اعاجاي-التاي تورابى   ›   اقپارات ايدىنى   ›   سۋرەتتى حابارلار

ىندەتكە قارسى اتتانعان پەرىشتەلەر ۇيلەرىنە ورالدى

ىندەتكە قارسى اتتانعان پەرىشتەلەر ۇيلەرىنە ورالدى

  − شينجياڭنان حۋبەيعا كومەككە بارعان ەمدەۋ اترەتىنىڭ العاشقى توپتاعى مۇشەلەرىنىڭ شينجياڭعا قايتىپ كەلگەندىگى جونىندە تەز جازبا

 تىلشىلەرىمىز چاۋ جين، جاڭ يانفاڭ

  3 - ايدىڭ 17 - كۇنى ەمدەۋ اترەتىنىڭ مۇشەلەرى اۋىلدارىنداعى جاقىندارىنا قول بۇلعاۋدا. سول كۇنى شينجياڭنان حۋبەيعا كومەككە بارعان ەمدەۋ اترەتىنىڭ العاشقى توپتاعى مۇشەلەرى اۋىلدارىنا قايتا ورالدى. □ سۋرەتتى گازەتىمىزدىڭ جالپىلىق اقپارات قۇرالدارى ءتىلشىسى حان لياڭ تۇسىرگەن

  ”شينجياڭ، ءبىز قايتىپ كەلدىك!“ 3 - ايدىڭ 17 - كۇنى ساعات 20دان 45 مينۋت وتكەندە، مىڭحۋان ءنومىرلى بوين 787 ۇشاعىنىڭ ءۇرىمجى ديۋوپۋ حالىقارالىق اۋەجايىنا قونۋىمەن شينجياڭنان 2 - توپتا حۋبەيعا كومەككە بارعان ەمدەۋ اترەتىندەگى 102 اق حالاتتى جاۋىنگەر امان - ەسەن ورالدى، ولار قوس قولدارىن بۇلعاپ، جەڭىسپەن ورالعان باقىتىن الاقايلادى.

  5 ايماق، وبلىس، قالاداعى كوپتەگەن ەمدەۋ قۇرىلىمىنداعى ەمدەۋ - كۇتىمدەۋ قىزمەتكەرلەرىنەن ۇيىمداسقان وسى ەمدەۋ اترەتىندەگىلەر 2 - ايدىڭ 4 - كۇنى وسى ارادان ۋحانعا كومەكتەسۋگە بارعان ەدى. ولار ۋحانداعى كىتيڭ فاڭساڭ ەمحانادا 30 تاۋلىك بويى ەرلىكپەن شايقاس جاساپ، ىقىلاستى قىزمەت وتەپ، دەن قويا 254 ناۋقاستى كۇتىمدەپ، ساۋىقتىرىپ، ناۋقاستار اراسىندا ”قازا بولعاندار جوق بولۋ، جۇعىمدالعاندار جوق بولۋ، شيپاحاناعا قايتا اكەلىنگەندەر جوق بولۋ، شىرعالاڭ جوق بولۋ، ارىزدانعاندار جوق بولۋ“ سىندى قىزمەت نىساناسىن ىسكە اسىردى.

  ”اكە - شەشە، مەن ۇيگە جەتتىم، ءبىز تەز ارادا جۇزدەسەتىن بولامىز“. ەمدەۋ اترەتىندەگى جاسى ەڭ كىشى ەر سەسترا كامىلجان الىم قولىن بۇلعاپ ايعاي سالدى: ”حۋبەيعا كومەككە بارۋ ومىرىمدەگى ەڭ ۇمىتىلماس ءىس، ۇلدارىڭىز ۇمىتتەرىڭىزدى اقتادى، مەن ناعىز ەر ازامات بولىپ جەتىلدىم!“.

  ”ۋحانعا بارعان كەزىمىزدە ۇيگە قايتۋ ەڭ قۋانىشتى ءسات بولار دەپ ويلاعان ەدىم، الايدا شىنىمەن قايتاتىن بولعان شاعىمىزدا سونشا مول قيماستىقتار بولدى“. ەمدەۋ اترەتىنىڭ مۇشەسى باھارگۇل بودەش قوشتاساردا ۋحان حالقىنىڭ وزدىكتەرىنەن تۋ كوتەرىپ ەمدەۋ اترەتىندەگىلەردى اتتاندىرىپ سالعاندىعىن ۇمىتا المادى، فاڭساڭ ەمحانادا باسقا ولكە، قالادان كەلگەن ەمدەۋ اترەتىندەگىلەرمەن تىزە قوسا شايقاس جاساعان اسەرلى ساتتەردى ۇمىتا المادى، ناۋقاستاردىڭ رياسىز سەزىمگە تولى ءاربىر اۋىز العىستارىن تىپتەن ۇمىتا المادى. ”مەن كوڭىل تورىمدەگى ولاردىڭ دەنساۋلىقتارىنىڭ قالپىنا كەلىپ، تەزىرەك ساۋىعۋىن ءۇمىت ەتەمىن، ولارمەن شينجياڭدا كەزدەسۋگە ۋادەلەسىپ قويدىم، بۇل كۇننىڭ تاياۋ ەكەندىگىنە سەنىمىم كامىل“، - دەدى باھارگۇل.

  ”شەشە، ۇرىمجىگە جەتتىم، وسى مەزگىلدە جاپا شەكتىڭىز. مەن ەندىگارى نازارلارىڭىزداعى ەركە ’90 - جىلدىڭ تۇلەگى‘ ەمەسپىن، مەن دە ەرجەتتىم“. ەمدەۋ اترەتىنىڭ مۇشەسى جاڭ شين ۇشاقتان تۇسە سالا شەشەسىمەن بەينەجازبادا تىلدەستى.

