وڭتۇستىك شينجياڭنان كەلگەن ارتىق ەڭبەككۇشتەر التايعا جەتتى

”قۇلشىنا قىزمەت ىستەپ، كەدەيلىكتەن ەرتەرەك ارىلۋعا كۇش سالامىن“

  التاي گازەتىنىڭ ءتىلشىسى حۋ جۇنشيۋ، پراكتيكانت ايداربەك ايبەك ۇلى حابارلايدى. ”كورىكتى التاي، ءبىز كەلدىك“. 3 ـ ايدىڭ 25 ـ كۇنى تاڭەرتەڭ، وڭتۇستىك شينجياڭنان كەلگەن ارتىق ەڭبەككۇشتەر التاي پويەز بەكەتىنە جەتتى، جالىندى جاستار جۇكتەرىن كوتەرىپ، اسقاق سەزىممەن ارمانعا قانات قاعىپ، ەكىنشى مەكەندەرى التايعا كەلىپ، كاسىپ كوزىن اشىپ، اۋقاتتانۋ جولىن باستادى.

  ”پارتيا مەن ۇكىمەتتىڭ كوڭىل ءبولۋى مەن قامقورلىعىنا ەرەكشە العىس ايتامىن، كەدەيلىكتەن ەرتەرەك قۇتىلۋعا كۇش سالامىن“ـ دەدى سول كۇنگى قارسى الۋ سالتىندا، حوتاننىڭ قاراقاش اۋدانىنان كەلگەن قارنيسا جالەل. ول وسى تاپتىرماس ورايدى قاستەرلەپ، باسقارۋعا بويسۇنىپ، ونەرىن ۇشتاپ، ەڭبەكشىل قوس قولىنا سۇيەنىپ تاماشا تۇرمىس جاراتاتىنىن ءبىلدىردى.

  سوڭعى جىلدارى بەرى، التاي ايماعى وڭتۇستىك شينجياڭنىڭ قالا، اۋىلدارىنداعى ارتىق ەڭبەككۇشتەردى باسقا سالاعا ويىستىرىپ جۇمىسقا ورنالاستىرۋدى، جۇمىستاندىرۋ ارقىلى حالىققا تيىمدىلىك جاساۋدى، كەدەيلىكتەن ارىلتىپ اۋقاتتانۋدى ىشكەرىلەي ىلگەرىلەتۋدىڭ ماڭىزدى شارا ەتتى. التاي ايماعى 2017 ـ جىلدان باستاپ وڭتۇستىك شينجياڭنان كەلگەن جۇمىسكەرلەردى جۇمىسقا ورنالاسىپ، شارۋاشىلىق قۇرۋعا ىركەس ـ تىركەس قابىلدادى، قازىر وسى جۇمىسكەرلەر تاربيە كۋرسىنا قاتىناسىپ ۇيرەنۋ، قىزمەت امالياتى ارقىلى جەرگىلىكتى ورىننىڭ تۇرمىسىنا نەگىزىنەن ۇيلەسىپ، ءار ۇلت بۇقاراسىمەن تاتۋ ـ ءتاتتى ءوتىپ، ورنىقتى كىرىس كىرگىزىپ، تۇرمىستارى كۇننەن ـ كۇنگە جاقساردى.

