ۇلتتىق كەستەشىلىك كاسىبىنە مۇراگەرلىك ەتىپ، اۋقاتتانۋدىڭ جولىنا قادام تاستادى

  «شينجياڭ گازەتىنىڭ» ءتىلشىسى جاڭ تيڭ، ەرىكتى ءتىلشى دۇڭ شىجۇي حابارلايدى. جاقىندا، ءتىلشى جەمەنەي اۋدانى بەستەرەك اۋىلى قۋانىش ۇلتتىق قولونەر بۇيىمدارى كەستەشىلىك كاسىپتىك سەلبەستىك كووپەراتيۆىندە، قۋانىش سەتەرقان قىزىنىڭ الۋان رەڭدى بولعان ۇلگى بويىنشا كەستە تىگىپ جاتقانىن كوردى.

  قۋانىش بەستەرەك اۋىلىنىڭ قاراپايىم قىستاق تۇرعىنى ءارى وسى ۇلتتىق قولونەر بۇيىمدارى كەستەشىلىك كاسىپتىك سەلبەستىك كووپەراتيۆىنىڭ جاۋاپتىسى. ول قازىر 10 نەشە جەلەكتىنى باستاپ، ۇستەمە جۇمىس ىستەپ، قازاق ۇلتىنىڭ ءداستۇرلى توي ـ تومالاق بۇيىمدارىن تىگۋدە.

  قۋانىشتىڭ كاسىپ كوزىن اشۋ جولىنا كوز تاستاساق، مۇنى 2000 ـ جىلدان باستاپ ايتۋعا تۋرا كەلەدى. سول كەزدە، قۋانىش جۇمىستان بوساپ، جولداسىنىڭ مال باعۋىنا سۇيەنىپ كۇنەلتەدى. كەيىن كەلە ول ءوزىنىڭ قولونەرىنە سۇيەنىپ، قولونەر بۇيىمدارى كەستەشىلىك كاسىپتىك سەلبەستىك كووپەراتيۆىن قۇرادى. قۋانىشتىڭ ايتۋىنشا ونىڭ كەستەشىلىك ونەرى اناسىنان كەلىپتى، قارشادايىنان كەستە تىگۋدى ۇناتاتىن ول قولى بوساي قالدى بولدى كەستە تىگىپ، كەستەشىلىك ونىڭ تۇرمىسىنىڭ ءبىر بولىمىنە اينالادى. سونىمەن ول 2014 ـ جىلى قىستاق كوميتەتىنىڭ كومەگىندە كاسىپ كوزىن اشۋ جولىنا قادام تاستايدى.

  سەلبەستىك كووپەراتيۆىن قۇرعاننان كەيىن، ول ىلگەرىندى ـ كەيىندى التاي قالاسىنا كوپ رەت باسىپ كەستەشىلىك ونەرىن ۇيرەنەدى، ول جاساعان كورپە، جاستىق قاپتارى قاتارلى قازاق ۇلتىنىڭ كەستە بۇيىمدارى جەمەنەي اۋدانىندا جانە باسقا اۋدان قالالاردا ساتىلىپ قالماستان، ءۇرىمجى قاتارلى ۇلكەن قالالاردا دا ساتىلا باستادى. قۋانىشتىڭ سەلبەستىك كووپەراتيۆىنىڭ ساۋداسى جاندانىپ، كوپ تاپسىرىس قابىلداپ، كەستە تىگە الاتىن قازاق ايەلدەرى ارت ـ ارتىنان كووپەراتيۆكە كىرىپ، مۇشە سانى اۋەلگى 5 ادامىنان 15 ادامعا كوبەيەدى، بۇدان تىس تاعى 20 نەشە ايەل كووپەراتيۆكە مۇشە بولىپ ونىمەن سەلبەسكىسى كەلەدى ەكەن.

  مايرا ەرجان قىزى قۋانىش ۇلتتىق قولونەر بۇيىمدارى كەستەشىلىك كاسىپتىك سەلبەستىك كووپەراتيۆىنە مۇشە بولعاننان كەيىن، وتباسى تۇرمىس جاعدايى دا بارعان سايىن جاقساردى. ول بىلاي دەدى: ”بۇرىن وتباسى شارۋاسىمەن اينالىسىپ، بالالارعا قارايتىنمىن، سەلبەستىك كووپەراتيۆىنە مۇشە بولعان 6 جىلدان بەرى، كەستەشىلىك ونەرىم بارعان سايىن جەتىلدى، ايىنا 2000 يۋاننىڭ ۇستىندە كىرىس كىرگىزەمىن“.

  قۋانىشتىڭ كەستەشىلىك كووپەراتيۆىندە ۇلكەنى دوڭگەلەك سىرماق، توسەك جاپقىش، پەردە، كيىم ـ كەشەك، كىشىسى توسەنىش قاتارلى رەڭى الۋان ءتۇرلى، ايقىن ۇلتتىق ەرەكشەلىككە يە قازاق ۇلتىنىڭ ءتۇرلى قولونەر بۇيىمدارى بار. قۋانىش التاي ساياحاتىنىڭ دامۋىنا ۇشتاستىرىپ، ساياحاتشىلاردى جەرگىلىكتى مادەنيەت ەرەكشەلىگىنە يە كۇندەلىكتى تۇرمىستىق بۇيىمدارمەن قامداۋمەن بىرگە، كەستە بۇيىمدارىن ءتۇرلى ۇلتتىق سالت ـ سانا كورمەلەرىنە قاتىناستىردى. بيىل 8 ـ ايدا وتكىزىلگەن جۇڭگو التاي تۇڭعىش كەزەكتى التىن، اسىل تاس، قاس تاسى مادەنيەت مەرەكەسىندە، ونىڭ اكەلگەن بۇيىمدارىن ساياحاتشىلار تالاسا ـ تارماسا ساتىپ السا، تاپسىرىس دا ۇزدىكسىز ارتتى.

  قۋانىشتىڭ تانىستىرۋىنشا تاياۋ جىلداردان بەرى كەستەشىلىك سەلبەستىك كووپەراتيۆى قازاق ۇلتىنىڭ ءداستۇرلى قولونەر بۇيىمدارى كەستەشىلىگى نەگىزىندە، جوعارى ءونىمدى وسىزاماندانعان كەستە ماشيناسىمەن ۇشتاستىرىپ، ۇلتتىق كەستەشىلىك كاسىبىن كۇش سالا دامىتتى. قۋانىش بىلاي دەدى: ”قازىر كەستەشىلەر وسىزاماندانعان كەستە ماشيناسىمەن اۆتوكولىك ورىندىق قابىن ءبىر كۇندە ـ اق تىگىپ شىعادى، شەتىنە قولمەن ورنەك سالادى، ەرەكشە تاماشا. ال بۇرىن مۇنى 10 نەشە كۇندە ارەڭ تىگىپ بولاتىنبىز“. بۇگىنگى تاڭدا كەستە ماشيناسى جەرگىلىكتى ورىنداعى قازاق ايەلدەرىنىڭ كىرىستەرىن ارتتىرىپ، اۋقاتتانۋعا قادام تاستاۋىنىڭ ماڭىزدى دانەكەرىنە اينالدى.

جاۋاپتى رەداكتور: ءاننا اكىمقان قىزى