تۇتىنۋ بازارى جاندانا ءتۇستى

3 - ايدىڭ 19 - كۇنى ءۇرىمجى ەكونوميكالىق - تەحنيكالىق اشۋ رايونى (توۋتۇنحى رايونى) ۋاندا الاڭىنداعى يجياحۇي ەرەن بازارىندا ادامدار قايشالىسىپ ءجۇر. سۋرەتتە: قالا تۇرعىندارى تۇرمىستىق بۇيىمدار ساتىپ الۋدا. □ سۋرەتتى گازەتىمىزدىڭ جالپىلىق اقپارات قۇرالدارى ءتىلشىسى شيە لۇڭ تۇسىرگەن

  گازەتىمىزدىڭ جالپىلىق اقپارات قۇرالدارى تىلشىلەرى حى حۇڭۋي، ميھىرگۇل ناسىر 3 - ايدىڭ 22 - كۇنى ۇرىمجىدەن حابارلايدى. 3 - ايدىڭ 21 - كۇنى تۇستەن بۇرىن تەمپەراتۋرا ولشەۋ، زارارسىزداندىرۋ ارقىلى ءۇرىمجى قالاسىنىڭ تۇرعىنى چىڭ ليجۋان وتباسىنداعىلار ءۇرىمجى اۋدانى بانفاڭگوۋ قالاشىعىنداعى شينجياڭ حۋاليان وسى زامانعى اۋىل شارۋاشىلىعى عىلىم - تەحنيكاسىنان ۇلگى كورسەتۋ باقشاسىنا بۇلدىرگەن تەرۋگە باردى. بۇلدىرگەن جىلىجايىنا كىرگەنىڭدە، جەمىستىڭ حوش ءيىسى اڭقيدى، چىڭ ليجۋان بۇلدىرگەن تەرە ءجۇرىپ، بالاسىن سۋرەتكە ءتۇسىرىپ، ءبىر ءۇيلى جان ءماز - مايرام بولدى. ”اپتا سوڭىندا بالالاردى ەرتىپ تۇنىق اۋادان تىنىستاپ، بۇلدىرگەن تەرۋدىڭ شاتتىعىنا شومىپ، كوكتەم لەبىن سەزىندىك“، - دەدى چىڭ ليجۋان.

  قازىر جىلىجاي بۇلدىرگەنى بازارعا شىعارىلاتىن مەزگىل، باقشاداعى بۇلدىرگەندەر جاقسى ءوسىپتى، ساتىلۋى كۇسەت ەكەن. ”قازىر ءار كۇنى باقشا ىشىندە تەرىپ ساتىپ الۋ سوماسى 20 مىڭ يۋان اينالاسىنا جەتتى، سونىمەن بىرگە ءبىز جەلىدە ساتۋ، جەلىدەن تىسقارى زات جەتكىزۋ ۇلگىسىن ۇزدىكسىز قولدانىپ، ءار كۇنى 200گە تاياۋ ساتۋ تاپسىرىسىن قابىلداپ وتىرمىز“، - دەدى ۇلگى كورسەتۋ باقشاسىنىڭ جاۋاپتىسى دۋ فۋچياڭ تانىستىرىپ.

  ءوندىرىس، تۇرمىس ءتارتىبىنىڭ جاپپاي قالپىنا كەلۋىنە ىلەسە، رايونىمىزدىڭ جەر - جەرىندە ىندەت سەبەبىنەن تەجەلگەن، توقىراعان تۇتىنۋ سۇرانىسى قايتا جانداندى، سونىمەن بىرگە ىندەتتەن ساقتانۋ - تىزگىندەۋ بارىسىندا تۋىنداعان جاڭاشا تۇتىنۋ جانە دەڭگەيى جوعارىلاعان تۇتىنۋ دا جەتىلۋ، دامۋ بارىسىندا زورايا ءتۇستى. شينجياڭ حالىقارالىق ۇلكەن بازارىنىڭ جاياۋلار كوشەسىندە ساياحاتشىلار ءتۇرلى ءدامدى تاعامدار مەن ۇلتتىق ەرەكشەلىككە يە ءان - ءبي ويىندار شاتتىعىنا شومدى؛ سانجى قالاسىنداعى كىتاپحانا، شاعىن تەاترحانا سياقتىلار تيجاراتىن قالپىنا كەلتىرىپ، قالا تۇرعىندارىن جاڭا تۇتىنۋ تالعامىمەن قامتاماسىز ەتتى؛ حوتان كەشكى بازارى اشىلىپ، جان - جاقتان كەلگەن قاريدارلاردى باۋرادى؛ تيانشان بوعدا كولى، تيانشان ۇلكەن اڭعارى، قاناس سياقتى كوپتەگەن كورىنىس وڭىرلەرى بىرتىندەپ دۋمانعا شومدى...

