اعاجاي-التاي تورابى   ›   زاڭ-تارازى   ›   عىلىمي ماقالالار

«ولار مەنى قاجەت ەتكەندە قاسىنان تابىلامىن»

  ەرىكتى تىلشىلەر جياڭ يەجۇن مەن جوۋ رۇي حابارلايدى. 12 ـ ايدىڭ 22 ـ كۇنى بۋىرشىن اۋدانىنىڭ شاعىن قالاشىعى اق كورپەسىن قىمتاندى. وسى اۋداننىڭ ەگىزتوبە اۋىلى جيدەلى قىستاعىنىڭ تۇرعىنى مۇراتبەك باباقۇمار ۇلى وتباسىنىڭ قىستا جاعاتىن كومىرى تاۋسىلارعا تاياپ ابىرجىپ وتىرعاندا، اۋداندىق اۋىل ـ قىستاق سەنىمدى قارىز كووپەراتيۆى «ۇعىسۋ، تيىمدىلىك جاساۋ، توعىستىرۋ» قيمىلى بويىنشا قىستاقتا تۇراتىن قىزمەت اترەتىنىڭ مۇشەسى فان بو ءبىر ماشينا كومىر ءتۇسىرىپ بەرىپ، مۇراتبەكتىڭ قيىنشىلىعىن شەشتى.

  فان بو مەن مۇراتبەكتىڭ اڭگىمەسى 2016 ـ جىلعى «ۇلتتار ىنتىماعىنىڭ بەرەكەلى شاڭىراعى» اتىنداعى دوستاسىپ تۋىستاسۋ قيمىلىنان باستاۋ الادى. تۋىسىمەن العاش تانىسا بارعانىندا فان بو مۇراتبەكتىڭ وكپە تۋبەركۋلەزى ناۋقاسىنا شالدىققاندىعىن، 2 بالاسىنىڭ بارلىعىن، ءبىر ءۇيلى جان جۇبايى گۇلباقىتتىڭ جالداما ىستەپ تاپقان اقشاسىنا سۇيەنەتىندىگىن، سوڭعى كەزدەردە «جىعىلعانعا جۇدىرىق» دەگەندەيىن، گۇلباقىتتىڭ دا ۇزاق ۋاقىت ارىپ ـ شارشاۋ سەبەبىنەن جۇرەك اۋرۋىنا، رەۆماتيزمگە شالدىعىپ، كۇن كورىسى قيىنعا سوققانىنان حابار تابىسىمەن ولارعا شىن نيەتىمەن قول ۇشىن بەرۋ بەكىمىنە كەلدى. مۇراتبەك وتباسىنىڭ بوس تۇرعان اۋلاسىن كورگەن فان بو ءوزى اقشا شىعارىپ تاۋىق، قاز بالاپانىن جانە جەم ساتىپ الىپ، ءۇي قۇستارى باعىمشىلىعى جونىندەگى تەحنيكانى ۇيرەنىپ، مۇراتبەكتى سۇيەمەلدەۋ ويىنا كەلەدى.

  مۇراتبەك اسەرلى بەينەدە تىلشىگە: «فان ءىنىم وتباسىمىزدىڭ بارلىق ىستەرىنە سونداي كۇيىنەدى، شيپاگەرگە كورسەتىپ، ءدارى ـ دارمەك جەتكىزىپ، بىزگە ءۇي قۇستارى باعىمشىلىعىن، ونى قالاي بازارعا سالۋ جاعىن ۇيرەتتى. بۇل جاقسىلىعىن جۇبايىم ەكەۋىمىز ءومىر بويى ۇمىتپايمىز» ـ دەدى.

