اعاجاي-التاي تورابى   ›   اقپارات ايدىنى   ›   ايماقتاعى جاڭالىقتار

التاي ـــ قىسقى ساياحات كاسىبى ساۋدا كورمەسىنە ازىرلەنىپ بولدى

  التاي ـــ قىسقى ساياحات كاسىبى ساۋدا كورمەسىنە ازىرلەنىپ بولدى

  11ـ ايدىڭ 27 ـ كۇنى 14 ـ كەزەكتى شينجياڭ قىسقى ساياحات كاسىبى ساۋدا كورمەسى (قىسقاشا قىسقى ساياحات كورمەسى دەلىنەدى) التاي قالاسىندا سالتاناتتى تۇردە اشىلدى. شينجياڭنىڭ جانە تۇتاس باتىس بولەكتەكتىڭ كولەمدى قار ـ مۇز ساياحات قيمىلى نە ءۇشىن التايدا ءۇرتىس ەكى كەزەك وتكىزىلەدى؟ بيىلعى قىسقى ساياحات كورمەسىندە قانداي جاڭالىقتار بار؟ التاي قايتكەندە وسى رەتكى كورمەنى وراي ەتە وتىرىپ، قىسقى ساياحاتتى ويداعىداي دامىتادى؟ جوعارىداعى سۇراقتاردىڭ جەتەگىندە ءتىلشى التاي ايماقتىق پارتكومنىڭ مۇشەسى، اكىمشىلىك مەكەمەسىنىڭ ورىنباسار ءۋاليى ۋاڭ جۇن ـ انمەن ارناۋلى سۇحپاتتا بولدى.

  ـــ  التاي گازەتىنىڭ ءتىلشىسى حۋ جۇنشيۋ حابارلايدى

  ءتىلشى: نە ءۇشىن قىسقى ساياحات كورمەسى التايدا ەكى كەزەك وتكىزىلدى؟

  ۋاڭ جۇن ـ ان: قىسقى ساياحات كورمەسىنىڭ التايدىڭ ەكى كەزەك اشىلۋىنىڭ سەبەبىن مىناداي 5 جاقتاعى ابزالدىلىققا جيناقتاۋعا بولادى.

  ءبىرىنشى ابزالدىلىعى: تاريحي، گۋمانيتارلىق بايلىعى مول. 2005 ـ جىلى التاي قالاسى قاندىعاتى موڭعۇل ۇلتتىق اۋىلىنىڭ دۇندۇر بۇلاعىندا ادامزاتتىڭ قار شاڭعى تەپكەن ەڭ بايىرعى جارتاس سۋرەتتەرى تابىلدى، بۇل وسىدان شامامەن 10 ـ 20 مىڭ جىل بۇرىن. 2015 ـ جىلى التاي قالاسى وتكىزگەن حالىقارالىق بايىرعى قارشاڭعى عىلىمي تالقى جينالىسىندا، نورۆەگيا، ا ق ش، شۋەتسيا قاتارلى 18 ەلدەن كەلگەن 30 نەشە قار شاڭعى تاريحىن زەرتتەۋشى مامان بىرلەسىپ «التاي جارناماسىن» جاريالاپ، التاي حالىقارا جاعىنان «ادامزاتتىڭ قارشاڭعى مەكەنى» دەپ كۋالاندىرىلدى. التايدا قازىرگە دەيىن بايىرعى تەرى شاڭعىمەن سىرعاناۋ قيمىلى ساقتالىپ كەلەدى، ءار جىلى ادامزاتتىڭ قار شاڭعى مەكەنىن ەسكە ءتۇسىرۋ قيمىلىن وتكىزەدى.

