اعاجاي-التاي تورابى   ›   اقپارات ايدىنى   ›   ايماقتاعى جاڭالىقتار

ايماقتىڭ قىسقى ساياحاتىن ارناۋلى تانىستىرۋ ءماجىلىسى ۋجوۋ قالاسىندا وتكىزىلدى

  التاي گازەتىنىڭ ءتىلشىسى ياڭ ۋيشۋان حابارلايدى. 11 ـ ايدىڭ 4 ـ كۇنى ايماقتىق قىسقى ساياحاتتى ارناۋلى تانىستىرۋ ءماجىلىسى گۋاڭشي جۋاڭزۋ اۆتونوميالى رايونىنىڭ ۋجوۋ قالاسىندا وتكىزىلىپ، ايماعىمىزدىڭ بوگەنايى بولەك ساياحات بايلىعى مەن ورىن ابزالدىلىعىن ءار قىرىنان، جان ـ جاقتىلى ايگىلەدى. ۋجوۋ قالالىق پارتكومنىڭ قاتىستى باسشىلارى، ساياحات ورىندارى جانە جەرگىلىكتى ورىنداعى اقپارات دانەكەرلەرىنىڭ ۋاكىلدەرى وسى رەتكى تانىستىرۋ ماجىلىسىنە قاتىناستى.

  تانىستىرۋ ءماجىلسى ايماقتىق ءان ـ ءبي ۇيىرمەسىندەگى ارتيستەردىڭ ورىنداعان كۇمبىرلى كۇي اۋەنىمەن پەردەسىن اشتى. ارتيستەردىڭ بۇرالا باسقان ءبيى مەن تامىلجىتا شىرقاعان ٴانى مايدانداعى كورەرمەندەردى بىردەن وزىنە باۋرادى.

  ۋجوۋ قالالىق پارتكومنىڭ تۇراقتى مۇشەسى، ورىنباسار قالا باستىعى ما حۇي ۋجوۋ قالاسى اتىنان الىستان كەلگەن ايماقتىڭ ۋاكىلدەر ۇيىرمەسىن قارسى الاتىندىعىن ءبىلدىردى. ما حۇي بىلاي دەدى: «ۋجوۋ مەن التايدىڭ ارالىعى نەشە مىڭ شاقىرىم بولعانىمەن، 2 جەردىڭ وزگەشە جاراتىلىستىق تابيعاتى، اسىل تاس مادەنيەتى قارايلاس. ودان قالسا، ۋجوۋداعى شيجياڭ اۋە جايى باتىس تەرىستىك رايونعا قاتىنايتىن اۋە لەنياسىن اشىپ، ەكى جەردىڭ ارا قاشىقتىعىن جاقىنداتتى. بۇدان بىلاي ەكى جەر اۋىس ـ كۇيىس جانە سەلبەستىكتى كۇشەيتىپ، وسى رەتكى اسىل تاس مەرەكەسى مەن تانىستىرۋ ءماجىلىسىن وراي ەتىپ، ساياحات لەنياسىن اشىپ، ساياحات بازارىن كەڭەيتىپ، ساياحات كاسىبىن دامىتىپ، ءوزارا تيىمدىلىك جەتكىزىپ، ەكى الىپ بيگە شىعۋىن ءۇمىت ەتەمىز».

  سوڭىندا ايماق، قالا 2 دارەجەلى مادەنيەت ـ دەنە تاربيە، راديو ـ تەلەۆيزيا جانە ساياحات مەكەمەسىنىڭ قاتىستى تاراۋلارىنىڭ جاۋاپتىلارى جانە كوكتوعاي اۋدانى، قاناس كورىنىس رايونىنىڭ ساياحات ورىندارى ۋاكىلدەرى ناق مايداندا ىلگەرىندى ـ كەيىندى ساياحات ونىمدەرىن تانىستىردى.

  التاي ايماعى شينجياڭنىڭ تەرىستىگىنە ورنالاسقان «ادامزاتتىڭ قار شاڭعى مەكەنى». قار ـ مۇز مادەنيەتىنىڭ تاريحى ۇزاق، قارىنىڭ ساپاسى جاقسى، قالىڭ، قارلى مەرزىمى ۇزاق، قىستا شاڭعى تەبۋ ٴتۇرى مەملەكەت بويىنشا الدىڭعى قاتاردا. 2018 ـ جىلى 8 ـ ايدا التاي مەملەكەتتىك كليمات ورتالىعى جاعىنان «جۇڭگوداعى قارلى مەكەن» داڭقتى اتاعىنا يە بولدى. بيىل ايماعىمىز قىستا تيجارات جۇرگىزەتىن بارلىق مەملەكەتتىك A دارەجەلى كورىنىس رايونىنىڭ قىسقى قاقپا بەلەت ساياساتىن اتقارۋ، سونداي ـ اق ارناۋلى ۇشاق، پويەزدى مايلاپ العانداردى سيلاۋ قاتارلىلاردى قامتىعان ساياحاتتاعى ءبىرسىپىرا ءتيىمدى ساياساتتاردى ىركەس ـ تىركەس ورتاعا قويىپ، التايعا ساياحاتتاي كەلگەن ساياحاتشىلاردى ساياحات جاعىنداعى تيىمدىلىكتەرمەن جان ـ جاقتىلى قامدادى.

  جۋىق جىلداردان بەرى، ايماق «ساياحات كاسىبىن نەگىزگى تۇلعا ەتۋ، 1 ـ كاسىپتى جەتەلەۋ، 2 ـ كاسىپتى سۇيەمەلدەۋدە» تاباندى بولىپ، «جەر ءجانناتى __ قاناس، قارلى مەكەن __ التاي» وزەكتى ايگىلى ماركاسىن جاراتىپ، قىسقى ساياحاتتى بار كۇشپەن جەبەپ، التايدى دۇنيە جۇزىلىك قار ـ مۇز ساياحاتىنداعى كوزدەۋلى جەر جانە دۇنيە جۇزىلىك قار ـ مۇز سپورتىنداعى كوزدەۋلى جەر ەتىپ قۇرۋعا بارىنشا كۇش سالۋدا.

جاۋاپتى رەداكتور : ءاننا اكىمقان قىزى