شي جينپيڭ امەريكانىڭ زۇڭتۇڭى ترامپپەن تەلەفوندا سويلەستى

  شينحۋا اگەنتتىگىنىڭ 2 - ايدىڭ 7 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 2 - ايدىڭ 7 - كۇنى تۇستەن بۇرىن ۇسىنىس بويىنشا امەريكانىڭ زۇڭتۇڭى ترامپپەن تەلەفوندا سويلەستى.

  شي جينپيڭ بىلاي دەپ باسا دارىپتەدى: جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتى تۋىلعاننان بەرى، جۇڭگو ۇكىمەتى مەن حالقى ىندەتكە بار كۇشىمەن قارسى اتتاندى. ءبىز بۇكىل ەل بولىپ جۇمىلىپ، جاپپاي ورنالاستىرۋ جاساپ، جەدەل قيمىلداپ، ەڭ جان - جاقتى، ەڭ قاتاڭ ساقتانۋ - تىزگىندەۋ شارالارىن قولدانىپ، ىندەتتەن ساقتانۋ - تىزگىندەۋدىڭ حالىقتىق شايقاسىن باستادىق. قاتىستى قىزمەتتەردە بىرتىندەپ ناتيجەلەرگە قول جەتۋدە، ىندەتتى جەڭۋگە بۇكىلدەي سەنىمدىمىز، قابىلەتىمىز جەتەدى. جۇڭگو ەكونوميكاسىنىڭ ۇزاق ۋاقىت جاقسى بەتالىسقا قاراي دامۋ اۋقىمى وزگەرمەيدى.

  شي جينپيڭ بىلاي دەپ اتاپ كورسەتتى: جۇڭگو جاق جۇڭگو حالقىنىڭ ءومىرىنىڭ حاۋىپسىزدىگى مەن دەنساۋلىعىن قورعاپ قانا قويماي، دۇنيە ءجۇزى حالقىنىڭ ءومىرىنىڭ حاۋىپسىزدىگى مەن دەنساۋلىعىن دا قورعايدى. ءبىز اشىق بولۋ، جاريا بولۋ، جاۋاپتى بولۋ پوزيتسياسىمەن دۇنيە جۇزىلىك دەنساۋلىق ساقتاۋ ۇيىمىنا، سونداي - اق امەريكانى قامتىعان قاتىستى مەملەكەتتەر مەن رايوندارعا دەر كەزىندە حابارلاندىردىق ءارى دۇنيە جۇزىلىك دەنساۋلىق ساقتاۋ ۇيىمى سياقتىلاردىڭ قاتىستى ماماندارىن ۋحانعا بارىپ ناقتى تەكسەرۋ جۇرگىزۋگە ۇسىنىس ەتتىك. جۇڭگو −− وسى جولعى ىندەتتەن ساقتانۋ - تىزگىندەۋدىڭ ءبىرىنشى شەبى. ءبىز دەر كەزىندە باتىل، پارمەندى شارا قولدانىپ، دۇنيە جۇزىلىك دەنساۋلىق ساقتاۋ ۇيىمىنىڭ، سونداي - اق كوپتەگەن ەلدەردىڭ تولىق تۇراقتاندىرۋى مەن جوعارى باعاسىنا يە بولدىق.

  شي جينپيڭ بىلاي دەپ اتاپ كورسەتتى: جۇڭگو مەن امەريكا ىندەتتەن ساقتانۋ - تىزگىندەۋ جونىندە حابارلاسىپ تۇردى. مەن زۇڭتۇڭ مىرزانىڭ جۇڭگو جاقتىڭ ساقتانۋ - تىزگىندەۋ قىزمەتىنە تالاي رەت بەلسەندى باعا بەرگەنىن القايمىن، امەريكا قوعامىنىڭ ءار سالاسىنىڭ زاتتىق ماتەريال كومەگىن بەرگەنىنە العىس ايتامىن. تارالعىش اۋرۋعا ءار ەل كۇش بىرىكتىرە توتەپ بەرۋى قاجەت. قازىر ىندەتتەن ساقتانۋ - تىزگىندەۋ شەشۋشى كەزەڭدە تۇر. دۇنيە جۇزىلىك دەنساۋلىق ساقتاۋ ۇيىمى بارلىق ەلدىڭ باسى ارتىق اڭىس بىلدىرمەۋىن كاسىبي تۇرعىدان تالاي رەت ۇندەدى. امەريكا جاقتىڭ ىندەتتى بايسالدىلىقپەن باعالاپ، توتەپ بەرۋ شاراسىن ۇيلەسىمدى بەلگىلەۋىن ءارى رەتتەۋىن ءۇمىت ەتەمىز. جۇڭگو مەن امەريكا تىلدەسۋدى ساقتاپ، سايكەسۋدى كۇشەيتسە، ىندەتتەن بىرگە ساقتانىپ، تىزگىندەي الادى.