  ”شەشە، ىندەت اقىرلاسقاننان كەيىن حۋبەيداعى ناعاشى اتام مەن ناعاشى اپاما ەرتىپ بارامىن، ءبارىمىز بىرگە ىستىق كەسپە جەيمىز...“ ”90 - جىلداردىڭ تۇلەگى“ پارتيا مۇشەسى حان لين قولىنا سالەمدەمە قورابىن كوتەرىپ الىپتى، ”بۇل ۋحانداعى ۇيرەك موينى سياقتى ەرەكشە ونىمدەر، كۇيەۋىم مەن شەشەمە اپارىپ بەرمەكشىمىن“. حان لين بىلاي دەدى: ” بالام بۇگىن 8 اي 10 كۇن بولدى، كۇيەۋىمنىڭ جانە شەشەمنىڭ بالامدى ايتارلىقتاي باعىپ جاتقانىنا العىس ايتامىن“.

  ءتىلشى 2 - ايدىڭ 4 - كۇنى اۋەجايعا بارىپ ولاردى اتتاندىرىپ سالعاندا، حان ليننىڭ ادەمى قولاڭ شاشى بار ەدى، قايتا كەزدەسكەندە قىرىقپا شاش بولىپتى، ول باسىن سيپاپ جايدارىلىقپەن ”كۇيەۋىم قازىرگى بەينەم ەڭ ادەمى ەكەن دەيدى!“ دەدى.

  ”ءبىزدىڭ وسى كۇتىمدەۋ قوسىنىمىز اتتاناردا، ولاردى باستاپ امان - ەسەن ۇيگە ورالامىز دەگەنمىن، مەن ايتقانىمدى ورىندادىم!“، - دەدى شينجياڭنان حۋبەيعا كومەككە بارعان 2 - توپتاعى ەمدەۋ اترەتىنىڭ جەتەكشىسى چىن حۇي كوزىنەن باقىت جاسى توگىلە.

  ۇشاقتىڭ الدىنان قارسى الا شىققان تىلشىلەردىڭ قول شاپالاق ءۇنى ىشىندە ەمدەۋ اترەتىندەگىلەر ۇلكەن اۆتوبۋزعا وتىرىپ، قوناقجايعا دەمالۋعا اتتاندى.

  بولمەسىنە جەتكەننەن كەيىن، حان لين چەمودانىنان ساقتاپ قويعان 2 ۇشاق بەلەتىن الىپ شىقتى. 2 - ايدىڭ 4 - كۇنگى ۇشاق بەلەتىنە ”ەر جۇرەك باتىرلارعا قۇرمەت، كۇيزەلگەندەرگە كومەكتەسىپ، قيىندىقتاردان وتكىزدى، ەمدەۋ قىزمەتكەرلەرى جاۋاپكەرشىلىگىن وتەدى“ دەپ جازىلىپتى، 3 - ايدىڭ 17 - كۇنگى بۇل ۇشاق بەلەتىندەگى ينفورماتسيا تىپتەن وزگەشە: ”كەزەكشى ۇشاق: جەڭىس ءنومىرلى، نىسانالى جەر: كورىكتى مەكەن، ۋاقىت: ىندەتكە قارسى تۇرۋدا جەڭىسكە جەتكەن كۇن، ۇشاققا شىعۋ اۋزى: جەڭىس قاقپاسى، ورنى: VVIP“. سىرتقى بەتىنە شيە گۇلى اشىلعان كورىنىستە شيپاگەر مەن ناۋقاس قولدارىمەن جۇرەك پىشىنىن كورسەتىپ تۇر: كوكتەم سەنىمەن تىپتەن نۇرلى، حۋبەي سەنىمەن تىپتەن كوركەم.

  حان لين ءۇنحاتتاعى دوستار شەڭبەرىن شولىپ ءوتتى. ”لەيلەي اپەكە 1014“: ”شينجياڭنىڭ ەمدەۋ قىزمەتكەرلەرى ۇيلەرىنە قايتتى، ءبىزدىڭ جىلاي - جىلاي كوزىمىز دومبىعىپ ءىسىپ كەتتى“ دەگەن ءسوز جازىپتى. حان لين بىلاي دەدى: لەيلەي اپەكە مەن قاراعان ناۋقاس، 1014 - توسەكتە جاتقان، قازىر حوشىنشان شيپاحاناسىنا اپارىلىپتى. ”ءبىز شينجياڭعا جەتتىك، ءبىزدى قاي - قاشان دا كوڭىل تورىنە قويعانىڭا راقىمەت، سەن دە مەنىڭ ۋحانداعى ەڭ قام جەيتىن ادامىمسىڭ، ەگەردە شيپاحانادان شىعاتىن بولساڭ، ءسوز جوق، سوناۋ شالعايداعى مىنا مەن شينجياڭدىق جاقىنىڭا قۇلاق قاعىس ەتىپ قويارسىڭ“ دەدى حان لين وعان حات جولداپ. ”جارايدى، ساعان جانە كوپشىلىككە، ءسوزسىز، ايتامىن، ۇيگە قايتاتىن كۇنى سەندەرگە بەينەجازبا جولدايمىن“. لەيلەي اپەكەنىڭ اشىق - جارقىن بەينەسىنەن حان ليننىڭ جۇزىنە كۇلكى ءۇيىرىلدى، ”ۇيگە ورالعان قانداي تاماشا“.

جاۋاپتى رەداكتور : ءاننا اكىمقان قىزى