ەرلى - زايىپتى قارت پارتيا مۇشەلەرى 150 مىڭ يۋان اتادى

  التاي گازەتىنىڭ ءتىلشىسى ساعىنبەك رابات ۇلى حابارلايدى. 150 مىڭ يۋان اقشا اۋقاتتى، باردام وتباسى ءۇشىن ونشا كوپ اقشا ەمەس بولعانىمەن، ول التاي قالاسى ءابيتان قالاشىعى شىڭىراۋ قىستاعىندا تۇراتىن 77 جاستاعى ساقا پارتيا مۇشەسى ەلەۋسىز مۇرسالي قىزى مەن جۇبايى توقتاۋباي اقتايلاق ۇلىنىڭ ءومىر بويى تىرناشتاپ جيعانى. ەلەۋسىز اپا بيىل 77 جاستا، پارتيالىق ستاجى 54 جىل.

  2020 - جىلى 2 - ايدىڭ 3 - كۇنى التاي قالالىق قىزىل كرەست قوعامىنداعى قىزمەتكەرلەردىڭ كۋا بولۋىمەن، ول تىرناشتاپ جيناعان 150 مىڭ يۋانىن جىلۋعا اتاپ، جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ اۋرۋىنان ساقتانۋ - تىزگىندەۋگە ارنادى.

  ءتىلشىنىڭ ”نە ءۇشىن بۇلاي ىستەدىڭىز؟“ دەگەن سۇراۋىنا، ەلەۋسىز اپا: ”ويتكەنى، مەن كومپارتيا مۇشەسىمىن، ارينە، پارتيانىڭ مەيىر-شاپاعاتىن اقتاپ، راقىمەت ايتۋىم كەرەك عوي“ـــ دەپ جاۋاپ قايىردى. ونىڭ جاۋابى كەلتە بولعانىمەن، تۇسىنگەن ادامعا سالماقتى ەدى. ەلەۋسىز اپانىڭ بويىنان ساقا كوممۋنيستىڭ اۋەلگى ماقساتى مەن بورىشى مەن مۇندالايدى.

  ەلەۋسىز اپا: ”ءبىزدىڭ بۇگىنگى باقىتتى تۇرمىسىمىز پارتيانىڭ باسشىلىعىنان ايرىلا المايدى، پارتيا ءبىزدى باقىتتى دا تاماشا تۇرمىسقا كەنەلتتى. وتىرىقتانعاننان كەيىن بالالاردىڭ ويداعىداي وقۋىنا، جاستاردىڭ ءتۇرلى كاسىپ ىستەپ اۋقاتتانۋىنا جول اشىلدى، قارتتار تۇگەلدەي ەمدەلۋ قامسىزداندىرۋىنا قاتىناستى، قازىر ىشكەنىمىز الدىمىزدا، ىشپەگەنىمىز ارتىمىزدا، قوي ۇستىنە بوز تورعاي جۇمىرتقالاعان زامان ورنادى“- دەدى ماقتانىشتى سەزىممەن.

  ۇعىسۋعا قاراعاندا، ەلەۋسىز اپا كەزىندە جەتىم بالا ەكەن، پارتيا مەن ۇكىمەتتىڭ ايالى الاقانىندا ەسەيىپ - ەرجەتىپ، ۇزاق جىل ايەلدەر قىزمەتىن ىستەپتى. ونىڭ 2 بالاسى اۋرۋ سەبەبىنەن ومىردەن ەرتە وزىپتى دا، قازىر 79 جاستاعى جۇبايىمەن بىرگە تۇرمىس كەشىرىپ كەلەدى. ”پارتيا بولماسا، مەن دە بولماۋشى ەدىم، ادامدا العىس ايتۋ سەزىمى بولۋى كەرەك“ـــ دەدى ەلەۋسىز اپا. بۇل ونىڭ وسىناۋ ومىردەن قورىتقان شىنايى تاجىريبەسى.

  ”تاياۋدان بەرى تەلەۆيزوردان جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ اۋرۋىنا قاتىستى حاباردى كورىپ، قاتتى قينالدىم، ىس - تۇتەكسىز شايقاستىڭ ءبىرىنشى شەبىندە شايقاس جاساپ جاتقان اق حالاتتى شيپاگەر - سەسترالار مەن كادر - ساقشىلار بالالارىم سياقتى. جۇبايىم دا پارتيا مۇشەسى، سونىمەن، ءبىز اقىلداسا كەلە ولارعا از دا بولسا كومەك بەرۋ بەكىمىنە كەلدىك. اتاعان اقشامىز تىم قوماقتى بولماعانىمەن، ءبىرىنشى شەپتە باسىن ءباي تىككەن ميلليونداعان پارتيا مۇشەسى، كادرلار جانە جۇمىسشى - قىزمەتشىلەر پارتيانىڭ باسشىلىعىندا، ءسوز جوق، ەڭ سوڭعى جەڭىسكە جەتەدى دەپ سەنەمىن. وتاننىڭ قۇدىرەتتەنۋىن، حالىقتىڭ باقىتتى بولۋىن، ىندەتتىڭ تەزىرەك جويىلۋىن تىلەيمىز“- دەدى ەلەۋسىز اپا نىق سەنىممەن.

جاۋاپتى رەداكتور: ءاننا اكىمقان قىزى