  ەكىنشى ابزالدىلىعى: ەلدەن ەرەك قار ـ مۇز بايلىعى. التاي تاۋى دۇنيە ءجۇزى بويىنشا قار شاڭعى تەبۋدىڭ «التىن ەندىگى» 45 گرادۋستا تۇرادى، قارىنىڭ ساپاسى جاقسى، قار بايلىعى مول، ادەتتە جاۋعان قاردىڭ قالىڭدىعى ءبىر مەتردەن اسادى، قارلى ماۋسىمى ۇزاق، ءبىر جىلدىڭ 179 كۇنىندە قار جاۋىپ، 134 كۇنى قار جامىلىپ جاتادى، 2018 ـ جىلى 8 ـ ايدا التايعا مەملەكەتتىك كليمات ورتالىعى «جۇڭگٶداعى قارلى مەكەن» مەملەكەتتىك كليمات بەلگىسىن بەردى.

  ءۇشىنشى ابزالدىلىعى: دەنەتاربيە رۋحىنا مۇراگەرلىك ەتىپ جانە دامىتتى. التاي ايماعى الدىڭعى عاسىردىڭ 50 ـ جىلدارىنان باستاپ، قار ـ مۇز سپورت قيمىلدارىنا جاتتىقتىرۋ جانە ءتۇرلى جارىس قيمىلىن ۇيىمداستىرىپ ورىستەتىپ كەلەدى، 1973 ـ جىلىدان باستاپ مەملەكەتتىك قار شاڭعى جارىسىنا قاتىناسىپ، 1981 ـ جىلى اۆتونوميالى رايوندىق حالىق ۇكىمەتىنىڭ بەكىتۋىمەن، التاي ايماقتىق قار ـ مۇز كاسىپتىك اترەتىن قۇردى. تاربيەلەپ شىققان سپورتشىلار مەملەكەتتىك قار شاڭعى جانە كونكي جارىستارىندا اعا جۇلدەگەر بولدى. بيىل 2020 ـ جىلعى مەملەكەتتىك 14 ـ كەزەكتى قىسقى سپورت جينالىسى مەن بەيجيڭ 2022 ـ جىلعى قىسقى ولمپيادا جينالىسىنا تولىق قامدانۋ ءۇشىن، التاي ايماعىنىڭ اسقار تاۋى قار شاڭعى شينجياڭ گرۋپپاسىنىڭ 12 سپورتشىسى (التايدان التى ادام بار) اۋستريادا جاتتىعۋعا قاتىناسىپ جاتىر.

  ءتورتىنشى ابزالدىلىعى: ەكولوگيالىق ورتاسى تاماشا. التايدىڭ قىسى ۇزاق، قارىنىڭ ساپاسى جاقسى، تۇتاس جىلداعى اۋا ساپاسى مەملەكەتتىك 1 ـ دارەجەلى ولشەمگە جەتەدى، «تابيعي وتتەگى قامباسى» دەگەن اتى بار. ورماندى جەر اۋماعى 40 نەشە ميلليون مۋ، ورمانمەن كومكەرىلۋ مولشەرى %22.65، جىلدىق جاۋىن شاشىن مولشەرى 190 ميلليمەتر، جىلدىق سۋ اعىن مولشەرى 12 ميلليارد 300 ميلليون تەكشە مەتر. التاي ەلىمىزدەگى التى ءىرى ورمان رايونىنىڭ ءبىرى، شينجياڭداعى ءبىرىنشى تابيعي ورمان رايونى، مەملەكەتتىك كەڭەس تۇراقتاندىرعان سۋ قاينارىندى تاۋلى جەر جايلىم ەكولوگيالىق فۋنكتسيالىق رايونى. قازىر التايدا A دارەجەلى كورىنىس رايونىنان 30 ى بار، مۇنىڭ شىندە مەملەكەتتىك A5 دارەجەلى كورىنىس رايونى 3 بولسا، A4 دارەجەلى كورىنىس رايونى 6.

