اعاجاي-التاي تورابى   ›   مادەنيەت ارناسى   ›   بىلگەنگە مارجان

قاتەلىگىڭىزدى مويىنداي بىلەسىز بە؟

  قاتەلىگىڭىزدى مويىنداي بىلەسىز بە؟

  ادامدار ومىرلىك جاعدايلاردان شىعۋدىڭ جولدارىن بىلەتىن شىعار، الايدا كوپشىلىگىنە ءوز قاتەسىن مويىنداۋ قيىنعا سوعادى.

  مەكتەپتەگى ءبىلىم بەرۋ جۇيەسى قاتەلىكتىڭ تولىق بەينەسىن بەرە الادى. قاتەلىك دەگەنىمىز نە؟ بۇل ــ تومەن باعا، مۇعالىمدەردىڭ نارازىلىعى، اتا-انانىڭ ەسكەرتۋى، بۇل ــ كوپشىلىكتىڭ كوزىنشە سىنىپتاستارىڭنىڭ كۇلكى ەتكەن ارەكەتى... ءوزىڭىزدى وتە ناشار سەزىنەسىز، سولاي ما؟

  وكىنىشكە وراي، كوپشىلىگى قاتەلىكتى وسىلاي قابىلدايدى. ماسقارا بولعانىڭدى سەزىنۋ، ۇيالۋ، قاتەلىگىڭدى بەتىڭە باسقان ادامنان قىسىلۋ، كىنالىنى ىزدەۋ. ءتىپتى كىشكەنە كەزىڭىزدە ءوزىڭىز دايىندالماي بارعان تاپسىرماعا تومەن باعا قويعانى ءۇشىن مۇعالىمدى كىنالاي سالۋ وڭايىراق بولاتىن. قاتەلىكتى مويىنداماۋدىڭ سوڭى وتىرىك ايتۋعا، ەكىجۇزدىلىككە، ۋادەنى بۇزۋعا اكەلىپ سوعادى.

  ال جاساعان قاتەلىگىڭىز ءۇشىن پەداگوگتار مەن قورشاعان ورتا تاراپىنان سونشالىقتى قىسىم بولماعاندا، بارلىعى باسقاشا بولار ما ەدى؟! ءبىر رەت شالىس باسقان ادام بىردەن جامان ادامعا اينالادى دەگەن ءسوز ەمەس قوي. كەرىسىنشە، ءار قاتەلىك ءسىزدىڭ پايداڭىزعا شەشىلەدى ــ الداعى ومىرگە تاجىريبە بولادى. ءوز قاتەسىن دەر كەزىندە تۇسىنگەن ادام ونى ەكىنشى رەت قايتالامايدى.

  ءوزىمىزدى كىنالى سەزىنۋدەن قالاي ارىلامىز؟

  كىم بولسا دا، قاتەلىك جىبەرسە بىردەن ۇيدەگى اتا-انام نە ويلايدى، دوستارىما نە دەپ جاۋاپ بەرەمىن دەپ باس قاتىرادى. مۇنداي ويدىڭ تۇككە دە قاجەتى جوق. ومىردە قاتەلىك جىبەرمەيتىن ادام بولمايدى. ەشقاشان قاتەلەسپەيتىن ادام ەشتەڭە ىستەمەي بوس جۇرەدى دەگەن ءسوز.

  قاتەلىكتى مويىنداۋدان قورىقپاڭىز. بۇل ايتار اۋىزعا عانا جەڭىل دەۋىڭىز مۇمكىن، الايدا قاتەلەسكەنىڭىزدى جاسىرماساڭىز ــ ونىڭ شەشىمى دە وڭاي بولادى. اقتالۋ ورنىنا، قولمەن ىستەگەندى مويىنمەن كوتەرۋ قاسيەتىن اينالاڭىزداعى بارلىق ادام جوعارى باعالايدى. جاعدايعا تۋرا قاراپ، باس ەنەرگياڭىزدى تەك ماسەلەنىڭ شەشىمىن تابۋعا عانا جۇمساڭىز.

  ءوز-وزىڭىزگە ءادىل كوزقاراسپەن قاراڭىز. قاتەلىككە سەبەپ بولار جاعدايلاردى تولىق بايانداڭىز ءارى وعان وزىڭىزدەن وزگە ەشكىمدى كىنالى ساناماڭىز.

جاۋاپتى رەداكتور : ءاننا اكىمقان قىزى