اعاجاي-التاي تورابى   ›   اقپارات ايدىنى   ›   ايماقتاعى جاڭالىقتار

قار ـ مۇز مادەنيەت ـ كوركەمونەر جاسامپازدىعى باسشىلار تالقى مىنبەسى جۇڭگوداعى قارلى مەكەندە وتكىزىلدى

  التاي گازەتىنىڭ ءتىلشىسى حۋ جۇنشيۋ حابارلايدى. 11 ـ ايدىڭ 27 ـ كۇنى قار ـ مۇز مادەنيەت ـ كوركەمونەر جاسامپازدىعى باسشىلار تالقى مىنبەسى التايدا سالتانپەن اشىلدى. وسى كەزەكتى تالقى مىنبەسىن اۆتونوميالى رايوندىق مادەنيەت جانە ساياحات مەڭگەرمەسى ۇيىمداستىرىپ، ايماقتىق اكىمشىلىك مەكەمەسى ۇستىنە الىپ وتكىزدى، ايماقتىق پارتكومنىڭ مۇشەسى، اكىمشىلىك مەكەمەسىنىڭ ورىنباسار ءۋاليى ۋاڭ جۇن ـ ان ماجىلىسكە قاتىناستى.

  سول كۇنى بەيجيڭ قىسقى وليمپياداسىن ۇيىمداستىرۋ كوميسسياسىنىڭ، اۆتونوميالى رايوندىق مادەنيەت جانە ساياحات مەڭگەرمەسىنىڭ جاۋاپتىلارى مەن مەملەكەتتىڭ دەنەتاربيە ساڭلاقتارى، ساياحات سالاسىنىڭ مايتالماندارى، كوركەمونەر سالاسىنان كەلگەن سيلى قوناقتار ءبىر اراعا باس قوسىپ، قار ـ مۇز جانە دەنەتاربيە، قار ـ مۇز جانە مادەنيەت، قار ـ مۇز جانە كوركەمونەر جونىندە اڭگىمەلەستى ءارى تاقىرىپتىق لەكسيا جاسادى. مادەنيەت ارقىلى تاريحتى ەسكە ءتۇسىرىپ، قار ـ مۇز مادەنيەتىنىڭ دامۋ تاجىريبەسىنەن ورتاق يگىلىكتەنىپ، التاي قار ـ مۇز مادەنيەتىنىڭ دامۋىنا اقىل ـ كەڭەس بەردى.

  بەيجيڭ قىسقى وليمپياداسىن ۇيىمداستىرۋ كوميسسياسى مادەني قيمىل ءبولىمىنىڭ ورىنباسار باستىعى گاۋ تيان وليمپيادا مادەنيەتى مەن بەيجيڭ 2022 ـ جىلعى قىسقى وليمپياداسى جانە مۇگەدەكتەر وليمپياداسىنىڭ مادەني قيمىلىن تانىستىرىپ، 2022 ـ جىلعى قىسقى وليمپيادانىڭ قۇت بەلگىسى «بيڭدۇندۇندى» جانە قىسقى مۇگەدەكتەر وليمپيادانىڭ قۇت بەلگىسى «شۋەرۇڭرۇڭدى» تانىستىردى. ول مىنانى اتاپ كورسەتتى: «وليمپيادا سپورت جارىسى عانا ەمەس، مادەنيەت سالتاناتى، قىسقى وليمپيادانىڭءتيىمدى ورايىنان پايدالانىپ، جۇڭگو اڭگىمەسىن، شينجياڭنىڭ التاي اڭگىمەسىن جاقسى بايانداپ، اناعۇرلىم مول، اناعۇرلىم تارتىمدى قار ـ مۇز مادەنيەتىن جاراتۋ كەرەك».

  بەيجيڭ حالىق راديو ستانسياسى مۋزيكا راديوسىن جالپىلاستىرۋ ءبولىمىنىڭ ورىنباسار مەڭگەرۋشىسى شۇي پىڭ «2008 ـ جىلعى وليمپيادانىڭ مۋزيكا جاسامپازدىعىنىڭ استارىنداعى اڭگىمەنى» كوپشىلىكپەن ورتاقتاستى. ول بىلاي دەدى: «بۇدان بىلاي اناعۇرلىم كوپ تارتىمدى مۋزيكا تۋىندىلارىنىڭ شينجياڭدا تارالىپ، كلاسسيكالىق شىعارمالاردىڭ ماڭگى جالعاسۋىن ءۇمىت ەتەمىن».

  «مادەنيەت ـــ مەملەكەتتىڭ جانە ۇلتتىڭ جانى، مادەنيەت گۇلدەنسە، ۇلت قۇدىرەتتەنەدى. التاي قار شاڭعى مادەنيەتىن زەرتتەۋدى جانە وعان مۇراگەرلىك ەتۋدى كۇشەيتىپ، بايىرعى تەرى شاڭعى مادەنيەتىن ساۋلەلەندىرۋ قاجەت» ـ دەدى اۆتونوميالى رايوندىق ادەبيەت ـ كوركەمونەرشىلەر بىرلەستىگىنىڭ ورىنباسار ءتوراعاسى قادىلبەك قاقان ۇلى «بايىرعى، ەرەكشە، دەنەتاربيە، وندىرىس ىقپالداستىعى، قار ـ مۇز مادەنيەتى ارقىلى ساياحات كاسىبىن دامىتۋ» دەگەن تاقىرىپتا لەكسيا جاساعان كەزدە.

  شينجياڭ ساياحات قوعامىنىڭ ورىنباسار باستىعى، شينجياڭ ساياحات شارۋاشىلىعى قوعامىنىڭ باستىعى، شينجياڭ شيمىڭ وڭىرلىك ساياحات، مادەنيەت شەكتى سەرىكتەستىگىنىڭ باس جوراسى چىن جيانۋىن بىلاي دەدى: «14ـ كەزەكتى شينجياڭ قىسقى ساياحات كاسىبى ساۋدا كورمەسى التايدا اشىلدى. بۇل التايدىڭ ساياحات ارقىلى شينجياڭدى گۇلدەندىرۋدەگى ماڭىزدى رولىن تولىق ءتۇسىندىردى. قىسقى كورمە التاي قار ـ مۇز كاسىبىنىڭ دامۋىندا وراسان زور جەبەۋ رولىن اتقارادى. ءبىز وسى ورايدى مىقتى يگەرىپ، قىسقى ساياحاتتىڭ اتاعىن ۇزدىكسىز ايگىلەۋگە كۇش سالامىز».

جاۋاپتى رەداكتور : ءاننا اكىمقان قىزى