اعاجاي-التاي تورابى   ›   اقپارات ايدىنى   ›   ايماقتاعى جاڭالىقتار

التايدىڭ قىسقى ساياحاتىنا ىزدەنىس جاساۋ ءماندى ساپارىن باستادى

«قۇتتى مەكەن شينجياڭعا ساياحات . توراپ مىقتىلارىنىڭ 8 ـ كەزەكتى» تاقىرىپتىق قيمىلى جانە «مەن شينجياڭنىڭ جارشىسىمىن» اتتى كولەمدى توراپ الەۋمەتتىك يگىلىك قيمىلى رەسمي باستالدى

  التاي گازەتىنىڭ ءتىلشىسى مەرەي كارىباي قىزى حابارلايدى. 11 ـ ايدىڭ 25 ـ كۇنى «قۇتتى مەكەن شينجياڭعا ساياحات . توراپ مىقتىلارىنىڭ 8 ـ كەزەكتى» تاقىرىپتىق قيمىلى جانە «مەن شينجياڭنىڭ جارشىسىمىن» اتتى كولەمدى توراپ الەۋمەتتىك يگىلىك قيمىلى كوكتوعاي اۋدانىنىڭ كوكتوعاي قالاشىعىندا رەسمي باستالدى. ەلىمىزدىڭ جەر ـ جەرىنەن كەلگەن اقپارات مەديالارىنىڭ تىلشىلەرى، شينجياڭنىڭ ءىشى ـ سىرتىنداعى توراپ مىقتىلارى وسى ارادا التايدىڭ قىسقى ساياحاتى جايلى ىزدەنىس جاساۋ ٴماندى ساپارىن باستادى.

  ۇعىسۋعا قاراعاندا، اۆتونوميالى رايوندىق پارتكومنىڭ «ساياحات كاسىبىن دامىتۋدى ستراتەگيالىق تىرەكتى كاسىپكە اينالدىرۋ» جونىندەگى شەشىم ـ ورنالاستىرۋىن ىشكەرىلەي دايەكتىلەندىرىپ، تياناقتاندىرىپ، شينجياڭ ساياحاتىن قىزۋ ورلەۋگە كوتەرۋ ءۇشىن، اۆتونوميالى رايوندىق پارتكوم توراپ ينفورماتسيا كەڭسەسىنىڭ جوبالاۋى، اۆتونوميالى رايوندىق پارتكوم ۇگىت ءبولىمى، اۆتونوميالى رايوندىق مادەنيەت ـ ساياحات مەڭگەرمەسىنىڭ جەتەكشىلىگىمەن «قۇتتى مەكەن شينجياڭعا ساياحات . توراپ مىقتىلارىنىڭ 8 ـ كەزەكتى» تاقىرىپتىق قيمىلى جانە «مەن شينجياڭنىڭ جارشىسىمىن» كولەمدى توراپ الەۋمەتتىك يگىلىك قيمىلى وتكىزىلدى. وسى رەتكى قيمىلعا ورتالىق اقپارات مەديالارىنىڭ تىلشىلەرىنەن، شينجياڭنىڭ ءىشى ـ سىرتىنداعى توراپ مىقتىلارىنان 40 نەشە ادام ۇسىنىس ەتىلدى. ولار 3 گرۋپپاعا ءبولىنىپ التاي، تارباعاتاي، ءۇرىمجى، قاشقار، قىزىلسۋ قىرعىز اۆتونوميالى وبلىسى قاتارلى 5 جەرگە اتتاندى، ارالاۋ ارقىلى شينجياڭنىڭ جەر ـ جەرىنىڭ وزگەشە قار ـ مۇز مادەنيەت ەرەكشەلىگىن، شينجياڭنىڭ قىسقى «سەيىلدەي ءجۇرىپ دەمالىپ ساياحاتتاۋ»، «دەنساۋلىقتى كۇتىمدەي ءجۇرىپ ساياحاتتاۋ» قاتارلى جاڭا ساياحات تۇرلەرىن كوردى.

  «شينجياڭدى كورسەم دەگەن ارمانىما جەتتىم، بۇل اراداعى ءار ۇلت باۋىرلاستاردىڭ قوناعۋارلىعىن شىنايى سەزىنىپ، وسى رەتكى ساپارىما ءدان ريزا بولدىم، شينجياڭنىڭ كوركەم تابيعاتىن ەل ءىشى ـ سىرتىنداعى دوستارعا تانىستىرىپ، شينجياڭعا كەلگىسى كەلەتىن ساياحات اۋەسكەرلەرىنە تانىستىرىپ شينجياڭدى ساياحاتتاۋعا شاقىرامىن» ـ دەدى كى لىلى.

