اعاجاي-التاي تورابى   ›   اقپارات ايدىنى   ›   شينجياڭ حابارلارى

”بۇل جەردە وراي كوپ، دامۋ كەڭىستىگى كەڭ“

”بۇل جەردە وراي كوپ، دامۋ كەڭىستىگى كەڭ“

شەتەلدىكتەر نازارىنداعى شينجياڭ

شينجياڭ گازەتىنىڭ ءتىلشىسى جاۋ يۋە

  ”شينجياڭدىقتار ىستىق ىقىلاستى، باۋىرمال، قالا گۇلدەنىپ - قۇلپىرىپ كەلەدى، بۇل جەردە وراي كوپ، دامۋ كەڭىستىگى كەڭ!“، - دەدى 2019 - جىلى 12 - ايدىڭ 23 - كۇنى حانزۋ ءتىلىن جاتىق سويلەيتىن نۇسيەۆ ءمانسۇر تىلشىگە.

  نۇسيەۆ تۇركمەنستاننان كەلگەن، شينجياڭ داشۋەسى حالىقارالىق مادەنيەت اۋىس - ءتۇيىس شۋەيۋانى حانزۋ ءتىلى كاسىبىنىڭ 4 - جىلدىعىندا وقيتىن شەتەلدىك وقۋشى. بۇل جەرگە كەلىپ وقۋدان ىلگەرى ول كينو فيلمدەردەن گۇڭفۋ ارتيسى چىڭ لۇڭدى بىلگەننەن باسقا، جۇڭگو جانە جۇڭگونىڭ شينجياڭى تۋرالى ەشتەڭەدەن حابارى جوق ەدى.

  نۇسيەۆ 2016 - جىلى 11 - ايدىڭ 9 - كۇنى ءبىرىنشى رەت شينجياڭ سىندى وسى كورىكتى جەرگە تۇڭعىش قادام تاستاعانداعى حال - جايىن ءالى كۇنگە اپ - انىق ەسىندە ساقتاپ كەلەدى. ”تۇرار جايىما جەتكەننەن كەيىن، ءبىر ءتۇرلى ەرەكشە حوش ءيىستى سەزدىم، ول ءدامدى تاعامداردان بۇرقىراعان حوش ءيىس ەكەن“. 4 ساعاتقا جۋىق ۋاقىت ۇشاققا وتىرىپ كەلگەن نۇسيەۆ سول كەزدە قۇرساعىم قاتتى اشىپ كەتىپ ەدى دەيدى، بۇرقىراپ جەتكەن حوش ءيىس وعان ءۇرىمجى سىندى وسىناۋ قالانىڭ كوركەيىپ - گۇلدەنگەنىن سەزىندىردى.

  بىرنەشە جىلدا ونىڭ حانزۋ ءتىلى ورەسى تەز جوعارىلادى. ”كلاس جەتەكشىمىز ءبىزدىڭ تۇرمىسىمىزعا ەرەكشە كوڭىل بولەدى، مەيلى مۇعالىمدار، ساباقتاستار، الدە كوشەدەن جولىققان ادامدار بولسىن، كوپشىلىك ىستىق ىقىلاستى، اشىق - جارقىن، ادامعا كەرەمەت باۋىرمال. ءۇرىمجىنىڭ قىسى قاتتى سۋىق بولعانىمەن، بۇل جەردىڭ ادامدارى ىنتىماقتى، دوستىققا ادال، مەن بۇل جەردىڭ تۇرمىسىن ەرەكشە ۇناتامىن“. نۇسيەۆ جىل سوڭى تاياپ قالعاندىقتان ءوزىنىڭ كوشە بيىنە ماشىقتانىپ، جاڭا جىل بىرلەسكەن ساۋىق كەشىنىڭ سوڭعى جاتتىعۋىمەن قاربالاس جۇرگەندىگىن، جازاتىن مەكتەپ ءبىتىرۋ ديسسەرتاتسياسى تاعى بار ەكەنىن، جۋىق ارادا الىناتىن جاڭا حانزۋ ءتىلى ورەسى ەمتيحانىنىڭ (HSK) التىنشى دارەجەسىنە دايىندالاتىندىقتان ۋاقىتى تىعىز ورنالاستىرىلعاندىعىن ايتتى.

