اعاجاي-التاي تورابى   ›   اقپارات ايدىنى   ›   سۋرەتتى حابارلار

التاي ايماعى 6 جازعى ساياحات جەلىسىن اشتى

  التاي گازەتىنىڭ ءتىلشىسى حۋ جۇنشيۋ حابارلايدى. التاي وتە كوركەم جەر، ونىڭ كوركەمدىگى تاۋ ـ سۋىندا، سىرلى مادەنيەتىندە، جايناعان اۋىل ـ قىستاعىندا، ابزال ەكولوگياسىندا، جاڭاشا سەيىل ـ سەرۋەنىندە، ورنىقتى دا جاراسىمدى قوعامدىق ورتاسىندا جانە قاراپايىم ۇلتتىق سالت ـ ساناسىندا. جادىراعان جازدىڭ كەلۋىمەن التاي ايماعى 6 ءتۇرلى ەرەكشەلىككە يە سارا ساياحات جەلىسىن اشتى.

  1. التايدا جازعى ىستىقتان تاسالانۋ ساياحاتى (10 كۇندىك ساياحات)

  ءۇرىمجى قالاسى ـــ جەمەنەي شەكارا وتكەلى كورىنىس رايونى ـــ قويتاس كورىنىس رايونى ـــ قاراتوقتىنىڭ كولى كورىنىس رايونى ـــ قاناس كورىنىس رايونى ـــ اقتۇبەك كەرىشى كورىنىس رايونى ـــ التاي قالاسى ـــ قالۋىن اراسانى ـــ بۋرىلتوعاي اۋدانى ـــ كوكتوعاي اۋدانى ـــ كوكتوعاي كورىنىس رايونى ـــ ۇشكول كورىنىس رايونى.

  جول بويىندا التاي ايماعىنىڭ تۇتاس وڭىرلىك جاراتىلىستىق گۋمانيتارلىق كورىنىسىن تاماشالاۋعا، بايىرعى جاراتىلىستىق كورىنىسىن تاماشالاۋعا جانە سىرلى ءارى قىزىقتى گۋمانيتارلىق كورىنىسىن سەزىنۋگە بولادى.

  2. التايدىڭ سالقىن سامالىندا جەكە اۆتوكولىگىمەن ساياحاتتاۋ (6 كۇندىك ساياحات)

  ءۇرىمجى قالاسى ـــ قابا اۋدانى ـــ اققايىڭ كورىنىس رايونى ـــ قاناس كورىنىس رايونى ـــ اقتۇبەك كەرىشى كورىنىس رايونى ـــ ۇلىڭگىر كولى كورىنىس رايونى ـــ كوكتوعاي كورىنىس رايونى ـــ ۇشكول كورىنىس رايونى.

  جول بويى ەلىمىزدىڭ باتىس سولتۇستىگىندەگى ەڭ ۇلكەن تابيعي اققايىڭ ورمان بەلدەۋىنەن كوكتەمنىڭ لەبى ەسەدى. سونداي ـ اق جەر ءجانناتى قاناس تابيعاتىنىڭ كوركەمدىگىن سەزىنىپ، اقتۇبەك كەرىشىندە كەشكى شاپاق پەن ”بالىعى تايداي تۋلاعان،باقاسى قويداي شۋلاعان“ ۇلىڭگىر كولىنەن ءلاززات الادى. ەڭ سوڭىندا كوكتوعايعا جانە ۇشكولگە جەتىپ، تابيعاتتىڭ بايىرعى بەت ـ بەينەسىن كورىپ، سىرلى ساحارا بالبالىن تاماشالايدى.

  3. التايدا تابيعاتقا جاناسۋ ساياحاتى (3 كۇندىك ساياحات)

  ءۇرىمجى قالاسى ـــ قاناس كورىنىس رايونى ـــ اقتۇبەك كەرىشى كورىنىس رايونى ـــ كوكتوعاي كورىنىس رايونى ـــ ۇشكول كورىنىس رايونى.

  جول بويى جاسىل القاپتى قاناس كولىنىڭ سۋىن، ەرتىس وزەنىن، اقتۇبەك كەرىشىن، اسقار شىڭعا جارماسا وسكەن كوكوراي ورماندى ءامىر ـ سانا شوقىسىن، سونداي ـ اق 100 ميلليون جىلعى بوران ـ شاشىننىڭ جەمىرۋى ارقىلى قالىپتاسقان عاجايىپ تاستى سايىن تاماشالايدى.

  4. التايدى ۆەلوسيپەدپەن ساياحاتتاۋ (3 كۇندىك ساياحات)

  ساياحات جەلىسى التاي قالاسى ـــ بۋرىلتوعاي ـــ بۋىرشىن ـــ شۇڭقىر قالاشىعى ـــ قاناس.

  التايدىڭ مىڭ شاقىرىمدىق ساياحات كاريدورى ۆەلوسيپەدكە ءمىنىپ ساياحاتتايتىن سايرانباق. جول بويى كوركەم كورىنىس، سالقىن ساۋمال اۋا، كۇردەلى جول، وزگەشە ۇلتتىق سالت ـ سانا ۆەلوسيپەدپەن ساياحاتتاۋشىنى شەكسىز قىزىققا باتىرادى.

  5. التايدا ۇلتتىق سانا ـ سانا، كوشى ـ قوندى كورۋ ساياحاتى (7 كۇندىك ساياحات)

  ساياحات جەلىسى شىڭگىل اۋدانى ـــ كوكتوعاي اۋدانى ـــ التاي قالاسى ـــ بۋرىلتوعاي اۋدانى ـــ بۋىرشىن اۋدانى ـــ قابا اۋدانى ـــ جەمەنەي اۋدانى.

  جولشىباي كوشى ـ قونداعى تابىن ـ تابىن سيىر، قورا ـ قورا قوي، كەلە ـ كەلە تۇيە جانە ءۇيىر ـ ءۇيىر جىلقىنى سۋرەتكە الادى. قازىرگە دەيىن ساقتالىپ كەلە جاتقان بايگە، كوكپار، قىز قۋار قاتارلى باي مازمۇندى كوشپەلى مادەنيەت مازمۇنىن وسى ارادان كورۋگە بولادى.

  6. التايدا الۋان ءتۇرلى كوكتەم گۇلىن تاماشالاۋ ساياحاتى (7 كۇندىك ساياحات)

  ساياحات جەلىسى شىڭگىل اۋدانى ـــ كوكتوعاي اۋدانى ـــ التاي قالاسى ـــ بۋرىلتوعاي اۋدانى ــ قاناس كورىنىس رايونى ـــ قابا اۋدانى ـــ جەمەنەي اۋدانى.

  ءار جىلى 5 ـ ايدان باستاپ كۇنباعىس، قىزعالداق، جاۋجۇمىر، بۇعى ءشوپ، سابىن اعاش، قىزىل قاسىق، راۋشانگۇل ...... ت.ب. بىرىنەن كەيىن ءبىرى گۇل اشادى. التاي ساحاراسىنداعى تاۋ گۇلدەرى كوزدىڭ جاۋىن الادى، اسىرەسە، كوكتەم باسىندا اق قار جامىلعان نۋ قاراعاي ورمانى تاۋ گۇلىن ءتىپتى دە كورىكتەندىرىپ، ادامدى وزىنە باۋرايدى.

جاۋاپتى رەداكتور : ءاننا اكىمقان قىزى