  ترامپ مىنالاردى ءبىلدىردى: امەريكا جۇڭگونىڭ جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتىنە قارسى تۇرۋىن زور كۇشپەن قولدايدى، جۇڭگوعا ماماندار جىبەرۋدى ءارى باسقا دا تاسىلدەرمەن جۇڭگو جاققا كومەك بەرۋدى قالايدى. جۇڭگو جاقتىڭ توتەنشە قىسقا ۋاقىت ىشىندە ارناۋلى جيناپ ەمدەۋ شيپاحاناسىن سالۋى ەرەكشە تەرەڭ اسەر قالدىردى، بۇل جۇڭگو جاقتىڭ ايرىقشا ۇيىمداستىرۋ جانە توتەپ بەرۋ قابىلەتىن تولىق كورسەتتى. ءتوراعا شي جينپيڭنىڭ باسشىلىعىندا، جۇڭگو حالقىنىڭ ىندەتكە قارسى تۇرۋدىڭ جەڭىسىنە، ءسوز جوق، قول جەتكىزەتىندىگىنە ءشۇباسىز سەنەمىن. امەريكا جاق جۇڭگو ەكونوميكاسىنىڭ دامۋىنا اسا سەنىمدى. امەريكا جاق ىندەتكە بايسالدى پوزيتسيامەن قارايدى جانە توتەپ بەرەدى، ەكى جاقتى جانە دۇنيە جۇزىلىك دەنساۋلىق ساقتاۋ ۇيىمى ارناسى ارقىلى جۇڭگو جاقپەن تىلدەسۋدى، سەلبەستىكتى ساقتاۋدى قالايدى.

  شي جينپيڭ بىلاي دەپ باسا دارىپتەدى: جۇڭگو مەن امەريكا تاياۋدا ءبىرىنشى كەزەڭدەگى ەكونوميكا - ساۋدا كەلىسىمىنە قول قويىستى. جۇڭگو مەن امەريكانىڭ مۇنداي كەلىسىمگە كەلۋى جۇڭگوعا ءتيىمدى، امەريكاعا ءتيىمدى، دۇنيە ءجۇزىنىڭ بەيبىتشىلىگى مەن گۇلدەنۋىنە ءتيىمدى. بۇل جۇڭگو مەن امەريكا اراسىندا ءىشىنارا الاۋىزدىقتار بولسا دا ەكى جاق تەڭدىك جانە ءوزارا قۇرمەت ەتۋ رۋحىن باسشىلىققا السا بولعانى، كەڭەسۋ، اقىلداسۋ ارقىلى ەكەۋى دە قابىلداي الاتىن شەشۋ ءادىسىن تابا الاتىندىعىن تولىق تۇسىندىرەدى. امەريكا جاقتىڭ جۇڭگو جاقپەن ءبىر نىساناعا قاراي ىلگەرىلەپ، ەكى ەلدىڭ مەملەكەت باسشىلارى قول جەتكىزگەن ورتاق تانىمدى مۇقيات تياناقتاندىرىپ، سايكەسۋ، سەلبەسۋ، ورنىقتىلىق جالپى ارناسىنان جازباي، جۇڭگو - امەريكا قارىم - قاتىناسىنىڭ جاڭا ءبىر جىلدا دۇرىس ارنامەن العا قاراي دامۋىن ىلگەرىلەتۋىن ءۇمىت ەتەمىن.

  ترامپ امەريكا جاقتىڭ جۇڭگو جاقپەن بىرگە قۇلشىنىپ كەلىسىمدى ويداعىداي تياناقتاندىرىپ، ەكى ەلدىڭ قارىم - قاتىناسىن بىرگە ىلگەرىلەتۋدى قالايتىندىعىن ءبىلدىردى.

  ەكى ەلدىڭ مەملەكەت باسشىلارى ءتۇرلى تاسىلدەر ارقىلى ءجيى قارىم - قاتىناستى ساقتاۋعا قوسىلدى.

جاۋاپتى رەداكتور: ءاننا اكىمقان قىزى