  وڭتۇستىك شينجياڭنان التايعا كەلگەن جۇمىسكەرلەردى جۇمىستاندىرۋ، ورنالاستىرۋ قىزمەتىن ويداعىداي ىستەۋ ءۇشىن، ايماقتىق پارتكوم، اكىمشىلىك مەكەمەسى جانە قاتىستى تاراۋلار كولەمدى تەكسەرۋ ـ زەرتتەۋ جۇرگىزىپ، جۇمىستاندىرۋعا سايكەستىرۋ ارناۋلى گرۋپپاسىن قۇرىپ، مىندەت ـ شارالاردى اشالاپ، جاۋاپكەرلىكتى كۇشەيتىپ، ناقتىلاندىرىپ، قىزمەت ورنىمەن ۇشتاستىرۋ، تەحنيكالىق شەبەرلىككە باۋلۋ، اس ـ سۋ، جاتىن ورىن، ۇيرەنۋ ـ تاربيە قاتارلى قىزمەت مەحانيزمىن قۇرىپ جانە كەمەلدەندىرىپ، ساياحات، ەگىن، مال شارۋاشىلىعى، زاۆود كەن كاسىبى جانە الەۋمەتتىك يگىلىك سيپاتتى قىزمەت ورنى بويىنشا 1000 نەشە قىزمەت ورنىن قۇردى. سونىمەن بىرگە، وڭتۇستىك شينجياڭنان التايعا كەلگەن جۇمىسكەرلەردىڭ ەرتەرەك جۇمىسقا شىعۋىنا مۇمكىندىك جاراتۋ ءۇشىن، قاتىستى تاراۋلار جۇمىستاندىرۋ، تەحنيكالىق ونەرگە تاربيەلەۋ جوباسى مەن وقىتۋ جوباسىن جاسادى، پارتيا مەكتەبىنىڭ، اۋىل شارۋاشىلىعى تەحنيكاسىن جالپىلاستىرۋ مەكتەبىنىڭ، كاسىپتىك تەحنيكا شۋەيۋانىنىڭ وقىتۋشىلارىن جانە ساياحات مادەنيەت، ەگىن، مال، ورمان، جايلىم قاتارلى قاتىستى تاراۋلاردىڭ ”قوس ءتىل“ قابىلەتىنە يە، كاسىپتىك قابىلەتى كۇشتى كادرلاردى ساباق بەرۋگە ورنالاستىردى ءارى ىسىلعان، جان ـ جاقتى سايكەستىرۋ قابىلەتى كۇشتى پارتيالى كادرلار مەن جۇمىسشى ـ قىزمەتكەرلەردى زاڭ ـ ەرەجە، ساياسات ۇگىتى، تۇرمىستى قامتاماسىزداندىرۋ، دەنساۋلىق اقاۋسىزدىعى جونىندە اقىل ـ كەڭەس بەرۋ قاتارلى قىزمەت وتەۋگە تاڭداپ الدى.

  ”اسپازدىقتى جاقسى كورەمىن، بۇل جەردە جاقسى ۇيرەنىپ، اسپازدىق ونەرىم جانە ءوز قۇلشىنىسىما سۇيەنىپ، كەدەيلىكتەن ارىلىپ، اۋقاتتانۋعا كۇش سالامىن“ ـ دەدى 20 جاستان ەندى عانا اسقان حوتاندىق جاس ازامات حالەل ابدوللا بۋىرشىن اۋدانىنا باراتىن اۆتوبۋزدا ءوزىنىڭ بولاشاعى تۋرالى ءسوز قوزعاپ.

  ايماقتىق پارتكوم ۇيىمداستىرۋ ءبولىمىنىڭ ورىنباسار باستىعى، ايماقتىق ادام كۇش بايلىعى جانە قوعامدىق قامتاماسىزداندىرۋ مەكەمەسى پارتگرۋپپاسىنىڭ شۋجيى جاڭ حۋايۇڭ بىلاي دەدى:”وڭتۇستىك شينجياڭنان كەلگەن جۇمىسكەرلەردى دەركەزىندە اۋدانداردىڭ (قالانىڭ، كورىنىس رايونىنىڭ) جۇمىسكەر ىستەتەتىن ورىندارى مەن كاسىپورىندارىنا جىبەردىك. ىندەتتەن ساقتانۋ ـ تىزگىندەۋ قىزمەتىن ويداعىداي ىستەۋمەن بىرگە، ولاردىڭ ۇيرەنۋى مەن تۇرمىسىن ويداعىداي ورنالاستىرىپ، ولارعا وتباسىنىڭ مەيىرىن سەزىندىرىپ، الاڭسىز قىزمەت ىستەپ، ورنىقتى كاسىپتەنۋىنە كۇش سالامىز“.

جاۋاپتى رەداكتور: ءاننا اكىمقان قىزى