اعاجاي-التاي تورابى   ›   اقپارات ايدىنى   ›   ايماقتاعى جاڭالىقتار

ايماعىمىزدىڭ قىسقى ساياحاتىن ارناۋلى تانىستىرۋ جينالىسى ۋجوۋ قالاسىندا اشىلدى

  11-ايدىڭ 4-كۇنى ايماعىمىزدىڭ قىسقى ساياحاتىن ارناۋلى تانىستىرۋ جينالىسى ۋجوۋ قالاسىندا ٴساتتى اشىلدى. التايدىڭ وڭىرلىك وزگەشە كورىنىسى مەن وڭىرلىك ابزالدىلىققا يە ساياحات بايلىعى ۋجوۋدا تۇرلىشە تۇرعىدان، كوپ ساتىلى، جان - جاقتىلى ايگىلەندى. ۋجوۋ قالالىق پارتكومنىڭ قاتىستى باسشىلارى، قاتىستى تاراۋلار (ورىندار)، ساياحات كاسپورىندارىىڭ جانە جەرگىلىكتى اقپارات قۇرالدارىنىڭ ۋاكىلدەرىنەن 100 دەن استام ادام وسى رەتكى تانىستىرۋ جينالىسىنا قاتىناستى.

  تانىستىرۋ جينالىسى التاي ايماقتىق ٴان-ٴبي ۇيىرمەسىنىڭ ارتيستەرى دومبىرادا ورىنداعان كۇيمەن باستالدى، وسىدان كەيىن، مىڭ بۇرالعان ٴبي مەن جاعىمدى ٴان اۋەنى زالداعىلاردىڭ كوڭىلىن كوتەرىپ تاستادى.

  ۋجوۋ قالالىق پارتكومنىڭ تۇراقتى مۇشەسى، ورىنباسار قالا باستىعى ما حۇي ۋجوۋ قالاسى اتىنان التاي ايماعىنىڭ ۋاكىلدەر ۇيىرمەسىن قارسى الاتىنىن ٴبىلدىردى. ما حۇي بىلاي دەدى: ۋجوۋ مەن التاي ٴبىرى وڭتۇستىكتە، ٴبىر سولتۇستىكتە، اراسى نەشە مىڭ شاقىرىم شالعاي بولعانىمەن، ەكى ٴوڭىردە دە وزىندىك ەرەكشەلىككە يە تاۋ - وزەندەر، جارقىراعان جاقۇت مادەنيەتى بار، اسىرەسە ۋجوۋدىڭ شيجياڭ اۋەجايى باتىس سولتۇستىك وڭىرگە قاتىنايتىن اۋە جولىن جاڭادان اشتى، بۇل ەكى جەردىڭ - كەڭىستىك ارالىعىن جاقىنداتتى. بۇدان بىلاي اۋىس ـ كۇيىس پەن سەلبەستىكتى كەڭىنەن ورىستەتىپ، وسى رەتكى جاقۇت مەرەكەسى مەن تانىستىرۋ جينالىسىن وراي ەتىپ، ساياحات جەلىسىن، ساياحات بازارىن، ساياحات كاسىبىن اشىپ، ٴوزارا پايدا جەتكىزىپ، تەڭ يگىلىككە كەنەلۋىن ٴۇمىت ەتەمىن .

  التاي ايماقتىق اكىمشىلىك مەكەمەسىنىڭ ورىنباسار باس حاتشىسى سەرىك جانسۇلتان ۇلى ۋجوۋلىقتاردى التايعا ساياحاتتاي بارۋعا ۇسىنىس ەتتى ٴارى التاي مەن ۋجوۋدىڭ اۋىس - كۇيىسى مەن بارىس - كەلىسىن كۇشەيتىپ، ەكى جەردىڭ ساياحات كاسىبىنىڭ ٴوزارا ىقپالداستىعى مەن ەكونوميكاسىنىڭ دامۋىن بىرگە جەبەيتىنىن ٴبىلدىردى.

  وسىدان كەيىن ايماقتىق جانە قالالىق مادەنيەت - ساياحات مەكەمەسىنىڭ قاتىستى تاراۋلارىنىڭ جاۋاپتىلارى، سونداي - اق كوكتوعاي اۋدانى، قاناس كورىنىس رايونىنداعى ساياحات كاسپورىندارىنىڭ ۋاكىلدەرى ىلگەرىندى-كەيىندى كوپشىلىككە ساياحات ونىمدەرىن تانىستىردى .

  شينجياڭنىڭ سولتۇستىك بولەگىنە ورنالاسقان التاي- ادامزات شاڭعى ونەرىنىڭ جارىققا شىققان جەرى، قار- مۇز مادەنيەتى ارىدان جالعاسقان، قار قالىڭ جاۋادى، قارلى مەزگىلى ۇزاق، قىسقى شاڭعى سپورت تۇرى بۇكىل ەل بويىنشا ايگىلى. 2018- جىلى 8- ايدا مەملەكەتتىك اۋارايى ورتالىعى التاي قالاسىنا «جۇڭگوداعى قارلى مەكەن» اتاعىن بەردى.

  بيىل ايماعىمىز تاعى ٴبىر قىدىرۋ قىسقى ساياحاتقا تيىمدىلىك جاساۋ ساياساتتارىن ارت - ارتىنان شىعاردى. بۇل بۇكىل ايماقتاعى قىستا اشىلاتىن بارلىق A دارەجەلى كورىنىس رايوندارىنىڭ قىسقى ەسىك بەلەتى ساياساتىن اتقارۋىن، سونىمەن بىرگە كورىنىس رايوندارىنىڭ تيىمدىلىك جاساۋ، ايروپلاندى مايعا الۋشىلاردى، ارناۋلى ساياحات پويەزىن ورنالاستىرۋشىلاردى، ساياحات ونىمدەرىن شىعارۋشىلاردى سيلاۋ سياقتىلاردى قامتيدى. جەر-جەردەگى ساياحاتشىلارعا ٴتۇرلى جاقتاردان، كوپ تۇرعىدان ساياحاتتىڭ پايداسىن جەتكىزدى.

  ٴتىلشىنىڭ ۇعىسۋىنشا، جاقىنعى جىلداردان بەرى، ايماعىمىز باس شۋجي شي جينپيڭ العا قويعان”ءمولدىر سۋ ، جاسىل تاۋ _ باعا جەتپەس بايلىق، اق قار، كوك مۇزدا اسىل قازىنا“ دەگەن دامۋ ۇستانىمىنا بەلسەنە ٴۇن قوسىپ، ”ساياحات كاسىبىن نەگىزگى تۇلعا ەتۋ، ءبىرىنشى كاسىپكە قوزعاۋشىق ەتۋ ، ەكىنشى كاسىپتى بيىك كوتەرۋ“ سىندى دامۋ وي جەلىسى بويىنشا، ”ءجەر ءجانناتى- قاناس، قارلى مەكەن-التاي“ تانىمالدىعىن قالىپتاستىرىپ، بۇكىل ايماقتىڭ قىسقى ساياحاتىن كۇش سالا جالپىلاستىرىپ، التايدى بۇكىل شينجياڭداعى، ٴتىپتى، بۇكىل ەلدەگى شاڭعى تەبەتىن ءتۇيىندى ورىنعا اينالدىرىپ، التايدىڭ قىسقى ساياحاتى سىندى تانىمالدىقتى بارىنشا جالپىلاستىرۋعا كۇش سالدى.

  اۋدارعان: قىمبات قۇنتاي قىزى

جاۋاپتى رەداكتور : ءاننا اكىمقان قىزى