  بەسىنشى ابزالدىلىعى: قاتىناسىنىڭ حاۋىپسىز، ىركىلىسسىز بولۋى. اۋە لەنياسى جاعىندا، التاي ءۇرىمجى، كورلا، قارامايلى، قۇلجا، حوتان، اقسۋ، قاشقار، شاۋەشەك قاتارلى شينجياڭداعى 9 قالا مەن گۋاڭجوۋ، جىڭجوۋ، چۇڭچيڭ، شي ـ ان قاتارلى ەل ىشىندەگى 4 قالاعا ۇشاقپەن تىكە قاتىناۋدى نەمەسە ايالداۋدى جۇزەگە اسىرىپ، قاناس ـ التاي ـ كوكتوعاي ارالىعىندا باۋرلاي ۇشۋ اۋە جولى مەن ءۇرىمجى ـ قاناس قىسقى اۋە جولىن اشىپ، قاناس كورىنىس رايونىندا تۇتاس جىل بويى ۇشاق قاتىناۋدى جۇزەگە اسىردى. تەمىر جول جاعىندا، التاي ايماعىنىڭ بۋرىلتوعاي اۋدانى، بەيتۇن قالاسى، التاي قالاسىنا تۇگەلدەي پويەز قاتىنادى. التاي ـ كوكتوعاي ـ جۇڭعار تەمىر جولى سالىنۋ ۇستىندە، حيلۇڭجياڭ التاي، جيلين التاي ساياحات ارناۋلى پويەزى قاتىنادى. تاس جول جاعىندا، نەگىزگى كورىنىس رايوندارىنا قار كۇرەۋ ماشيناسى، توپىراق كۇرەۋ ماشيناسى قاتارلىلار ورنالاستىرىلىپ، جولدى دەر كەزىندە تازالاپ، قىسقى ساياحاتتا قاتىناستىڭ ىركىلىسسىز بولۋىن قامتاماسىزداندىردى.

  ءتىلشى: وسى كەزەكتى كورمەدە التاي ايماعى قانداي وزگەشەلىك كورسەتەدى؟

  ۋاڭ جۇن ـ ان: وسى كەزەكتى كورمە «1+ N+2+ » ۇلگىسى بويىنشا وتكىزىلەدى، مۇنداعى «1» دەگەنىمىز «14 ـ كەزەكتى شينجياڭ قىسقى ساياحات كاسىبى ساۋدا كورمەسى»؛ «2» دەگەنىمىز ەكى قالا، ياعني التاي مەن ءۇرىمجى قالاسى بىرلەسىپ وتكىزەدى؛ «N» دەگەنىمىز رايونىمىزداعى ءارقايسى ايماقتاردا، وبلىستاردا، قالالاردا «شينجياڭنىڭ قىسقى مادەنيەت ساياحات ماۋسىمى» جەلىلەس قيمىلىن وتكىزەدى. وسى رەتكى كورمەدە التاي ايماعى تومەندەگىدەي 5 وزگەشەلىكتى تانىتادى.

  ءبىرىنشى وزگەشەلىك: وسى رەتكى كورمەنىڭ سيلىعى قوناقتارى مەملەكەتتىڭ مينيسترلىك، كوميتەتتەرىنىڭ، بەيجيڭ 2022 ـ جىلعى قىسقى ولمپياداسىنا ۇيىمداستىرۋ كوميسسياسىنىڭ سيلى قوناقتارىنان، اۆتونوميالى رايوننىڭ باسشىلارىنان، اۆتونوميالى رايوننىڭ قاتىستى مەڭگەرمە، مەكەمەلەرىنىڭ باسشىلارىنان، ەل ءىشى ـ سىرتىنان كەلگەن سيلى قوناقتاردان، 30 ـ كەزەكتى باتىس سولتۇستىك ساياحات سەلبەستىك رايونى جينالىسىنىڭ سيلى قوناقتارىنان قۇرالادى، اشىلۋ سالتى كۇنى «دۇنيە جۇزىلىك اسقار تاۋ قار شاڭعى ەكونوميكالىق تالقى مىنبەسى، قار ـ مۇز مادەنيەتى، كوركەمونەر جاسامپازدىعى جوعارى دارەجەلى باسشىلارى تالقى مىنبەسى، 30 ـ كەزەكتى باتىس سولتۇستىك ساياحات سەلبەستىگى رايونى جينالىسى» وتكىزىلەدى.

