اعاجاي-التاي تورابى   ›   مادەنيەت ارناسى   ›   ونەگە

جولداسىڭىزدىڭ سىرىن ەشكىمگە اشپاڭىز

  جولداسىڭىزدىڭ سىرىن ەشكىمگە اشپاڭىز

  ومىرىڭىزدە بولىپ جاتقان وقيعالاردان دوستارىڭىزدى، تۋىستارىڭىزدى حاباردار ەتۋدىڭ ەش سوگەتتىگى جوق. الايدا ايتىلمايتىن تاقىرىپتار دا بار. اسىرەسە وتباسىلىق ومىرگە قادام باسقان بولساڭىز، ءبىراز نارسەنى قۇپيا ساقتاۋعا، بۇرىنعىداي ەمەن-جارقىن بارلىعىن جايىپ سالماي، ءار سوزىڭىزگە اباي بولىپ ايتۋعا تۋرا كەلەدى. سەبەبى بۇل تەك جەكە باسىڭىزدىڭ ەمەس، جولداسىڭىزدىڭ دا سىرى.

  وكپە-رەنىش

  جولداسىڭىزعا رەنجىپ قالساڭىز، باسقاعا بارىپ ونىڭ قىلىعىن ايتىپ، شاعىمدانۋعا اسىقپاڭىز، جەكە وزىنە عانا ايتىپ، وڭاشادا شەشىڭىز. باسقالار سىزگە ءوز كۇيەۋىڭىزدى ودان ارى جامانداپ، جانىڭىزدى تەك نەگاتيۆكە تولتىرادى. ودان رەنىشىڭىز ۇلعايىپ، قارىم-قاتىناستى قالپىنا كەلتىرۋ دە قيىنداي تۇسەدى. ال كەيىن قايتا تاتۋلاسقاندا كۇيەۋىڭىز ءسىز قۇلاعدار قىلعان ادامداردىڭ ەمەس، ءسىزدىڭ عانا كوڭىلىڭىزدى تابادى. ال جامانداعان ادامدارىڭىز سول پىكىرىندە قالىپ، ونى جەك كورىپ جۇرەدى.

  قارجىلىق قيىندىقتار

  قاراجات جاعىنان قينالۋ ءتىپتى ءسىز باي دەپ جۇرگەن ادامداردىڭ دا باسىندا بولۋى مۇمكىن. اقشانىڭ جەتپەي جاتقانىن، ايلىقتان ايلىققا قاراپ كۇن كورىپ وتىرعانىڭىزدى جىر قىلۋدىڭ پايداسى جوق. وتباسىلىق بيۋدجەتىڭىزدى دە جاريا قىلىپ، كىمنىڭ قانشا تاباتىنى، ونىڭ قانشاسىنا ازىق-تۇلىك الىپ، قانشاسىن جولعا جۇمسايتىندارىڭىز دا ەشكىمگە كەرەك ەمەس. جەتپەي جاتسا بىرەۋ بارىن ءبولىپ بەرمەيدى، اسىپ-تاسىپ جاتسا وزگەنىڭ كۇندەستىگىن قوزدىرىپ، ودان ارتىلام دەۋدىڭ قاجەتى جوق.

  باقىت

  «باقىت تىنىشتىقتى سۇيەدى» دەگەن ءسوزدى ەستىگەن بولارسىز. سوندىقتان سىزدە ءبارى جاقسى ەكەنىن قايتا-قايتا ايتىپ، باسقالاردىڭ قىزعانىشىن وياتپاڭىز.

  جوسپار

  العا قويعان ماقساتتارىڭىزدى، جوسپارلارىڭىزدى، ارماندارىڭىزدى دا جاريا قىلۋدىڭ قاجەتى جوق. ادامدار سوزىڭىزگە ەمەس، بىتكەن ىسىڭىزگە قاراپ ءتانتى بولاتىنداي جاعداي جاساڭىز. ويىڭىزدى بارلىعىنا ايتا بەرسەڭىز، ورىندالماي قالۋى دا ىقتيمال. كوپكە كۇلكى بولعانشا، ورىندالماعان ءىسىڭىز ىشىڭىزدە قالا بەرسىن. مۇمكىن، الداعى ۋاقىتتا قول جەتكىزەسىزدەر، ال ءسىز ايتقان ۋاقىتتا جەتپەگەن ماقساتىڭىزدان تابالاعان كوپشىلىكتىڭ ءسوزى ودان سايىن كەيىن شەگىندىرە تۇسەدى.

  جولداسىڭىزدىڭ دوستارى تۋرالى پىكىرى

  قانداي جاعداي بولسا دا، بۇل اقپاراتتى مەملەكەتتىك قۇپياداي ساقتاڭىز. سەبەبى بۇل تولاسسىز وسەككە ۇلاسىپ، ناتيجەسىندە ەرىڭىزدىڭ سىزگە دەگەن سەنىمسىزدىگى مەن رەنىشىنەن وزگە تۇك قالمايدى. ءارى ونىڭ بەدەلىنە دە نۇقسان كەلەدى. از سويلەپ، كوپ تىڭدايتىندار قاتارىندا بولساڭىز، ەشتەڭەدەن ۇتىلمايسىز.

جاۋاپتى رەداكتور : ءاننا اكىمقان قىزى