اعاجاي-التاي تورابى   ›   مادەنيەت ارناسى   ›   بىلگەنگە مارجان

اقتالۋدان ساقتانۋ

  اقتالۋدان ساقتانۋ

  كوپ ادام بىرەۋدىڭ جەكە ءومىرى تۋرالى تۇرتپەكتەپ سۇراپ، ءبىرى ادەيى شامىنا تيۋ ءۇشىن، ەندى ءبىرى اڭداماي سويلەيتىن اڭعالدىعىنان ءتۇرلى ءسوز ايتىپ، وزگەنىڭ كوڭىلىنە كىربىڭ ءتۇسىرۋى مۇمكىن. ەسىڭىزدە بولسىن، مىناداي جاعدايلار ءۇشىن ەشكىمنىڭ الدىندا ەسەپ بەرىپ، اقتالۋعا ءتيىس ەمەسسىز.

  نە كيىپ، نە ىشكەنىڭىزدى، ۋاقىتتى قالاي وتكىزەتىنىڭىزدى، جالپى ءوز ءومىرىڭىز تۋرالى ايتىپ، ەشكىمنىڭ الدىندا اقتالماڭىز. اركىم ءوز قالاۋىمەن ءومىر سۇرۋگە قۇقىلى، تەك اردان اتتاماسا بولعانى. سىزگە قالاي كيىنۋدى، كىممەن كەزدەسىپ، كىممەن سويلەسپەۋدى ايتىپ، اقىلگويلەنەتىن تانىستارىڭىزدىڭ سوزىنە ءمان بەرمەڭىز. نەگە اشىق ماكياج جاساپ العانىڭىزدى نە ءتىپتى بوياۋ جاقپاعانىڭىزدى، نەگە قۇربىلارىڭىز سەكىلدى ءوزىڭىزدى قيناپ ديەتاعا وتىرماي، كوڭىلىڭىز قالاعان تاماقتى جەيتىنىڭىزدى ەشكىمگە ءتۇسىندىرىپ اۋرە بولماڭىز. مۇنىڭ بارلىعى جاي عانا ءوز تاڭداۋىڭىز.

   نەگە ءالى كۇنگە تۇرمىس قۇرماي جۇرگەنىڭىزدى نەمەسە نەگە تۇراقتى كەزدەسەتىن جىگىتىڭىز جوق ەكەنىن دە سۇراۋعا ەشكىمنىڭ حاقى جوق. جاسىڭىز جيىرما بەستەن اسىپ، ءتىپتى وتىز بەسكە جەتسە دە ادامداردىڭ ءسوزى ءۇشىن عانا بىرەۋدىڭ ەتەگىنەن ۇستاۋ مىندەتتى ەمەس. ومىرىڭىزدە بارلىعى ءسىزدىڭ يگىلىڭىز ءۇشىن بولىپ جاتقانىن جانە ەرتە مە، كەش پە ءوز جۇرەگىڭىزدىڭ قالاۋىن كەزدەستىرەتىنىڭىزگە سەنىڭىز. تۋعان-تۋىسىڭىزدى، تانىس، دوستارىڭىزدى دا وسىعان سەندىرىپ، بۇل ماسەلە ءسىزدى ولار سەكىلدى الاڭداتپايتىنىن ايتىڭىز. بولماسا بۇل تاقىرىپتى ءۇنسىز عانا جاۋىپ، اڭگىمە ارناسىن باسقا جاققا بۇرىپ جىبەرىڭىز.

   وتباسى قۇرعانىڭىزعا بىرنەشە جىل بولسا دا ارالارىڭىزدا بالا جوق بولسا، بۇل جاعدايعا دا ەشكىم كيلىگۋىنە بولمايدى. مۇمكىن دەنساۋلىعىڭىز قالىپتى ەمەس شىعار، مۇمكىن ءوزىڭىز ءالى دايىن ەمەسپىن دەيتىن بولارسىز، بالكىم جوسپارلاپ جۇرگەن ۋاقىتىڭىز بار شىعار. وزىڭىزدەن بۇرىن وزگەلەردى مازالايتىن بۇل ماسەلەگە دە ەشكىم باس سۇعا المايدى. شاڭىراق كوتەرگەننەن كەيىن ءبىر جىل ىشىندە بالالى بولۋى كەرەك دەگەن زاڭ جوق. بۇل اركىمنىڭ جولداسى ەكەۋى عانا شەشەتىن ماسەلە. سول سەبەپتى كىم نە دەسە دە، ەشكىمنىڭ سوزىنە قۇلاق اسپاڭىز.

  ەموتسياعا بەيىم ەكەنىڭىزدى... ءبارىمىز دە ەت پەن سۇيەكتەن جارالعان پەندەمىز، بارىمىزدە جۇرەك بار. سوندىقتان كۇلىپ-ويناۋمەن قاتار مۇڭاياتىن ساتتەر دە تۋادى. باسقالار نە ويلايدى ەكەن دەپ كوڭىل كۇيىڭىز جوق بولسا دا، ءوزىڭىزدى كۇشتەپ كۇلىمسىرەۋگە تىرىسۋدىڭ، جاساندى ارەكەتكە بارۋدىڭ ەش قاجەتى جوق. كوز جاسىن كورسەتسەم، السىزدىگىمدى تانيدى دەگەن ويدان اۋلاق بولىڭىز. قايتا جەڭىلدەپ قالام دەسەڭىز، جاقىن جانىڭىزدىڭ كەۋدەسىنە باسىڭىزدى قويىپ توستاعانىڭىزدى جۋىپ الىڭىز.

جاۋاپتى رەداكتور : ءاننا اكىمقان قىزى