  ەكىنشى وزگەشەلىك: اشىلۋ سالتى كۇنى تۇستەن كەيىن، گەنەرال تاۋى قار شاڭعى الاڭىندا ادامزاتتىڭ قار شاڭعى مەكەنى شاتتىعى مەرەكەسى وتكىزىلەدى، 100 جاس وسپىرىم «مەن جانە مەنىڭ وتانىم» ءانىن شىرقايدى، 1000 ادامىنان قۇرالعان بايىرعى تەرى شاڭعى اۋەسكەرلەرى ويىن كورسەتەدى جانە «جالپى حالىقتىڭ قار ويىنى» قيمىلىن وتكىزەدى.

  ءۇشىنشى وزگەشەلىك: وسى كەزەكتى كورمەدە سۋرەت تارتۋ مەرەكەسى، ءدامدى تاعامدار مەرەكەسى، «جىبەك جٶلى سەرۋەنى، قار ـ مۇزدان ءلاززاتتانۋ» ادەبيەت كوركەمونەر ساۋىق كەشى، جۇڭگو ساياحات جاستار بىرلەستىگىنىڭ 2019 ـ جىلعى 8 ـ كەزەكتى جينالىسى قاتارلى قيمىلدار وتكىزىلەدى، قىسقى ولمپيادا جينالىسىن قارسى الۋ جەلىلەس قيمىلدارىنان تىس، التاي ايماعى تاعى 40 ءتۇرلى قىسقى ساياحات مەرەكەسى قيمىلىن وتكىزەدى. مىسالى: مەملەكەتتىك جالپى حالىقتىڭ قار ـ مۇز جەلىلەس قيمىلى، بايىرعى تەرى شاڭعىنى تەبۋ، مۇز ٴۇستى ۆەلوسيپەد جارىسى قاتارلى قيمىلدار، اۋداندار دا (قالا، كورىنىس رايونى) باي مازمۇندى قيمىلدار بولادى. قومداعى قار شاشۋ مەرەكەسى، بۋىرشىنداعى قىراۋ مەرەكەسى، شىڭگىلدەگى زەرتتەۋ ـ ۇيرەنۋ ساياحاتى قاتارلىلار التايدىڭ قىسقى ساياحاتىن تولىق ايگىلەيدى.

  ءتورتىنشى ەرەكشەلىك: وسى رەتكى كورمەدە التاي جوعارى عىلىم ـ تەحنيكا ونىمدەرى، دەنەتاربيە، مادەنيەت، ەكونوميكا، فينانىس سالالارىن توعىستىرادى. مىسالى: دۇنيە جۇزىلىك اسقار تاۋ قار شاڭعى ەكونوميكالىق تالقى مىنبەسى، قار شاڭعى كاسىبى ستراتەگيالىق سەلبەستىگى جانە قىسقى ساياحاتتاعى جٶلاۋشىلاردى جەتكىزۋ كەلىسىمى قاتارلىلاردى وتكىزىپ، ايماعىمىزدىڭ بازار تۇلعاسىن جەتىلدىرىپ، ساياحات قۇرىلعىلارىن كەمەلدەندىرىپ، ساياحات ٴتۇرىن مولايتىپ، التاي ساياحاتىن دامىتۋعا تەرەڭ ىقپال جاسايدى.

  بەسىنشى وزگەشەلىك: بەيجيڭ 2022 ـ جىلعى قىسقى ولمپياداسىنا ۇيىمداستىرۋ كوميسسياسىنىڭ، 30 ـ كەزەكتى باتىس سولتۇستىك ساياحات سەلبەستىك رايونى جينالىسىنىڭ باسشىلارىنان، حيلۇڭجياڭ مادەنيەت ـ ساياحات مەڭگەرمەسىنىڭ، جيلين قاتارلى شينجياڭعا باعىتتامالى كومەكتەسەتىن ولكەلەردىڭ، دوس قالالاردىڭ جانە مادەنيەت ـ ساياحات مەكەمەسىنىڭ باسشىلارىنان، شينجياڭداعى 13 ايماقتىڭ، وبىلىستىڭ ساياحات ىستەرىنە جاۋاپتى باسشىلارى جانە مادەنيەت ـ ساياحات مەكەمەسىنىڭ جاۋاپتىلارىنان، اقپارات دانەكەرلەرى، قار شاڭعى كلوپتارى، ساياحات سەرىكتەستىكتەرى، سونداي ـ اق 6 اۆياتسيا سەرىكتەستىگىنىڭ جاۋاپتىلارىنان 420 نەشە ادام كورمەگە قاتىناسادى.

