ادامزاتتىڭ بايىرعى قار شاڭعى مەكەنىندە بايىرعى تەرى قار شاڭعىنىڭ كەلبەتىن ايگىلەدى

ـــ التاي قالاسىنىڭ كوكتەم مەرەكەسىن قارسى الۋ ات بايگەسىنە نازار

  التاي گازەتىنىڭ ءتىلشىسى حۋ جۇنشيۋ حابارلايدى. التاي قالاسىندا وتكىزىلگەن كوكتەم مەرەكەسىن قارسى الۋ ات بايگەسىندە، بايىرعى تەرى قار شاڭعى جارىسىنڭ اعا جۇلدەگەرى بولعان اعىزام اقپارات دانەكەرلەرىنىڭ تىلشىلىگىن قابىلداعاندا بىلاي دەدى: ”بايىرعى قار شاڭعىمەن شاڭعى تەبۋدى توتەنشە ۇناتامىن، بۇل ءبىزدىڭ اتا ـ بابالارىمىزدان قالعان مۇرا، بۇنى ۇزدىكسىز جالعاستىرا تۇسەمىن“.

  1 ـ ايدىڭ 4 ـ كۇنى التاي قالاسىنداعى بايگە جارىسىنداعى بايىرعى قار شاڭعى جانە وسىزامانعى قار شاڭعى جارىسىندا، جىلدامدىق سايىسى بەينەلەنىپ، مادەنيەت پەن مۇراگەرلىك ەتۋدىڭ ەڭ كەمەلدى تۇسىندىرمەسى بولدى.

  ءارقايسى اۋداننان (قالا) كەلگەن، ۇلتتىق كيىم كيىپ، قولىنا اعاش تاياق ۇستاپ، اياقتارىنا بايىرعى شاڭعى تاققان 100 شاباندوز مايدانعا شىعىسىمەن، ساياحاتشىلاردىڭ تالاسا تارماسا سۋرەتكە تارتۋ وبيەكتىسىنە اينالدى.

  سىچۋاننان كەلگەن ساياحاتشى لاي شين بىلاي دەدى:”ولار مايداندا شىعا سالىسىمەن قويۋ مادەنيەت رايىن سەزىندىم، بۇل بايىرعى قار شاڭعى مادەنيەتىن بەينەلەيتىن التىن ماركا، ءسوزسىز سۋرەتكە ءتۇسىپ ەستەلىك قالدىرۋ كەرەك“.

  التاي قالالىق پارتكوم ۇگىت ءبولىمىنىڭ ورىنباسار باستىعى ۋاڭ يۇيلي ساياحاتشىلارعا ءتۇسىندىرىپ بىلاي دەدى: ”بايىرعى قار شاڭعى التاي تاۋى رايونىنداعى ەجەلگى كوشپەندى ۇلتتاردىڭ قارلى القاپتا پايدالانعان قاتىناس قۇرالى، تاۋعا شىققاندا ارتقا سىرعىمايتىن، تاۋدان تۇسكەندە قارقىنى تەز بولۋداي ەرەكشەلىككە يە. ادامزاتتىڭ قار شاڭعى مەكەنىندە بايىرعى قار شاڭعىمەن سىرعاناۋ تەك ’جۇڭگوداعى قارلى مەكەن‘ التايدا عانا بار“.

  وسىدان كەيىنگى 3 كيلومەترلىك وسىزامانعى قار شاڭعى جارىسىندا، شاباندوز سامعار اعا جۇلدەگەرلىككە يە بولدى. ول بىلاي دەدى: ”قار شاڭعى تەبۋدى توتەشە ۇناتامىن، مەن، ءسوزسىز، جالعاستى قۇلشىنىپ، 2022 ـ جىلعى بەيجيڭ قىسقى ولمپياسىندا، اتا مەكەنگە داڭق الىپ بەرۋگە تىرىسامىن“.

  بايىرعى تەرى قار شاڭعىسى مەن وسىزامانعى قار شاڭعىنى ءوزارا ۇشتاستىرۋ، ايماعىمىزدىڭ جاقىنعى جىلداردان بەرگى قار ـ مۇز دەنەتاربيەسىن دامىتۋدى بار كۇشپەن دەمەۋىنىڭ ءبىر شاعىن كورىنىسى.

  2005 ـ جىلى التاي قالاسى قاندىعاتى موڭعۇل ۇلتتىق اۋىلى دوندۇربۇلاق بايىرعى قار شاڭعى جارتاس سۋرەتى ادامدار جاعىنان بايقالىپ، مامانداردىڭ ساراپتاۋىمەن، التاي ”ادامزاتتىڭ قار شاڭعى مەكەنى“ بولىپ حالىقارالىق كۋالاندىرۋعا يە بولدى. 2018 ـ جىلى 8 ـ ايدا، التاي تاعى دا مەملەكەتتىك كليمات ورتالىعى جاعىنان ”جۇڭگوداعى قارلى مەكەن“ داڭقتى اتاعىنا يە بولدى. جاقىنعى جىلداردان بەرى، ”جەر ءجانناتى ـــ قاناس، قارلى مەكەن ـــ التاي“ ايگىلى ماركاسىن توڭىرەكتەپ، ايماق قار مۇز ساياحاتى مەن قار ـ مۇز دەنەتاربيەسىن بار كۇشپەن دامىتىپ، 2019 ـ جىلدىڭ وزىندە، قىسقى ساياحات مەرەكە قيمىلىنان 45 ىن ورىستەتىپ، ”جۇڭگوداعى قارلى مەكەن“ التىن تاقتاسىن جارقىراتا ءتۇستى.

  ”قار شاڭعى ءپىرى“ شان جاۋچيان 14 ـ كەزەكتى شينجياڭ قىسقى ساياحات كاسىبى ساۋدا كورمەسىنىڭ دۇنيەجۇزىلىك بيىك تاۋدان سىرعاناۋ تالقى مىنبەسىندە بىلاي دەدى: ”التايدىڭ قار ـ مۇز مادەنيەت كاسىبى ەڭسە كوتەرىپ كەلەدى، بايىرعى قار شاڭعى مادەنيەتى التايلىقتاردىڭ بايلىعى بولىپ قالماستان، دۇنيەنىڭ دە اسىل مۇراسى، التايدىڭ قار شاڭعى تەبۋدەگى تاپتىرماس جەرگە اينالاتىندىعىندا داۋ جوق“.

جاۋاپتى رەداكتور: ءاننا اكىمقان قىزى