اعاجاي-التاي تورابى   ›   مادەنيەت ارناسى   ›   بىلگەنگە مارجان

قورقۋدى قالاي جەڭۋگە بولادى؟

  

    اينالامىز نەگىزسىز اقپاراتتارعا تولىپ جاتىر. كوپ جاعدايدا ونى جۇرەككە جاقىن قابىلداپ دا جاتامىز. ۇشاق قۇلاپ تۇسسە، ۇشۋعا باتىلىمىز بارماي قالادى. ءساتسىز جاسالىنعان وتالاردى ەسىتىپ، دارىگەرگە بارۋدىڭ ءوزى ءبىر ۇرەيگە اينالادى. وسى سەكىلدى ماسەلەلەردەن قالاي ارىلۋعا بولادى؟

  پسيحولوگتىڭ كەڭەسى:

  كەلىپ تۇسكەن اقپاراتتى دەرەك كۇيىندە قابىلداۋ كەرەك. سوندا قورقىنىش قالىپتاسپايدى. اقپارات ومىردەگى تاجىريبەنىڭ ايناداعى كولەڭكەسى عانا. ءيا، ۇشاقتار قۇلايدى. ول ومىردەگى بولىپ جاتقان ۇدەرىستەردىڭ ءبىرى. ولاردىڭ قالاي كوتەرىلىپ، قالاي قونىپ جاتقاندارىن دا تۋرا سونداي اقپاراتقا جاتقىزۋعا بولادى. ۇشقىش مامانداردىڭ ارنايى دايىندىق كۋرستارىنان ۇنەمى ءوتىپ تۇرۋى اۋە اپاتتارىنىڭ ءجيى ورىن الماۋىنا الىپ كەلەدى. ال بىرەڭ-ساراڭ ورىن الاتىن وقىس وقيعاعا تاپ بولىپ قالۋىم مۇمكىن دەگەن وي ءسىزدىڭ ويىڭىزدى جاۋلاۋىنا مۇمكىندىك بەرمەڭىز.

  جاسالىناتىن وتالاردىڭ دا ءساتتى، ءساتسىز اياقتالاتىندارى بار. وعان وتا جاسالىنعاننان كەيىنگى جاعداي دا سەبەپ بولۋى مۇمكىن. نەمەسە وسىعان ۇقساس نارسەلەر ورىن الۋى ىقتيمال. دەگەنمەن، دەر كەزىندە كورسەتىلمەگەن مەديتسينالىق كومەكتىڭ كەسىرىنەن ءساتسىز جاعدايدىڭ الدىن الۋ مۇمكىن بولماي قالادى.

  ويشا تارازىلاپ كورىڭىز. تارازىنىڭ ءبىر جاعىندا ءسىزدىڭ تىنىشتىعىڭىز بەن وزىڭىزگە دەگەن سەنىمىڭىز. ال ەكىنشى بەتىندە ومىردە كورىپ جاتقان شىنايى ماسەلەلەر مەن ۇرەيلەر. نە ماڭىزدى، نە باسىم؟ شەشىم قابىلداڭىز. ءسىز ۇشۋدان باس تارتىپ نەمەسە وتا جاساتپاي تۋىنداعان ۇرەيدى باسا المايسىز. ونى قايتا ۇلكەيتىپ الاسىز. الدىمەن قابىلداناتىن شەشىمنىڭ سالدارى قانداي بولاتىنى تۋرالى وي قوزعاپ كورىڭىز. سوسىن بارلىق دەرەكتىك اقپاراتتار مەن ايقىن باعىتتاردى انىقتاي باستايسىز. وقىس جاعدايلاردان قورىقپاڭىز، ول ءسىزدىڭ ومىرىڭىزدەن تىس بولىپ جاتقان ۇدەرىس.

جاۋاپتى رەداكتور : ءاننا اكىمقان قىزى