  ءتىلشى: تۇڭعىش كەزەكتى «قار ـ مۇز مادەنيەت كوركەمونەر جاسامپازدىعى جٶعارى دارەجەلى باسشىلار تالقى مىنبەسى» نە ءۇشىن التايدا وتكىزىلەدى؟ مۇنىڭ قانداي ءمانى بار؟

  ۋاڭ جۇن ـ ان: قار ـ مۇز ساياحاتى، قار ـ مۇز سپورتى، قار ـ مۇز كورمەسى، قار ـ مۇز ساۋدا ـ ساتتىعى، قار ـ مۇز مادەنيەتى، قار ـ مۇز كوركەمونەرى قار ـ مۇز ەكونوميكالىق جۇيەسىن قۇرايدى. بەيجيڭ قىسقى ولمپياداسىنا ۇيىمداستىرۋ كوميسسياسى مادەنيەت قيمىل ءبولىمى ۇيىمداستىرعان تۇڭعىش كەزەكتى «قار ـ مۇز مادەنيەت كوركەمونەر جاسامپازدىعى جٶعارى دارەجەلى باسشىلار تالقى مىنبەسىنىڭ» ماقساتى: قار ـ مۇز مادەنيەتىن، قار ـ مۇز كوركەمونەرىن ىشكەرىلەي دامىتۋ.

  ءبىرىنشى، 2022 ـ جىلعى بەيجيڭ قىسقى ولمپيادا جينالىسىنىڭ اشىلۋ سالتى ەلىمىزدىڭ قار ـ مۇز بايلىعىن، مەملەكەتتىڭ قىسقى ساياحات ماركاسىن ايگىلەيتىن دۇنيە جۇزىلىك دەڭگەيدەگى تەرەزە، ول جۇڭگونىڭ وسىزامانعى ەلەمەنتتەرى مەن ءداستۇرلى تاريحي مادەنيەتىن توعىستىرۋدى قاجەت ەتەدى. ال، التاي ادامزاتتىڭ قار شاڭعى مەكەنى، جۇڭگٶداعى قارلى مەكەن رەتىندە مول قار ـ مۇز مادەنيەت بايلىعىنا يە، ادامزات وسى جەردە قار شاڭعى تەبۋدى ۇيرەنىپ، قار شاڭعى سپورتى وسى جەردەن دۇنيەگە بەت الدى.

  ەكىنشى، قىسقى ساياحات كورمەسى شينجياڭنىڭ قار ـ مۇز بايلىعى مەن قار ـ مۇز مادەنيەتىن ايگىلەيتىن تەرەزە، التاي ايماعىن ءوز ىشىنە العان شينجياڭنىڭ ابزال قار ـ مۇز بايلىعى شوعىرلى كورسەتىلىپ، وسى تالقى مىنبەسىن وتكىزۋشى __ بەيجيڭ 2022 ـ جىلعى قىسقى ولمپيادا جينالىسى مەن قىسقى مۇگەدەكتەر ولمپيادا جينالىسىن ۇيىمداستىرۋ كوميسسياسىنىڭ قار ـ مۇز مادەنيەت بايلىعىن شوعىرلى جيناپ، تەكسەرۋىنە ءتيىمدى.

