اعاجاي-التاي تورابى   ›   مادەنيەت ارناسى   ›   ونەگە

ۇل بالا تاربيەسى: ايتۋعا بولمايتىن سوزدەر

  ۇل بالا تاربيەسى: ايتۋعا بولمايتىن سوزدەر

  بالاعا سوزبەن ەمەس، ىسپەن ۇلگى بوپ تاربيەلەسەك تە، ءبىزدىڭ ءار ءسوزىمىز ولاردىڭ ومىرىنە تىكەلەي اسەر ەتەدى. "ولاي ىستەسەڭ جاقسى كورمەيمىن"، "سەن سياقتى بالا بولعانىنان بولماعانى ارتىق"، "سەنى نەگە ومىرگە اكەلدىم ەكەن" دەگەن سياقتى اشۋ ۇستىندە ايتىپ قالاتىن سوزدەرمەن قاتار، كۇندەلىكتى ماعىناسىنا بويلاماي ايتا بەرەتىن سوزدەر دە بار.

  جىگىت جىلامايدى

  بالا بولعان سوڭ قۇلاپ قالسا دا، رەنجىسە دە جىلايدى. ونى جيىرما جاستاعى جىگىتكە بالاۋدىڭ قاجەتى جوق. كىشكەنە كەزىندە قالاي ۇيرەنسە، سولاي قالىپتاسادى دەپ قاتەلەسپەڭىز. كىشكەنتاي بالاعا جىلاۋعا، ەموتسياسىن ىشتە ساقتاماۋعا ەرىك بەرىڭىز. ءوز قىلىعىنا ءوزى ۇيالاتىن، ءوزىن ءوزى باسقارا الاتىن جاسقا جەتكەندە قاي جەردە جىلاپ، قاي جەردە جىلاماۋ كەرەگىن ۇيرەنىپ الادى.

  جىگىت قورىقپايدى

  بىرەۋدەن تاياق جەپ كەلسە "وي، قورقاق" دەپ ودان سايىن جىگەرىن جاسىتۋ زور قاتەلىك. باتىرلار قورىقپايدى دەپ كىشكەنە بالاڭىزدى ەرلىككە شاقىرا المايسىز. بالا بولعان سوڭ قاراڭعىدان دا، يتتەن دە، ورمەكشىدەن دە قورقۋى قالىپتى جاعداي. قايتا قورقىنىشىن جەڭۋىنە كومەكتەسىڭىز. باۋىرجان مومىش ۇلىنىڭ ءوزى "سوعىستا قورىقتىڭىز با؟" دەگەن سۇراققا قورقىنىشسىز ادام بولمايتىنىن، تەك جاۋىڭا مۇنى سەزدىرمەۋىڭ ەرلىك ەكەنىن ايتقان.

  اكەڭ سەكىلدى...

  اكەڭ سەكىلدى جۇمىسسىز قالاسىڭ، اكەڭ سياقتى مالدىڭ ارتىندا جۇرەسىڭ، اكەڭ سياقتى قىرسىقسىڭ دەگەن سەكىلدى سوزدەر ماسەلەنى شەشپەيدى. قانداي جاعداي بولسا دا، بالانىڭ الدىندا اكەسىنىڭ كەمشىلىگىن باسىپ ايتۋعا بولمايدى. ءار بالا ءوز اكەسىن يدەال سانايدى. ونىڭ يدەالىنىڭ اتىنا كىر كەلتىرىپ، كوز الدىندا اكەسىنىڭ الىپ بەينەسىن قۇلدىراتپاڭىز.

  ءبىزدى باعاتىن – سەن

  ەڭبەكقور بولسىن دەپ بالانى كىشكەنە كەزىنەن جۇمىسقا سالىپ قويۋ دا دۇرىس ەمەس. بالا بالالىق شاعىندا ويىنعا قانىپ ءوسۋى كەرەك. وعان سول ويىننىڭ ءوزى زور جۇمىس، ويىنمەن وسەدى، ويىنمەن جەتىلەدى. ءۇيدىڭ ۇلكەنى بولسا دا، ۇلدىڭ ۇلكەنى بولسا دا جاسىنا جەتپەي جاتىپ موينىنا زور جاۋاپكەرشىلىك جۇكتەمەڭىز. اكەسى ىستەيتىن قىزمەتتى بالا اتقارۋى مىندەتتى ەمەس. اقشا تابۋدىڭ دا، ەڭبەك ەتۋدىڭ دە، اتا-اناسىنا قولعابىس جاساۋدىڭ دا ءوز ۋاقىتى بار.

جاۋاپتى رەداكتور : ءاننا اكىمقان قىزى