  جاپالى تۇرمىس ورتاسى ونىڭ 2 بالاسىنىڭ جىگەرىن مۇقالتا المادى. مۇراتبەكتىڭ 2 قىزى دا ۇزدىك وقىدى، ۇلكەن قىزى سىمبات ورتالاۋ، تولىق ورتا مەكتەپتى دە ىشكى ولكەدەن تامامداپ، شىعىس سولتۇستىك پەداگوگيكا داشۋەسىنە قابىلداندى. كىشى قىزى قىمبات ەگىزتوبە اۋىلدىق جاتاقتى مەكتەپتەگى ۇزدىك وقۋشىنىڭ ءبىرى. فان بو ءاردايىم قىمباتتىڭ كلاس جەتەكشىسىمەن حابارلاسىپ، قىمباتقا ارنايى امانداسا بارىپ تۇرادى. 2018 ـ جىلى 9 ـ ايدا قىمبات اۋدان بويىنشا 3 ـ دارەجەلى ۇزدىك ناتيجەمەن التاي قالالىق 3 ـ ورتا مەكتەپتىڭ ىشكى ولكە ورتالاۋ كلاسىنا قابىلداندى، ارالىقتا فان بو تاعى جۇبايىمەن بىرگە جەكسەنبى كۇندەرى قىمباتتى ۇيىنە اكەلىپ ساباعىن پىسىقتاتىپ، بىرلىكتە كوڭىل كوتەردى.

  مۇراتبەكتىڭ الاڭسىز كاسىپتەنۋى، بالالاردىڭ وقۋىن بار زەيىنىمەن الاڭسىز وقۋى ءۇشىن، فان بو ءار ايدا ءۇنحات ارقىلى سوناۋ شىعىس سولتۇستىكتە وقىپ جاتقان سىمباتقا قول ۇزدىك اقشا جىبەرىپ تۇردى، وقۋدان تاراعانداعى ۇيىنە كەلگەن ـ كەتكەن جول اقىسىن دا فان بو تولەدى.

  بيىل 3 ـ ايدا ناۋقاسى اۋىرلاسۋ سەبەبىنەن گۇلباقىت شينجياڭ مەديتسينا داشۋەسىنە قاراستى 1 ـ شيپاحاناسىنا وپەراتسيا جاساتۋعا باردى. ءىنىسىن اۋرەلەمەۋ ءۇشىن، مۇراتبەك جۇبايىن ەرتىپ شيپاحاناعا توتە تارتتى. بۇدان حابار تاپقان فان بو ولاردىڭ سوڭىنان دەرەۋ ۇرىمجىگە اتتاندى، قارايلاسۋعا قولايلى بولۋ ءۇشىن جۇبايىن دا ارناۋلى شاقىرتىپ الدى.

  گۇلباقىت تىلشىگە: «فان بو پارتيا مەن ۇكىمەتتىڭ جىبەرگەن جاقسى كادرى، ونىڭ ويلايتىنى ءبىزدىڭ وتباسىمىز» ـ دەدى.

  فان بو تىلشىگە: «اۋدان قالاشىعى مەن مۇراتبەك وتباسىنىڭ ارا قاشىقتىعى 30 كيلومەتر. ال، قىستاق كوميتەتى مەن مۇراتبەك وتباسىنىڭ ارالىعى ءبىر كيلومەتر، ولار مەنى قاجەت ەتكەندە قاسىنان تابىلامىن» ـ دەدى. بيىل 6 ـ ايدا مۇراتبەكتىڭ دەنساۋلىق جاعدايىن ەسكەرگەن فان بو مۇراتبەك وتباسىنا اناعۇرلىم ويداعىداي قارايلاسۋ ءۇشىن، مەكەمە باسشىلارىن ارنايى ىزدەپ بارىپ، «ۇعىسۋ، تيىمدىلىك جاساۋ، توعىستىرۋ» قيمىلى بويىنشا قىستاقتا تۇراتىن قىزمەت اترەتىنە بارىپ قىزمەت ىستەۋدى تالاپ ەتتى.

  3 جىلدان بەرى، فان بو مەن مۇراتبەك وتباسىنداعىلار توننىڭ ىشكى باۋىنداي تاتۋ ـ ءتاتتى ارالاسىپ، ەستىگەن جان بالاسىن اسەرلەندىرەتىن تاماشا حيكايالار جازىپ قالدىردى، بۇل حيكايالار جيدەلى قىستاعىندا اۋىزدان ـ اۋىزعا تارالۋدا.

جاۋاپتى رەداكتور : ءاننا اكىمقان قىزى