  ءۇشىنشى، وسى جولى بەيجيڭ 2022 ـ جىلعى قىسقى ولمپيادا جينالىسى مەن قىسقى مۇگەدەكتەر ولمپيادا جينالىسىن ۇيىمداستىرۋ كوميسسياسى التايدا تۇڭعىش رەت قار ـ مۇز بايلىعى مادەنيەتىن، كوركەمونەر فاكتورلارىن توپتايدى، سونىمەن بىرگە بۇل قىسقى ولمپيادا جينالىسىنىڭ نەگىزدىك بىلىمدەرىن جالپىلاستىرۋ ساپارى، قىسقى ولمپيادا مادەنيەتىن تاراتۋ ساپارى بولىپ، اناعۇرلىم كوپ ادامدى قار ـ مۇز سپورتىنان ءلاززاتتاندىرادى.

  ءتىلشى: كورمەدەن كەيىن، التاي قىسقى ساياحاتتى دامىتۋ جاعىندا قانداي جاڭا جوسپارلار مەن شارالاردى العا قويادى؟

  ۋاڭ جۇن ـ ان: التاي جاڭا دامۋ ۇستانىمىن بەرىك تىكتەپ، «ءمولدىر سۋ، جاسىل تاۋ __ باعا جەتپەس بايلىق، قار ـ مۇزدىڭ ءوزى اسىل قازىنا» كوزقاراسىندا تاباندى بولىپ، «جالپى حالىقتىڭ قار ـ مۇز سپورتىنا ات سالىسۋ» سىندى مەملەكەتتىك قيمىلعا بەلسەنە سايكەسىپ، «ءبىر بەلدەۋ، ءبىر جٶل» دارىپتەمەسى مەن «بەيجيڭ 2022 ـ جىلعى قىسقى ولمپياداسىن» ۇستىنە الىپ وتكىزۋ سىندى ەكى ستراتەگيالىق ورايدى مىقتى يگەرىپ، جىبەك جولى ەكونوميكالىق بەلدەۋى قار ـ مۇز مادەنيەت، دەنەتاربيە، ساياحات كاسىپ بەلدەۋىن بەلسەنە قۇرىپ، التايدى دۇنيە جۇزىندەگى قار ـ مۇز سپورتىنىڭ جانە كاسىپتى دامىتۋدىڭ جاڭا ورنىنا اينالدىرادى.

  جوعارى دەڭگەيدە جٶسپار جاسايدى. «ءۇشتى اشپاۋدىڭ» تومەنگى شەگىن قاتاڭ ساقتاپ، «التاي ايماعىنىڭ قار ـ مۇز ساياحات كاسىبىن دامىتۋ جوسپارىن»، «التاي ايماعىنىڭ جەكە اۆتوكولىگىمەن ساياحاتتاۋدى دامىتۋ جوسپارىن»، «التاي ايماعىنىڭ اۋىل ـ قىستاق ساياحاتىن دامىتۋ جٶسپارىن» جوعارى دەڭگەيدە جاسايدى. شينجياڭعا باعىتتامالى كومەكتەسەتىن ولكەلەردىڭ قار ـ مۇز كاسىبىن دامىتۋ ابزالدىلىعىنان پايدالانىپ، جۇڭگو قار ـ مۇز كاسىبىن (چاڭبايشان + التاي تاۋى) دامىتۋ سەلبەستىگىنەن ۇلگى كورسەتۋ رايونىن قۇرىپ، تەرىس اققان، تەرەكتى، قوم ـ قاناس، تورعايتى، 181 ـ مال فەرماسى، ۋشىلىك، گەنەرال تاۋ قار شاڭعى الاڭى، كوكتوعاي قاتارلى 10 ورىننىڭ ساياحات ىستەرىن دامىتىپ، مەملەكەتتىك ستراتەگياعا كوتەرۋگە كۇش سالادى.

