اعاجاي-التاي تورابى   ›   مادەنيەت ارناسى   ›   دەنساۋلىق

بالاعا ەمىزدىك زيان با؟

  

بالاعا ەمىزدىك ەمىزۋدىڭ ارتىقشىلىقتارى مەن كەمشىلىكتەرى قاتار جۇرەدى. ەمىزدىكتى بەرۋ-بەرمەۋ جونىندە دارىگەرلەردىڭ پىكىرى قاي كەزدە دە ءبىر جەردەن شىقپاعان. ءتىس دارىگەرلەردىڭ كوپشىلىگى ەمىزدىك ءتىس-جاق جۇيەسىنىڭ قالىپتاسۋى كەزىندەگى اقاۋلاردىڭ پايدا بولۋىنا تىكەلەي سەبەپشى كورەدى. سوندىقتان ونى قولدانۋعا تيىم سالادى. ال ەندى ءبىر بولىگى ەمىزدىكتىڭ بۇل پروتسەسكە ەشقانداي زياندى اسەرى جوق دەپ ەسەپتەيدى.

  نەۆروپاتولوگتار مەن پسيحولوگتار بالانىڭ ەمىزدىكتى ۇزدىكسىز اۋزىنان تۇسىرمەۋى ەشقانداي جاقسىلىققا الىپ بارمايدى دەيدى. الايدا ءومىرىنىڭ العاشقى 6 ايىنىڭ سوڭى مەن ەكىنشى جارتى جىلىنىڭ باسىندا بالانىڭ اۋزى اينالاداعى زاتتاردىڭ قاسيەتىن زەرتتەۋ قۇرالى بولىپ تابىلادى. وسى رەتتە ماماندار نارەستەنىڭ وياۋ كەزىندە اۋزىنان ۇنەمى ەمىزدىكتى تۇسىرمەۋى ــ ونىڭ اقىل ويى مەن پسيحيكالىق دامۋىنا كەسىر اسەرىن تيگىزەدى.

  ەگەر دە نارەستە ىشىنە گازدىڭ جينالۋىنان قينالسا نەمەسە قاتتى ىزالانىپ، تىنىشى كەتىپ، ۇيىقتاي الماي جىلاعان كەزدەرىندە اسەرى وسى ەمىزىككە تەڭ كەلەتىن ەشتەڭە دە جوق، ءبىراق بۇل جاعدايدا ءبىر نارسەنى ۇمىتپاۋ قاجەت. ەمىزدىكتى اسا ءبىر قاجەتتىلىك تۋماسا، بالانىڭ اۋزىنا كەرەكتى-كەرەكسىز سالا بەرۋگە بولمايدى.

  ەمىزىكتىڭ تاعى ءبىر پايداسى ــ كەيبىر بالالار ساۋساق سورۋدى ۇناتادى. ولار ءۇشىن ساۋساعىن سورۋ ــ ءوزىن-ءوزى الداندىرۋدىڭ ەڭ جاقسى ءتاسىلى. الايدا ساۋساق سورۋ شىن مانىندە زياندى ادەت. سەبەبى ول كەيىن تىستەردىڭ قيسايىپ وسۋىنە الىپ كەلەدى. بالالار ساۋساعىن سورعان كەزدە ونى اۋزىنا تەرەڭ تىعىپ، ءوسىپ كەلە جاتقان تىستەردى باسىپ-جانشىپ، ونى ارتقا قاراي قيسايتىپ جىبەرەدى. ەمىزىكتىڭ وسى تۇستا پايداسى ءتىستى وسىنداي قىسىمداردان ساقتاپ قالادى.

  ماماندار ساۋساق سورۋ سەكىلدى جامان ادەتتەن ارىلتۋدىڭ امالى رەتىندە نارەستەنى ۇزاق ەمىزۋدى ۇسىنادى. ساۋساق سورۋدىڭ ەڭ باستى سەبەبى ــ بوبەكتىڭ انا ءسۇتىن ەمۋ كەزىندەگى قۋانىشقا تولى سەزىمىنىڭ ابدەن قاناعاتتانباعان كۇيى كەنەتتەن دوعارىلىپ قالاتىندىعىندا.

جاۋاپتى رەداكتور : ءاننا اكىمقان قىزى