  جۋىق جىلداردان بەرى، ايماق «ءمولدىر سۋ، جاسىل تاۋ ـــ باعا جەتپەس بايلىق، قار ـ مۇزدىڭ ءوزى اسىل قازىنا» تانىمىن بەرىك ورناتىپ، 2022 ـ جىلعى بەيجيڭ قىسقى وليمپيادا جينالىسى ءتيىمدى ورايىن مىقتى يگەرىپ، اۆتونوميالى رايوندىق پارتكومنىڭ «1+3+3+رەفورما جاساپ، ەسىك اشۋ» قىزمەت ورنالاستىرۋىن دايەكتىلەندىرىپ، تياناقتاندىردى، «ساياحات كاسىبىن نەگىزگى تۇلعا ەتۋ، 1 ـ كاسىپتى جەتەلەۋ، 2 ـ كاسىپتى سۇيەمەلدەۋگە» تاباندى بولىپ، ساياحات كاسىبىن نەگىزگى تۇلعا ەتكەن ەكونوميكانىڭ جوعارى ساپالى دامۋىن شىنايى جەبەدى، ورنىقتىلىق الا كەلگەن تيىمدىلىككە ىلەسە، ايماقتىڭ ساياحات كاسىبىندە قاۋىرت ارتۋ جاعدايى بايقالدى. بيىل 1 ـ ايدان 10 ـ ايعا دەيىن ايماق جيىنى 31 ميلليون 800 مىڭ ادام (رەت) ساياحاتشى قابىلداپ، ساياحاتتاعى جىلدىق تۇتىنىلىمدى جيناقتاعاندا 36 ميلليارد 370 ميلليون يۋانعا جەتىپ، ۇقساس مەزگىلدەگىدەن جەكە ـ جەكە %45.8 جانە %64.6 ارتتى.

  ايماقتىق پارتكومنىڭ مۇشەسى، اكىمشىلىك مەكەمەسىنىڭ ورىنباسار ءۋاليى ۋاڭ جۇن ـ ان بىلاي دەدى: «ساياحاتتىڭ دامۋىن ايگىلى ماركا جاراتۋ مەن جالپىلاستىرۋدان، ينتەرنەت تورابى ۇگىتىنەن بولە قاراۋعا بولمايدى. توراپ مىقتىلارىنىڭ قۇتتى مەكەن شينجياڭعا ساياحات قيمىلىن وتكىزۋ التايدىڭ ساياحات بايلىعىن ىشكەرىلەي ۇگىتتەۋ، حابارلاۋعا سەپتىگىن تيگىزىپ قالماستان، ساياحات كاسىبىنىڭ قاۋىرت دامۋىنا پايدالى بولدى. وسى رەتكى قيمىلعا قاتىناساتىن ساياحات مايتالماندارىنىڭ التايدى ەمىن ـ ەركىن ساياحاتتاپ، التايدىڭ قىسقى قار ـ مۇز كورىنىسىن، قار ـ مۇز قىزىقتارىن شىنايى سەزىنۋمەن بىرگە، قولىنداعى قالام جانە اپپاراتىمەن التايدىڭ قىسقى ساياحات جاعدايىن ەستەلىككە الىپ، كوركەم التايدىڭ، شينجياڭنىڭ تابيعاتىن ايگىلەۋىن ءۇمىت ەتەمىن».

  اۆتونوميالى رايوندىق پارتكوم توراپ ينفورماتسيا كەڭسەسى جوبالاعان «مەن شينجياڭنىڭ جارشىسىمىن» اتىنداعى كولەمدى توراپ الەۋمەتتىك يگىلىك قيمىلى دا سول كۇنى قاتار باستالدى. اۆتونوميالى رايوندىق پارتكوم توراپ ينفورماتسيا كەڭسەسىنىڭ ورىنباسار مەڭگەرۋشىسى دي دوحۋا بىلاي دەدى: «وسى قيمىلدىڭ ماقساتى ـــ قوعامنىڭ ءار سالاسىن جانە توراپتاستاردى شينجياڭنىڭ ءدامدى تاعامدارىن، اسەم كورىنىسىن، قالاسىن، ەرەكشە ەگىن شارۋاشىلىق ونىمدەرىن، ادامزات مادەنيەتىن تانىستىراتىن جارشى بولىپ، جاراسىمدى دامىعان، قوعامى العا باسقان، وركەنيەتتى، اشىق ۇستالعان كوركەم شينجياڭدى جان ـ جاقتىلى ايگىلەپ، «شينجياڭ جاقسى جەر» ايگىلى ماركاسىن ايگىلەۋ.

جاۋاپتى رەداكتور : ءاننا اكىمقان قىزى