  جٶعارى ولشەممەن سارا لەنيا قالىپتاستىرادى. قاناس، قوم قار ـ مۇز ساياحات دەمالىس رايونىن، التاي قار شاڭعى ساياحات دەمالىس رايونىن، بۋرىلتوعاي اۋدانى ۇلىڭگىر كولى قىسقى بالىق اۋلاۋ حالىقتىق سالت ـ سانانى سەزىنۋ رايونىن، كوكتوعاي اۋدانى كوكتوعاي تاۋ شاتقالىن جەكە اۆتوكولىكپەن ساياحاتتاۋ رايونىن قۇرىپ، «ءتورت رايون، ءبىر بەلدەۋ» قىسقى ساياحات سارا لەنياسىن اشىپ، «ءۇش وزەك، N اينالما» سىندى جەكە اۆتوكولىكپەن ساياحاتتاۋ ساياحات لەنياسىن قۇرىپ، جۇڭگو ـ رەسەي ـ موڭعۇليا التاي تاۋى شەكارا اتتاعان ساياحات سارا لەنياسىن قۇرادى.

  قىسقى ساياحات ماركاسىن قالىپتاستىرادى. التاي ايماعىنىڭ دۇنيە ٴجۇزى دارەجەلى قار ـ مۇز ابزالدىلىعىن سۇيەنىش ەتىپ، التاي تاۋى تابيعي قار باقشاسىن، التاي قالاسى گەنەرال تاۋى قار شاڭعى الاڭىن، گەنەرال تاۋى تابيعي قار شاڭعى الاڭىن، كوكتوعاي حالىقارالىق قار شاڭعى الاڭىن ۋاكىل ەتكەن قار شاڭعى ماركاسىن قۇرىپ، گەنەرال تاۋى، ۋشىلىك، ۇلىڭگىر كولى، كوكتوعاي قىسقى ساياحات لەنياسى قاتارلىلاردى اشىپ، قاناستى كوشباسشى ەتكەن، التاي قالاسى، كوكتوعاي، قوم سىندى ءۇش ءىرى قار شاڭعى الاڭى مەن التاي تاۋى مىڭ شاقىرىمدىق ساياحات كاريدورىن تىرەك ەتكەن «ءتورت رايون، ءبىر بەلدەۋ» قىسقى ساياحاتتى دامىتۋ جوسپارىن جاسايدى. بۇقارالىق قار ـ مۇز سپورتىن كۇش سالا دامىتىپ، مىڭ ادامدىق بايىرعى تەرى شاڭعى اترەتىن قۇرىپ، ورتا ـ باستاۋىش مەكتەپتەردىڭ دەنەتاربيە ساباعىن قار شاڭعى الاڭىندا ءوتىپ، التايدى ەلىمىزدەگى قار ـ مۇز كاسىبى ءىرى رايونى ەتىپ قۇرۋعا كۇش سالادى.

  ۇگىتتەۋ، تانىستىرۋ قىزمەتىن نازاردى شوعىرلاندىرا وتىرىپ ويداعىداي ىستەيدى. دوۋيىن، جينرى توۋتياۋ، حوشان لەزدىك كەسكىنى، بلوك قاتارلى جاڭا اقپارات دانەكەرلەرىنەن پايدالانىپ، ايماعىمىزدىڭ ساياحاتىن ويداعىداي ۇگىتتەيدى. «سىرتقا شىعارۋ» مەن «ۇسىنىس ەتىپ ەنگىزۋدى» ۇشتاستىرىپ، ەلىمىزدەگى كورمەلەرگە، تانىستىرۋ جينالىستارىنا بەلسەنە قاتىناسىپ، ەلىمىزدەگى ساياحاتى دامىعان قالالارعا بارىپ ۇگىتتەپ، «ادامزاتتىڭ قار شاڭعى مەكەنىنىڭ» ىقپال قۋاتىن ارتتىرىپ، «جەر ءجانناتى __ قاناس، قارلى مەكەن __ التاي» ماركاسىن اسپەتتەيدى. قومدا شاعان وتكىزۋ، ۇلىڭگىر كولىندەگى قىسقى بالىق اۋلاۋ مەرەكەسى، بۋىرشىنداعى قىراۋ مەرەكەسى، قار ـ مۇز سالت ـ سانا ساياحات مەرەكەسى قاتارلى قيمىلداردى وتكىزىپ، التاي ساياحاتىن ەلىمىزگە، دۇنيە جۇزىنە بەت الدىرادى.

  )

جاۋاپتى رەداكتور : ءاننا اكىمقان قىزى