  ءۇرىمجى يوۋحاۋ ساۋدا سارايى سۋمي اجارلانۋ بۇيىمدارى ارناۋلى پوكايىندا، اجارلانۋ بۇيىمدارىن تاڭداپ جاتقان الارماندار دا از ەمەس، دۇكەن باستىعى ما كى تانىستىرىپ بىلاي دەدى: جۋىقتان بەرى ساۋدا سارايى مەن وسى ماركا جاقتىڭ تيجارات - ساۋدا تەبىنى بارىنشا ارتتى، ساتىلۋ مولشەرى ۇزدىكسىز جوعارىلادى. ”كەزەكتە جەلىدەن تىسقارى ەرەن بازارلارىنىڭ ساتۋ سوماسى بىلتىرعى سايكەس مەزگىلدەگىمەن سالىستىرعاندا %10 ارتتى“، - دەپ تانىستىردى وسى سەرىكتەستىكتىڭ تيجارات باسقارۋ ءبولىمىنىڭ باستىعى حان ۋيحۋا.

  سالاماتتىق تۇتىنۋ دا ورلەدى. ءۇرىمجى قالاسى مانحادۇن سالاماتتىق باسقارۋ شەكتى سەرىكتەستىگىنىڭ تۇتاس شينجياڭداعى تىزبەكتى دۇكەندەرى ىركەس - تىركەس تيجارات باستادى. دالالىق ساياحات تۇرمىس سارايىنىڭ جانە ۆەلوسيپەد دۇكەنىنىڭ تيجاراتىن جۇرگىزەتىن شونجى اۋدانىنىڭ تۇرعىنى فان شينگونىڭ العان اسەرى وتە تەرەڭ بولدى، ”بيىل كوپشىلىكتىڭ سالاماتتىق تانىمىنىڭ كۇشەيگەندىگىن ايقىن سەزىندىم، ۆەلوسيپەد دۇكەنى جۇمىس باستاعاننان بەرى دالالىق ۆەلوسيپەدتىڭ كۇندىك ورتاشا ساتىلۋ مولشەرى 7 اينالاسىندا، ساتىلىم سوماسى 20 مىڭ يۋانعا تاياپ، بىلتىرعىمەن سالىستىرعاندا ءبىر قاتتالدى“.

  ىندەت كەزىندە تۋىنداعان جاڭاشا تۇتىنۋ مەن دەڭگەيى جوعارىلاعان تۇتىنۋ دا ۇزدىكسىز ”جانداندى“. شينجياڭ سۋنيڭ يگوۋ ساۋدا شەكتى سەرىكتەستىگى بازار جانە ماركا باس باقىلاۋشىسى يۇي پەيحۋا: سۋنيڭ يگوۋ ينتەرنەت ابزالدىلىعىنان پايدالانىپ، جەلىدەگى سۋنيڭ بۇلت دۇكەن شاعىن باعدارلاماسى، سۋنيڭنىڭ تانىستىرۋشىلارى، ۋيچاتتا جارىسىپ ساتىپ الۋ، تىكە بەرىلىمدە زات ساتۋ سياقتى قوعامدىق، بۇقارالىق تيجارات - ساتۋ قۇرالدارى ارقىلى ءۇي ەلەكتر جابدىقتارىن ساتىپ الۋ قىزمەت وتەۋىمەن قامداپ، ”ءۇي ەكونوميكاسىن“ جانداندىردى، - دەپ تانىستىردى. ”2 - ايدىڭ 27 - كۇنىنەن 3 - ايدىڭ 15 - كۇنىنە دەيىن ءبىز كوپتەگەن ماركالارمەن جانە ون نەشە بانكەمەن بايلانىس جاساپ، جارىم ايدان استام ۋاقىتپەن ’24 كەزەك مەرزىمگە ءبولىپ ءوسىمىن كەشىرىم ەتۋ‘ قيمىلىن ورتاعا قويدىق، قيمىل جەلىگە شىققاننان كەيىن تاپسىرىس مولشەرى بارىنشا ارتتى. تۇتىنۋ كوكتەمى كەلىپ جەتتى“، - دەدى يۇي پەيحۋا.

  ”ءار ۇلت تۇتىنۋشىلارىنىڭ ساپالى، كوپ نەگىزدى، قولايلى تۇتىنۋ قاجەتىن قاناعاتتاندىرۋ ءۇشىن، سەرىكتەستىك جەلىدە ساتۋ، جەلىدەن تىسقارى سىناپ كورىپ زات الۋداي ساتۋ جاڭا ۇلگىسىن اشىپ، تۇتىنۋدىڭ ارتۋىن جەبەدى“. شينجياڭ حۇيجياشىداي ءتۇرلى بۇيىمدار جارنا شەكتى سەرىكتەستىگى سانجى رايونى باسقارۋ ورتالىعىنىڭ ورىنباسار باس مەڭگەرۋشىسى سەرجيمان بىلاي دەدى: ”ءبىز ىندەت كەزىندە جەلىدەگى ەرەن بازار سەپتەۋ - جەتكىزۋ ۇلگىسىن جالعاستىرىپ، جەلىدە سەپتەۋ - جەتكىزۋ ورتالىعىن قۇرىپ، ءتۇرلى بۇيىمدار قالىبىنىڭ جەلى سارايى دا 5 -، 6 - ايلاردا جەلىگە شىعارىلىپ، تۇتاس شينجياڭداعى تۇتىنۋشىلاردىڭ جەلىدە زات ساتىپ الۋىنا قولايلىلىق جاسالادى“.

جاۋاپتى رەداكتور: ءاننا اكىمقان قىزى