  وسى جىلدارى نۇسيەۆ ءۇرىمجىنىڭ قالا قۇرىلىسىنىڭ تەز قارقىنمەن دامىعانىن باسىنان وتكەردى، قالا جولدارى ءتىپتى دە وسىزاماندانعان، كوشە جولدارىنىڭ ورتاسى شىت جاڭا بەينەگە ەنگەن. ول حۋاليڭ بازارى مەن شاڭماۋچىڭعا بارعان، دوستىق ساۋدا سارايى مەن شينجياڭ حالىقارالىق ۇلكەن بازارىن ارالاعان، ول بۇل قالادا ساۋدا بۇيىمدارى ەرەكشە مول، بارلىق جەرى گۇلدەنگەن، ومىرشەڭدىگى تاسقىنداعان دەپ ەسەپتەيدى، ”مەن قازىر سىرتقا شىقسام ۇنەمى مەتروعا وتىرامىن، شينجياڭ داشۋدەن حالىقارالىق اۋەجايعا باراتىن جولعا قانىقپىن“، - دەيدى.

  3 جىلدان استام ۋاقىتتان بەرى، نۇسيەۆتىڭ ساباقتان سىرتقى تۇرمىسى باي مازمۇندى بولىپ كەلەدى. جاز كۇندەرى ول ساباقتاستارىمەن بىرگە نانشانعا بارىپ سەيىلدەپ، ىستىقتان ساقتانىپ، كاۋاپ جەيدى؛ قىس كۇندەرى ءۇرىمجى جىبەك جولى حالىقارالىق قار شاڭعى الاڭىندا سىڭار تاقتايمەن شاڭعى تەبۋدى ۇيرەنەدى. كەيدە اپتا سوڭىندا دوستارى ونى ۆيستى دەمالۋ ورنىنا بارىپ اراسانعا تۇسۋگە ۇسىنىس ەتەدى. شينجياڭدا ول ساقپى ۇستاعاندى ۇيرەندى، ساماۋىر سورپاسىن ءىشتى، اشتى - تۇشتى جەۋگە قۇمارتىپ الدى. ”ۇيىمدەگىلەر اشتى - تۇشتىنى جەي المايدى“ دەپ كۇلگەن ول ءوزىنىڭ ساباقتاستارىنان توراپتان زات ساتىپ الۋدى ۇيرەنگەنىن، كيىپ جۇرگەن كيىمدەرىنىڭ ءبارىن توراپتان ساتىپ العانىن... اڭگىمەلەدى.

  ۋاقىت شىركىن اتقان وقتاي، 2020 - جىلى مەن داشۋەنىڭ تولىق كۋرسىن بىتىرەمىن!“ نۇسيەۆ تەبىرەنە بىلاي دەدى، ”وقۋ بىتىرگەن سوڭ ساۋدا - ساتتىق اۋدارماشىسى بولۋعا قاناعاتتانبايدى، شينجياڭداعى وقۋشىلىق ءومىرى جۇڭگونىڭ دامۋىن تانۋعا ءبىر تەرەزە اشىپ بەردى، بارلىق جەر ورايعا تولى ەكەنىن كوردى. جۇڭگونىڭ اسپيرانت ەمتيحانىنا قاتىناسۋدى جوسپارلاپ وتىر. ”مەنىڭ بولاشاقتاعى قىزمەتىم، تۇرمىسىم شينجياڭمەن تىعىز قاتىستى بولاتىنى ءسوزسىز“، - دەيدى نۇسيەۆ.

جاۋاپتى رەداكتور : ءاننا اكىمقان قىزى