 ميلليمەتر بولادى. وسى رەتكى ەڭ كۇشتى جاۋىن-شاشىن مەزگىلى: ىلە قازاق اۆتونوميالى وبلىسى، بۇراتالا موڭعۇل اۆتونوميالى وبلىسى، تارباعاتاي ايماعى، شىحىزى قالاسىنىڭ وڭتۇستىگىندەگى تاۋلى رايونداردا 5-ايدىڭ 17-كۇنى تۇننەن 20–كۇنىنە دەيىن؛ سانجى حۇيزۋ اۆتونوميالى وبلىسىنىڭ تاۋلى ءوڭىرى، ءۇرىمجى قالاسىنىڭ تاۋلى ءوڭىرى جانە التاي ايماعىنىڭ سولتۇستىك جانە شىعىس تاۋلى ءوڭىرى، قۇمىل قالاسىنىڭ سولتۇستىگى قاتارلى جەرلەردە 5-ايدىڭ 20-كۇنىنەن 22-كۇنىنە دەيىن.

  شينجياڭ اۋارايى ستانسياسىنىڭ حابارلاۋىنشا، بۇل رەتكى ءجيى جاۋىن-شاشىندى اۋارايىندا ءىشىنارا جەرلەردە تاسقىن اپاتى جانە بەتكەي كوشكىنى، لاي كوشكىنى گەولوگيالىق اپاتىنىڭ تۋىلۋ قاتەرى ءبىرشاما جوعارى بولادى ەكەن. سوندىقتان، قاتىستى تاراۋلار تاۋلى رايوندارداعى تۇرعىندار، اۆود-كەن جانە كاسىپورىندارى، جىلجىمالى حالىق، گەولوگيالىق بارلاۋ، تاس جول قورعاۋ قاتارلى ورىندارداعى ادامداردى باسقارۋدى كۇشەيتۋى، اپاتقا شۇعىل توتەپ بەرۋ جانە ودان ساقتانۋ قىزمەتىن ويداعىداي ىستەۋى كەرەك. جاڭبىرلى اۋا رايى سولتۇستىك شينجياڭداعى ەگىس داقىلدارىنىڭ وسۋىنە ءتيىمسىز ىقپال جاسايدى، سوندىقتان، ەگىنشىلىك رايوندارى جاڭبىر جاۋعاننان كەيىن دەر كەزىندە قاتقىلدانعان توپىراقتى قوپسىتۋى؛ قاتىستى تاراۋلار جاساندى جولمەن بۇرشاقتان ساقتانۋ جۇمىسىن الدىن الا جاقسى ىستەۋى كەرەك. مۇنان تىس، شينجياڭنىڭ ساياحات كاسىبى بىرتىندەپ جاندانىپ كەلەدى، بۇل رەتكى اۋا رايى ساياحاتقا ءبىرشاما زور ىقپال جاسايدى، سوندىقتان ساياحات باسقارۋ تاراۋلارى اۋا رايى وزگەرىسىنە قاراي ساياحات كورىنىس رايوندارىنىڭ حاۋىپسىزدىگىن باسقارۋ قىزمەتىن كۇشەيتۋى كەرەك.

  ءتىلشى جاقىندا، شينجياڭداعى ءار دارەجەلى اۋا رايى قۇرىلىمدارى ىركەس ـ تىركەس داۋىل، ناجاعاي، نوسەر قاتارلى 35 ءتۇرلى ساقتىق سيگنالدى جاريالاعاندىعىن، مۇنىڭ ىشىندە داۋىلدىڭ كوك ءتۇستى ساقتىق سيگنالى باسىم ساندى ۇستايتىندىعىن بىلگەن.

  شينجياڭ ۇيعۇر اۆتونوميالى رايوندىق اۋارايى ستانسياسى نوسەرلى جاڭبىردىڭ كوك ءتۇستى ساقتىق سيگنالىن جاريالادى: مۇندا 5-ايدىڭ 15-كۇنى تۇننەن 17-كۇنىنە دەيىن، قىزىلسۋ قىرعىز اۆتونوميالى وبلىسىنىڭ باسىم جەرلەرى، قاشقار ايماعىنىڭ تاۋلى رايونى، اقسۋ ايماعىنىڭ سولتۇستىك تاۋلى رايونى، حوتان ايماعىنىڭ وڭتۇستىك تاۋلى رايونى قاتارلى جەرلەردىڭ ءىشىنارا وڭىرلەرىندە نوسەر جاۋاتىندىعى؛ مۇنىڭ ىشىندە قىزىلسۋ قىرعىز اۆتونوميالى وبلىسىنىڭ سولتۇستىك تاۋلى ءوڭىرىنىڭ ءىشىنارا جەرلەرىندە جالپى جاۋىن-شاشىن مولشەرى 40~70 ميلليمەترگە جەتەتىندىگى؛ ءىشىنارا جەرلەردە نوسەردەن تاسقىن جانە لاي كوشكىنى، تاۋ بەتكەي كوشكىنى قاتارلى گەولوگيالىق اپات اۋا رايىنىڭ حاۋىپ–قاتەر دارەجەسى جوعارى بولاتىندىعى مەجەلەنگەن، سوندىقتان ساقتىقتى كۇشەيتىڭىزدەر.

جاۋاپتى رەداكتور: ءاننا اكىمقان قىزى